(ပြည်တွင်း) မတ် ၃၀
လာမည့် သင်္ကြန်ပွဲတော်ကာလအတွင်း ရန်ကုန်မြို့ရှိ YBS ယာဉ်များကို ယာဉ်စီးခနှုန်းမပြောင်းလဲဘဲ ပုံမှန်အတိုင်း ဆက်လက်ပြေးဆွဲပေးသွားမည်ဖြစ်ကြောင်း ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေးကြီးကြပ်မှုကော်မတီ (YRTC) မှ ထုတ်ပြန်ကြေညာထားသည်။
YRTC တွဲဖက်အတွင်းရေးမှူး ဦးလျန်ကျင့်မာန်က သင်္ကြန်ကာလအတွင်း ပြည်သူများ သွားလာရေးအဆင်ပြေစေရန် YBS ယာဉ်များကို ပုံမှန်ပြေးဆွဲပေးသွားမည်ဖြစ်ပြီး ယာဉ်စီးခနှုန်းများကိုလည်း မူလနှုန်းထားအတိုင်း ဆက်လက်ထားရှိသွားမည်ဖြစ်ကြောင်း ပြောကြားခဲ့သည်။
ထို့ပြင် ယာဉ်အန္တရာယ်ကင်းရှင်းရေးအတွက် လုံခြုံရေးနှင့် စည်းကမ်းထိန်းသိမ်းရေးလုပ်ငန်းများကိုလည်း တိုးမြှင့်ကြီးကြပ်ဆောင်ရွက်သွားမည်ဖြစ်ကြောင်း သိရသည်။
သင်္ကြန်ပွဲတော်ကာလဖြစ်သည့် ဧပြီ ၁၃ ရက်မှ ၁၆ ရက်အတွင်း YBS ယာဉ်လိုင်းကုမ္ပဏီ ၁၅ ခုမှ ယာဉ်လိုင်း ၇၁ လိုင်းဖြင့် ယာဉ်အစီးရေ ၁၀၀၀ ကျော် ပြေးဆွဲပေးသွားမည်ဖြစ်ပြီး ပြည်သူများ၏ သွားလာရေးလိုအပ်ချက်များကို ဖြည့်ဆည်းပေးနိုင်ရန် စီစဉ်ထားကြောင်း သိရသည်။
လက်ရှိတွင် ရန်ကုန်မြို့အတွင်း YRTC ၏ ကြီးကြပ်မှုအောက်တွင် YBS ယာဉ်လိုင်းကုမ္ပဏီ ၂၁ ခု၊ ယာဉ်လိုင်း ၁၄၁ လိုင်း၊ ယာဉ်အစီးရေစုစုပေါင်း ၅၄၆၂ စီးရှိပြီး နေ့စဉ် ယာဉ်အစီးရေ ၃၅၀၀ ခန့်ဖြင့် ယာဉ်လိုင်း ၁၃၂ လိုင်းမှ ခရီးသည် ၁ ဒသမ ၅ သန်းကျော်ကို သယ်ယူပို့ဆောင်ပေးလျက်ရှိကြောင်း သိရသည်။