(နိုင်ငံတကာ) ဧပြီ ၁၅
အမေရိကန်နှင့် အီရန်တို့အကြား ရရှိခဲ့သည့် နှစ်ပတ်ကြာ အပစ်အခတ်ရပ်စဲရေး သဘောတူညီချက်အပေါ် အစ္စရေးပြည်သူအများစုက မကျေမနပ်ဖြစ်နေကြပြီး ဝန်ကြီးချုပ် ဘင်ဂျမင် နေတန်ယာဟုမှာ ပြင်း ထန်သော နိုင်ငံရေးဝေဖန်မှုများနှင့် ရင်ဆိုင်နေရသည်။
အစ္စရေး အမျိုးသားလုံခြုံရေးလေ့လာမှုတက္ကသိုလ် (INSS) က ထုတ်ပြန်သည့် နောက်ဆုံးစစ်တမ်းအရ အစ္စရေးပြည်သူ ၆၁ ရာခိုင်နှုန်းက ယခုအပစ်အခတ်ရပ်စဲရေးကို ကန့်ကွက်ကြပြီး၊ ၇၃ ရာခိုင်နှုန်းက လာမည့်တစ်နှစ်အတွင်း အီရန်နှင့် တိုက်ပွဲများ ပြန်လည်စတင်လာမည်ဟု ယုံကြည်နေကြသည်။ ဝန်ကြီးချုပ် နေတန်ယာဟုသည် အီရန်အစိုးရကို အပြီးသတ်ဖြိုလှဲပစ်မည်ဟု ကတိပေးကာ စစ်ပွဲစတင်ခဲ့သော်လည်း၊ လက်ရှိတွင် အီရန်မှာ ပြိုလဲမသွားသည့်အပြင် ၎င်း၏ မဟာ ဗျူဟာမြောက် အင်အားမှာလည်း ဆက်လက်ရှိနေဆဲဖြစ်သည်။
အတိုက်အခံခေါင်းဆောင် ယာအီ လက်ပစ်(Yair Lapid)က နေတန်ယာဟုသည် အစ္စရေးနိုင်ငံကို အမေရိကန်၏ ဖုန်းတစ်ချက်ဆက်ရုံဖြင့် အမိန့်ပေးခံနေရသည့် “လက်အောက်ခံနိုင်ငံ” အဖြစ် ပြောင်းလဲပစ် လိုက်ပြီဟု ဝေဖန်ခဲ့သည်။ အလားတူ လက်ယာယိမ်းခေါင်းဆောင် ယာအီ ဂိုလန် ကလည်း နေတန်ယာဟုသည် “သမိုင်းဝင်အောင်ပွဲ” ရမည်ဟု လိမ်ညာခဲ့ပြီး လက်တွေ့တွင် အဆိုးရွားဆုံး မဟာဗျူဟာမြောက် ကျရှုံးမှုကိုသာ ရရှိခဲ့သည်ဟု ဆိုသည်။
လက်ရှိတွင် အစ္စရေးသည် အပစ်အခတ်ရပ်စဲရေးတွင် အကျုံးမဝင်ဟုဆိုကာ လက်ဘနွန်ကို ဆက်လက်တိုက်ခိုက်နေသော်လည်း၊ ယင်းမှာ အမေရိကန်နှင့် သဘောတူညီချက်အပေါ် လူထုအာရုံလွဲစေရန် ကြိုးပမ်းခြင်းသာဖြစ်သည်ဟု လေ့လာသူများက ရှုမြင်ကြသည်။ နေတန်ယာဟု၏ လက်ထောက်ဟောင်း တစ်ဦးကမူ အစ္စရေးသည် ၎င်း၏ နိုင်ငံခြားရေးမူဝါဒကို အမေရိကန်လက်ထဲ အပ်နှံထားပြီးဖြစ်ရာ သမ္မတထရန့်၏ ခွင့်ပြုချက်မပါဘဲ အီရန်ကို တိုက်ခိုက်နိုင်စွမ်း မရှိတော့ကြောင်း ထောက်ပြခဲ့သည်။
အောက်တိုဘာ ၇ ရက် ဖြစ်စဉ်အတွက် တာဝန်ယူမှု ရှောင်လွှဲနေသည်ဟု စွပ်စွဲခံထားရသည့် နေတန်ယာဟုအတွက် ယခုစစ်ပွဲရလဒ်မှာ ၎င်း၏ နိုင်ငံရေးအနာဂတ်ကို ပိုမိုအကျပ်ရိုက်စေမည့် ဒုတိယမြောက် ကပ်ဘေးတစ်ခု ဖြစ်လာနေပါသည်။
#Netanyahu #IsraelNews #IranConflict #CeasefireBacklash #MiddleEastPolitics #BreakingNews #PositiveAngleNews
Telegram»…
https://t.me/positiveanglenews
#PAN