(နိုင်ငံတကာ) အောက်တိုဘာ ၂၉
ကမ္ဘာတစ်ဝန်း လုံခြုံရေးဆိုင်ရာ စိုးရိမ်ပူပန်မှုများ မြင့်တက်လာချိန်တွင် ဂျပန်နှင့် ဗြိတိန်နိုင်ငံတို့က ပြည်သူများအနေဖြင့် သဘာဝဘေးအန္တရာယ်နှင့် အရေးပေါ်အခြေအနေများ ဖြစ်ပွားပါက ကိုယ့်အားကိုယ်ကိုး ရင်ဆိုင်နိုင်ရန် အိမ်တွင် အနည်းဆုံး သုံးရက်စာ အရေးပေါ်သုံးပစ္စည်းများ ကြိုတင်စုဆောင်းထားရန် တိုက်တွန်းထားသည်။
အဆိုပါအစီအမံများကြောင့် စစ်ပွဲနှင့် အကြီးစားဆိုက်ဘာတိုက်ခိုက်မှုများ ဖြစ်ပွားလာနိုင်ခြေအပေါ် ခန့်မှန်းပြောဆိုမှုများ ထွက်ပေါ်လာသော်လည်း နှစ်နိုင်ငံအစိုးရများ၏ အဓိကရည်ရွယ်ချက်မှာ သတ်မှတ်ထားသော အကျပ်အတည်းတစ်ရပ် မကြာမီဖြစ်ပွားတော့မည်ဟု သတိပေးခြင်းထက် ဘေးအန္တရာယ်တစ်ခု ဖြစ်ပွားပြီးနောက် အစိုးရ၏ အကူအညီများ အချိန်မီမရောက်ရှိနိုင်သည့် အခြေအနေများအတွက် ကြိုတင်ပြင်ဆင်ထားစေရန် ဖြစ်ကြောင်း သိရသည်။
ဂျပန်က အရေးပေါ်ပြင်ဆင်မှုများ အားဖြည့်ရန် တိုက်တွန်းဂျပန်နိုင်ငံတွင် ဘေးအန္တရာယ်စီမံခန့်ခွဲရေးဆိုင်ရာ ဝန်ကြီး ဂိုရှီ ဟိုဆိုနို (Goshi Hosono) က အိမ်ထောင်စုများအနေဖြင့် အနည်းဆုံး သုံးရက်စာ စားနပ်ရိက္ခာနှင့် သောက်ရေများ ပြင်ဆင်ထားရန်နှင့် ဖြစ်နိုင်ပါက တစ်ပတ်စာအထိ စုဆောင်းထားရန် တိုက်တွန်းထားကြောင်း ဒေသတွင်းမီဒီယာများက ဖော်ပြသည်။
ဂျပန်နိုင်ငံတွင် အင်အားပြင်းငလျင်ကြီးများနှင့် ဖူဂျီတောင် မီးတောင်ပေါက်ကွဲမှုကဲ့သို့သော ဘေးအန္တရာယ်များ ဖြစ်ပွားလာပါက လမ်းပန်းဆက်သွယ်ရေး၊ ရေပေးဝေရေးနှင့် ဆက်သွယ်ရေးကွန်ရက်များ ထိခိုက်ပျက်စီးနိုင်ပြီး ကယ်ဆယ်ရေးအဖွဲ့များနှင့် ထောက်ပံ့ရေးပစ္စည်းများ ဘေးသင့်ဒေသများသို့ ရောက်ရှိရန် အချိန်ကြာမြင့်နိုင်သည်။
ထို့ကြောင့် စားနပ်ရိက္ခာနှင့် သောက်ရေများအပြင် တစ်ကိုယ်ရေသန့်ရှင်းရေးသုံးပစ္စည်းများနှင့် နေ့စဉ်လူနေမှုဘဝအတွက် လိုအပ်သည့်ပစ္စည်းများကိုပါ ကြိုတင်ပြင်ဆင်ထားရန် အကြံပြုထားသည်။
ယင်းအစီအမံသည် အရေးပေါ်ပစ္စည်းများ စုဆောင်းထားရန် စံနှုန်းအသစ်တစ်ခု သတ်မှတ်ခြင်းမဟုတ်ဘဲ ဂျပန်နိုင်ငံတွင် ယခင်ကတည်းက ရှိနေသော ဘေးအန္တရာယ်ကြိုတင်ပြင်ဆင်ရေး လမ်းညွှန်ချက်များကို ပြည်သူများ ပိုမိုလိုက်နာလာစေရန် ရည်ရွယ်ခြင်းဖြစ်သည်။
ဗြိတိန်က ၇၂ နာရီစာ အရေးပေါ်သုံးပစ္စည်းများ ပြင်ဆင်ထားရန် အကြံပြုဗြိတိန်အစိုးရအဖွဲ့ရုံး (UK Cabinet Office) သည် အောက်တိုဘာ ၂၂ ရက်တွင် “Be Ready” အမည်ဖြင့် အရေးပေါ်ကြိုတင်ပြင်ဆင်ရေးလှုပ်ရှားမှုကို စတင်ခဲ့ပြီး ပြည်သူများအနေဖြင့် အရေးပေါ်အခြေအနေများတွင် အနည်းဆုံး ၇၂ နာရီကြာ ကိုယ့်အားကိုယ်ကိုး နေထိုင်နိုင်ရန် ပြင်ဆင်ထားဖို့ တိုက်တွန်းထားသည်။
အဆိုပါလှုပ်ရှားမှုတွင် ပြင်းထန်သော ရာသီဥတုအခြေအနေများ၊ ရေကြီးရေလျှံမှုများ၊ ဆိုက်ဘာတိုက်ခိုက်မှုများနှင့် အခြားအကြောင်းရင်းများကြောင့် လျှပ်စစ်မီး၊ ရေပေးဝေရေးနှင့် ဆက်သွယ်ရေးဝန်ဆောင်မှုများ ပြတ်တောက်သွားနိုင်သည့် အခြေအနေများကို ထည့်သွင်းစဉ်းစားထားသည်။
ဗြိတိန်အစိုးရက အကြံပြုထားသည့် အရေးပေါ်သုံးပစ္စည်းများတွင် သောက်ရေ၊ ချက်ပြုတ်ရန်မလိုသော အစားအစာများ၊ လက်နှိပ်ဓာတ်မီး၊ အပိုဘက်ထရီများ၊ အားသွင်းဘက်ထရီအိတ် (Power Bank)၊ ရေဒီယိုနှင့် ငွေသားတို့ ပါဝင်သည်။
သောက်ရေအတွက် လူတစ်ဦးလျှင် တစ်ရက် သုံးလီတာနှုန်းဖြင့် သုံးရက်စာအတွက် အနည်းဆုံး ကိုးလီတာ ပြင်ဆင်ထားရန် အကြံပြုထားပြီး ချက်ပြုတ်ခြင်းနှင့် သန့်ရှင်းရေးအတွက် လိုအပ်မည့်ရေကိုလည်း သီးခြားထည့်သွင်းစဉ်းစားရန် လိုအပ်ကြောင်း ဖော်ပြထားသည်။
ထို့ပြင် အရေးပေါ်သုံးပစ္စည်းများကို တစ်ကြိမ်တည်း အမြောက်အမြား ဝယ်ယူရန်မလိုဘဲ ပုံမှန်ဈေးဝယ်သည့်အခါ ရေရှည်ထားသိုနိုင်သော အစားအစာနှင့် နေ့စဉ်သုံးပစ္စည်းများကို တဖြည်းဖြည်း စုဆောင်းထားနိုင်ကြောင်းလည်း အကြံပြုထားသည်။
စစ်ပွဲဖြစ်ပွားမည့် သတိပေးချက်မဟုတ်ဟု ရှင်းလင်းဂျပန်နှင့် ဗြိတိန်နိုင်ငံတို့၏ အရေးပေါ်ကြိုတင်ပြင်ဆင်ရေးအစီအမံများ ထွက်ပေါ်လာပြီးနောက် အွန်လိုင်းပေါ်တွင် တတိယကမ္ဘာစစ် ဖြစ်ပွားလာနိုင်ခြင်းနှင့် ဆိုက်ဘာတိုက်ခိုက်မှုများကြောင့် အခြေခံအဆောက်အအုံများ ပျက်စီးနိုင်ခြင်းတို့နှင့် ပတ်သက်၍ ခန့်မှန်းပြောဆိုမှုများ ပျံ့နှံ့လာခဲ့သည်။
သို့သော် အစိုးရများ၏ လမ်းညွှန်ချက်များတွင် အဓိကထားဖော်ပြထားသည်မှာ စစ်ပွဲတစ်ခု သို့မဟုတ် သတ်မှတ်ထားသော တိုက်ခိုက်မှုတစ်ခု မကြာမီဖြစ်ပွားတော့မည်ဟု ကြိုတင်သတိပေးခြင်းမဟုတ်ဘဲ မည်သည့်အကြောင်းကြောင့်ဖြစ်စေ အခြေခံဝန်ဆောင်မှုများ ပြတ်တောက်သွားပါက ပြည်သူများအနေဖြင့် အချိန်ကာလတစ်ခုအထိ လိုအပ်သည့်ပစ္စည်းများဖြင့် ကိုယ့်အားကိုယ်ကိုး နေထိုင်နိုင်ရန် ကြိုတင်ပြင်ဆင်ထားရေးဖြစ်ကြောင်း ဖော်ပြထားသည်။
Telegram – t.me/positiveanglenews
#PAN