(မှုခင်း) မေ ၂၅
နေပြည်တော်ကောင်စီနယ်မြေ၊ လယ်ဝေးမြို့၌ အမျိုးသမီးငယ်တစ်ဦးအား လိင်ပိုင်းဆိုင်ရာ မဖွယ်မရာပြုလုပ်ကာ မှတ်တမ်းတင်ရိုက်ကူးခဲ့သည့် ဖြစ်စဉ်အပေါ် တရားခံအား လူကုန်ကူးမှုတားဆီးနှိမ်နင်းရေးဥပဒေဖြင့် အရေးယူခဲ့ပြီး ထောင်ဒဏ် ၁၀ နှစ် ချမှတ်ခဲ့ကြောင်း မြန်မာနိုင်ငံရဲတပ်ဖွဲ့မှ သိရသည်။
ဖြစ်စဉ်အရ ၂၀၂၃ ခုနှစ်အတွင်း လယ်ဝေးမြို့နေ အမျိုးသမီးငယ်တစ်ဦးအား ပန်းတိမ်လုပ်ငန်းလုပ်ကိုင်သူတစ်ဦးက ခင်မင်ရင်းနှီးမှုအခြေအနေကို အလွဲသုံးစားပြု၍ မဖွယ်မရာပြုလုပ်ခြင်းနှင့် မှတ်တမ်းတင်ရိုက်ကူးခြင်းများ ပြုလုပ်ခဲ့ကြောင်း စစ်ဆေးပေါ်ပေါက်ခဲ့သည်ဟု ဆိုသည်။
အဆိုပါဖြစ်စဉ်နှင့်ပတ်သက်၍ ကလေးသူငယ်ကာကွယ်စောင့်ရှောက်ရေးတပ်ဖွဲ့စု (နေပြည်တော်) က တရားလိုပြုလုပ်တိုင်ကြားခဲ့ပြီး လယ်ဝေးမြို့မရဲစခန်းတွင် လူကုန်ကူးမှုတားဆီးနှိမ်နင်းရေးဥပဒေပုဒ်မ ၃၅ ဖြင့် အမှုဖွင့်လှစ် စစ်ဆေးခဲ့သည်။
ထို့နောက် ၂၀၂၆ ခုနှစ် မေ ၂၅ ရက်တွင် လယ်ဝေးခရိုင်တရားရုံးက တရားခံအား လူကုန်ကူးမှုတားဆီးနှိမ်နင်းရေးဥပဒေပုဒ်မ ၃၅ အရ အလုပ်နှင့် ထောင်ဒဏ် ၁၀ နှစ် ချမှတ်ခဲ့ကြောင်း သတင်းရရှိသည်။
#PAN