(အားကစား) မေ ၁၈
မြန်မာနိုင်ငံက အိမ်ရှင်အဖြစ် လက်ခံကျင်းပနေသည့် (၂၀)ကြိမ်မြောက် အရှေ့တောင်အာရှ ကာယဗလနှင့် ကာယကြံ့ခိုင်မှု အားကစားပြိုင်ပွဲတွင် မြန်မာအသင်းအနေဖြင့် ရွှေတံဆိပ် ၁၀ ခု၊ ငွေတံဆိပ် ၆ ခုနှင့် ကြေးတံဆိပ် ၉ ခု၊ စုစုပေါင်း ဆုတံဆိပ် ၂၅ ခု ရရှိထားပြီး နိုင်ငံအလိုက် ပထမနေရာတွင် ရပ်တည်နေကြောင်း သိရသည်။
Men’s Team Championship (အမျိုးသားအသင်းလိုက် တံခွန်စိုက်ဆု)ကို မြန်မာက ပထမ၊ ဗီယက်နမ်က ဒုတိယနှင့် ထိုင်းက တတိယ ရရှိခဲ့ပြီး Women’s Team Championship (အမျိုးသမီးအသင်းလိုက် တံခွန်စိုက်ဆု)ကို ဗီယက်နမ်က ပထမ၊ မြန်မာက ဒုတိယနှင့် ထိုင်းက တတိယ ရရှိပြီးအလုံးစုံချန်ပီယံဆု Overall Championship Mr. South East Asia 2026 (ကာယဗလမောင်ဆု)ကိုလည်း မြန်မာနိုင်ငံမှ ချမ်းမြေ့ထွန်းက ရရှိခဲ့ကြောင်း သိရှိရသည်။
အဆိုပါပြိုင်ပွဲကို မေ ၁၄ ရက်မှ ၁၈ ရက်အထိ ရန်ကုန်တိုင်းဒေသကြီး၊ မရမ်းကုန်းမြို့နယ်၊ ကွန်ဗင်းရှင်းစင်တာ (MCC) ခန်းမ၌ ကျင်းပနေခြင်းဖြစ်ကြောင်း သိရပြီး ယမန်နေ့က ကျင်းပခဲ့သည့် ပြိုင်ပွဲအမျိုးအစား ၁၂ မျိုးတွင် ပါဝင်ယှဉ်ပြိုင်ရာ၌ မြန်မာက ရွှေ ၅ ခု၊ ဗီယက်နမ်က ရွှေ ၅ ခုနှင့် ထိုင်းက ရွှေ ၂ ခု အသီးသီး ရရှိထားကြောင်း သိရသည်။
(၂၀)ကြိမ်မြောက် အရှေ့တောင်အာရှ ကာယဗလနှင့် ကာယကြံ့ခိုင်မှု အားကစားပြိုင်ပွဲတွင် ပြိုင်ပွဲအမျိုးအစား ၂၂ မျိုး ပါဝင်ပြီး အိမ်ရှင်မြန်မာအပါအဝင် နိုင်ငံ ၈ နိုင်ငံမှ အားကစားသမားများ ပါဝင်ယှဉ်ပြိုင်နေကြောင်းလည်း သိရသည်။