(ပြည်တွင်း) ဧပြီ ၂၀
၂၀၂၆ ခုနှစ် နွေစပါးစိုက်ပျိုးလျက်ရှိသော တောင်သူများအတွက် သွင်းအားစုဓာတ်မြေဩဇာများကို အရည်အသွေးမှန်ကန်စွာ အသုံးပြုနိုင်စေရန်နှင့် ဈေးနှုန်းသက်သာစွာဖြင့် အလွယ်တကူ ဝယ်ယူရရှိနိုင်ရေးအတွက် သက်ဆိုင်ရာဌာနများမှ စီမံဆောင်ရွက်လျက်ရှိကြောင်း သိရသည်။
၂၀၂၅-၂၀၂၆ ခုနှစ် နွေစပါးစိုက်ပျိုးရာသီအတွက် ထွန်ယက်စိုက်ပျိုးရန် ကျန်ရှိနေသည့် နေပြည်တော်ကောင်စီနယ်မြေအတွင်းရှိ ကျေးရွာများသို့ ပုလဲဓာတ်မြေဩဇာများကို တစ်အိတ်လျှင် ငွေကျပ် တစ်သိန်းငါးရာနှုန်းဖြင့် လက်ငင်းငွေချေစနစ်ဖြင့် လုပ်ငန်းခွင်အရောက် တိုက်ရိုက်ဖြန့်ဖြူးရောင်းချပေးလျက်ရှိသည်။
ယင်းအရောင်းအဝယ်အစီအစဉ်ကို ယနေ့နံနက်ပိုင်းတွင် နေပြည်တော် လယ်ဝေးမြို့နယ် ခရမ်းကိုင်းကျေးရွာရှိ စိုက်ပျိုးရေးနည်းပညာပေးစင်တာ၌ ကျင်းပခဲ့ပြီး နွေစပါးစိုက်တောင်သူများ ဓာတ်မြေဩဇာ ဝယ်ယူနေမှုများကို ပြည်ထောင်စုဝန်ကြီးနှင့် နေပြည်တော်ကောင်စီအဖွဲ့ဝင်တို့က လာရောက်ကြည့်ရှုအားပေးကာ အားပေးစကားများ ပြောကြားခဲ့ကြသည်။
ထို့နောက် သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန ပြည်ထောင်စုဝန်ကြီး ဦးမျိုးဇော်သိမ်းက တောင်သူများအတွက် လိုအပ်သည့် ဓာတ်မြေဩဇာများကို အချိန်မီ လက်ဝယ်ရောက်ရှိစေရေး ဆက်လက်စီမံဆောင်ရွက်သွားမည့် အခြေအနေများနှင့် တောင်သူများ၏ ဝင်ငွေတိုးပွားရေး၊ ဒေသဖွံ့ဖြိုးရေးအတွက် ဝန်ကြီးဌာန၏ ဆောင်ရွက်ချက်များကို ရှင်းလင်းပြောကြားခဲ့သည်။
ထို့ပြင် တောင်သူများ၏ စိုက်ပျိုးရေ အချိန်မီရရှိရေးနှင့် စိုက်ပျိုးထုတ်လုပ်မှုဆိုင်ရာ တင်ပြချက်များအပေါ် ပြည်ထောင်စုဝန်ကြီးနှင့် သက်ဆိုင်ရာတာဝန်ရှိသူများက ညှိနှိုင်းပေါင်းစပ် ဆောင်ရွက်ပေးခဲ့ကြောင်း သိရသည်။
ဆက်လက်၍ မြန်မာ့ဩဘာ ကောမက် G-46 ပုလဲဓာတ်မြေဩဇာကို တစ်အိတ်လျှင် ငွေကျပ် တစ်သိန်းငါးရာနှုန်းဖြင့် စိုက်ဧကအလိုက် လိုအပ်ချက်အပေါ်မူတည်ကာ ရောင်းချပေးလျက်ရှိမှုကိုလည်း ကြည့်ရှုအားပေးခဲ့ကြသည်။
ယနေ့တွင် နေပြည်တော်ကောင်စီနယ်မြေအတွင်းရှိ ကျေးရွာ (၆) ရွာတွင် ဓာတ်မြေဩဇာများ ရောင်းချပေးလျက်ရှိပြီး လက်ရှိစိုက်ပျိုးလျက်ရှိသော နွေစပါးစိုက်ဧကများအနက် ထွန်ယက်စိုက်ပျိုးရန် ကျန်ရှိသည့်ဧရိယာ၏ ဓာတ်မြေဩဇာလိုအပ်ချက် ၃၀ ရာခိုင်နှုန်းကို ပထမအသုတ်အဖြစ် ဖြည့်ဆည်းပေးလျက်ရှိကြောင်း သိရသည်။
ကျန်ရှိသည့် ဧရိယာများအတွက်လည်း အသုံးပြုရမည့်ကာလအမီ နှစ်ကြိမ်ခွဲ၍ ဆက်လက်ရောင်းချပေးသွားမည်ဖြစ်ပြီး တောင်သူများ၏ လိုအပ်ချက်များကို ရာနှုန်းပြည့် ဖြည့်ဆည်းပေးနိုင်ရေး ဆောင်ရွက်လျက်ရှိကြောင်း သတင်းရရှိသည်။