(နိုင်ငံတကာ) ဇွန် ၁၇
ကွန်ဂိုဒီမိုကရက်တစ်သမ္မတနိုင်ငံ (DRC) တွင် လက်ရှိဖြစ်ပွားနေသော အီဘိုလာကူးစက်မှုသည် လူပေါင်း ၁၁,၀၀၀ ကျော် သေဆုံးခဲ့သည့် သမိုင်းတစ်လျှောက် အဆိုးရွားဆုံး ကပ်ရောဂါဖြစ်ပွားမှုထက်ပင် ပိုမိုပြင်းထန်သေဆုံးမှုများပြားလာနိုင်ကြောင်း အာဖရိက ရောဂါထိန်းချုပ်ရေးနှင့် ကာကွယ်ရေးစင်တာ (Africa CDC) ၏ အကြီးအကဲက ပြောကြားလိုက်သည်။
ဘူရွန်ဒီနိုင်ငံတွင် ကျင်းပပြုလုပ်သည့် အာဖရိကခေါင်း ဆောင်များနှင့် နိုင်ငံတကာအလှူရှင်များ၏ အွန်လိုင်းအစည်း အဝေးအတွင်း Africa CDC ညွှန်ကြားရေးမှူးချုပ် ဂျင်းန် ကာဆီယာ (Jean Kaseya)က “အကယ်၍ ကျွန်တော်တို့ ဒီကူးစက်မှုကို အမြန်ဆုံး မတားဆီးနိုင်ဘူးဆိုရင် ဒါဟာ ယခင် အနောက်အာဖရိကနဲ့ DRC အရှေ့ပိုင်းမှာ ဖြစ်ပွားခဲ့တာတွေထက် ပိုမိုဆိုးရွားသွားပါလိမ့်မယ်” ဟု ထည့်သွင်းပြောကြားခဲ့သည်။
အစိုးရ၏ နောက်ဆုံးထုတ်ပြန်ချက် အချက်အလက်များအရ DRC တွင် အတည်ပြုလူနာဦးရေသည် သေဆုံးသူ ၁၉၆ ဦး အပါ အဝင် စုစုပေါင်း ၈၃၇ ဦးအထိ တိုးမြင့်လာခဲ့ပြီ ဖြစ်သည်။
အကြီးမားဆုံး စိုးရိမ်ပူပန်မှုမှာ ဗိုင်းရပ်စ်ပိုးရှိသူများနှင့် ထိတွေ့မှုရှိခဲ့နိုင်ခြေရှိသည့် လူပေါင်းသောင်းနှင့်ချီကို ယခုအချိန်အထိ ရှာဖွေဖော်ထုတ်နိုင်ခြင်း မရှိသေးသည့်အချက် ဖြစ်သည်။ “ပိုးရှိသူနဲ့ ထိတွေ့ခဲ့သူတွေကို လိုက်လံရှာဖွေတဲ့လုပ်ငန်း (Contact tracing) မှာ ကျွန်တော်တို့အနေနဲ့ လူပေါင်း ၂၆,၀၀၀ ကျော်ကို ပျောက်ဆုံးနေပါတယ်။ သူတို့ ဘယ်မှာရှိနေလဲ၊ အခြားသူတွေကို ရောဂါထပ်မံကူးစက်စေခြင်း ရှိ၊ မရှိ ဆိုတာကို မသိရသေးတဲ့အတွက် ဒါဟာ အဓိကပြဿနာကြီး ဖြစ်နေပါတယ်” ဟု ကာဆီယာက သုံးသပ်ထားသည်။
တစ်ဖက်တွင်လည်း ကပ်ရောဂါသည် ကူးစက်မှုအမြင့်ဆုံးအဆင့်သို့ မရောက်သေးဘဲ နှိမ်နင်းရန် နောက်ထပ်တစ်နှစ်ခန့် ကြာမြင့်နိုင်ကြောင်း အပြည်ပြည်ဆိုင်ရာ ကြက်ခြေနီအဖွဲ့က သတိပေးထားသည်။ မြေပြင်တွင် ကုသရေးစင်တာများ လုံ လောက်စွာမရှိခြင်း၊ တင်းကျပ်သော သန့်ရှင်းမှုအစီအမံများအပေါ် ဒေသခံလူထု၏ ခုခံငြင်းဆန်မှုများနှင့် ရင်ဆိုင်နေရသည်။
အထူးသဖြင့် အီဘိုလာဖြင့် သေဆုံးသူများ၏ ရုပ်အလောင်းများသည် ကူးစက်နိုင်စွမ်းလွန်စွာမြင့်မားသော် လည်း မိသားစုဝင်များက အကာအကွယ်မပါဘဲ ကိုင်တွယ်သင်္ဂြိုဟ်သည့် ရိုးရာ ဓလေ့များကြောင့် ကူးစက်မှု ပိုမိုမြန်ဆန်နေခြင်း ဖြစ်သည်။
လက်ရှိတွင် ရောဂါထိန်းချုပ်ရေးလုပ်ငန်းများအတွက် လို အပ်နေသည့် ရန်ပုံငွေ ဒေါ်လာ ၅၁၈ သန်းအနက် ငါးပုံတစ်ပုံအောက်သာ ရရှိထားသေးကြောင်း အာဖရိကသမဂ္ဂဥက္ကဋ္ဌလည်းဖြစ်သည့် ဘူရွန်ဒီသမ္မတ ဧဝရစ်စ်တီ အင်ဒိုင်းယီရှီမီယေးက ပြောကြားသည်။
ရန်ပုံငွေမလုံလောက်ပါက အကျိုးဆက်မှာ ပိုမိုပျက်စီးနိုင်ပြီး လက်ရှိဖြစ်ပွားနေသော ဗိုင်းရပ်စ်မျိုးကွဲအတွက် အတည်ပြုထားသည့် ကုသထုံး သို့မဟုတ် ကာကွယ်ဆေးလည်း မရှိသေးဘဲ ကာကွယ်ဆေးအဆင်သင့်ဖြစ်ရန် ကိုးလခန့် ကြာမြင့်နိုင်ကြောင်း ကမ္ဘာ့ကျန်းမာရေးအဖွဲ့ (WHO) က ဆိုသည်။
ယခုအခါ ကပ်ရောဂါသည် အိမ်နီးချင်း ယူဂန်ဒါနိုင်ငံသို့ပါ ကူးစက်ပျံ့နှံ့သွားခဲ့ပြီး ယူဂန်ဒါတွင် ကူးစက်ခံရသူ ၁၉ ဦး (၁၄ ဦးမှာ DRC မှ ခရီးသွားခဲ့သူများဖြစ်) ရှိလာကာ သေဆုံးသူ ၂ ဦးအထိ ရှိလာပြီဖြစ်ကြောင်း သိရသည်။
Telegram»…
https://t.me/positiveanglenews
#PAN