(နိုင်ငံတကာ) စက်တင်ဘာ ၇
အိန္ဒိယနိုင်ငံ နယူးဒေလီမြို့ အနောက်တောင်ပိုင်း Satya Niketan ဧရိယာတွင် နှစ်ပေါင်း ၅၀ ခန့် သက်တမ်းရှိသည့် အထပ်မြင့်အဆောက်အအုံတစ်လုံး ပြိုကျခဲ့ရာ အပျက်အစီးများကြားမှ လူ ၁၁ ဦးကို ကယ်ဆယ်နိုင်ခဲ့ပြီး သေဆုံးသူ ၆ ဦးအထိ မြင့်တက်လာကြောင်း တာဝန်ရှိသူများက တနင်္လာနေ့တွင် ပြောကြားသည်။
ညလုံးပေါက် ကယ်ဆယ်ရေးလုပ်ငန်းများ ဆောင်ရွက်နေစဉ် လူတစ်ဦးကို ထပ်မံကယ်ဆယ်နိုင်ခဲ့သော်လည်း ဆေးရုံသို့ရောက်ရှိချိန်တွင် သေဆုံးနေပြီဖြစ်သဖြင့် သေဆုံးသူဦးရေမှာ ၆ ဦးအထိ မြင့်တက်လာကြောင်း အနောက်တောင်ဒေသ ရဲတပ်ဖွဲ့ ဒုတိယရဲမှူး Amit Goel က ပြောသည်။
ဒေလီတက္ကသိုလ် South Campus အနီးတွင် ယောက်ျားလေးများအတွက် အခပေးနေထိုင်ခွင့် (PG) အဆောင်အဖြစ် အသုံးပြုထားသည့် အဆိုပါအဆောက်အအုံသည် တနင်္ဂနွေနေ့ မွန်းလွဲ ၁ နာရီခွဲခန့်တွင် ပြုပြင်ရေးလုပ်ငန်းများ ဆောင်ရွက်နေစဉ် ပြိုကျခဲ့ခြင်းဖြစ်ပြီး ကယ်ဆယ်ရေးလုပ်ငန်းများကို ညလုံးပေါက် ဆက်လက်လုပ်ဆောင်ခဲ့သည်။
ကယ်ဆယ်ရေးလုပ်ငန်းတွင် ဒေလီရဲတပ်ဖွဲ့၊ Delhi Fire Service၊ National Disaster Response Force (NDRF) နှင့် Delhi Disaster Management Authority (DDMA) တို့မှ အဖွဲ့များ ပါဝင်ခဲ့ကြသည်။ အပျက်အစီးများအတွင်း လူများ ပိတ်မိကျန်ရှိနေမည်ကို စိုးရိမ်သဖြင့် အရေးပေါ်ကယ်ဆယ်ရေးဝန်ထမ်းများက ရှာဖွေကယ်ဆယ်မှုများကို ဆက်လက်လုပ်ဆောင်ခဲ့ကြသည်။
မြေအောက်ခန်းအပါအဝင် ငါးထပ်အဆောက်အအုံဖြစ်ပြီး သက်တမ်းမှာ နှစ်ပေါင်း ၅၀ ခန့်ရှိသည်။ တက္ကသိုလ်ဝန်းကျင်ရှိ ကျောင်းသားအဆောင်များနှင့် စားသောက်ဆိုင်များ စုဝေးတည်ရှိရာ လူနေထူထပ်သည့် Satya Niketan ဧရိယာတွင် တည်ရှိပြီး အဆောက်အအုံပြိုကျချိန်တွင် မြေအောက်ခန်း၌ ပြုပြင်ရေးလုပ်ငန်းများ ဆောင်ရွက်နေခဲ့ကြောင်း သိရသည်။
ရက်အတော်ကြာ မိုးရွာသွန်းမှုကြောင့် မြေအောက်ခန်းတွင် ရေများစုဝေးနေခဲ့ပြီး အဆောက်အအုံ၏ အုတ်မြစ်ကို အားနည်းစေခဲ့နိုင်သည်ဟု ဒေသခံများက ပြောကြားခဲ့သော်လည်း အဆောက်အအုံပြိုကျရသည့် အတိအကျအကြောင်းရင်းကို ယခုအချိန်အထိ သတ်မှတ်နိုင်ခြင်း မရှိသေးကြောင်း သိရသည်။
ရဲတပ်ဖွဲ့က အဆောက်အအုံပိုင်ရှင်နှင့် အခြားသူများကို အမှုဖွင့်ထားပြီး ဖြစ်စဉ်နှင့် ဆက်နွှယ်သည်ဟု ယူဆရသူများကို ခြေရာခံရှာဖွေရန် ကြိုးပမ်းမှုများ ဆက်လက်လုပ်ဆောင်နေကြောင်း DCP Goel က ပြောသည်။
အဆိုပါအဆောက်အအုံ ပြိုကျမှုကြောင့် အကြီးစားကယ်ဆယ်ရေးလုပ်ငန်းတစ်ရပ် စတင်ဆောင်ရွက်ခဲ့ရပြီး ကနဦးတုံ့ပြန်မှုတွင် အရေးပေါ်ကယ်ဆယ်ရေးဝန်ထမ်း ၂၀၀ ခန့် ပါဝင်ခဲ့သည်။ ထိုဧရိယာရှိ လမ်းကျဉ်းများနှင့် လူနေထူထပ်မှုများကြောင့် အပျက်အစီးများကို ရှင်းလင်းကာ ပိတ်မိနေသူများထံ ရောက်ရှိရန် ကယ်ဆယ်ရေးအဖွဲ့များအတွက် အခက်အခဲများလည်း ရှိခဲ့ကြောင်း သိရသည်။
ဖြစ်စဉ်အပြီးတွင် ဒေလီတက္ကသိုလ် South Campus ရှိ ကျောင်းသားများအတွက် အဓိကလူနေရာနေရာတစ်ခုဖြစ်သည့် Satya Niketan တွင် ဖွင့်လှစ်ထားသည့် PG အဆောင်များနှင့် အထပ်မြင့်အဆောက်အအုံများ၏ လုံခြုံရေးနှင့်ပတ်သက်၍ စိုးရိမ်မှုများ မြင့်တက်လာခဲ့သည်။ အဆိုပါဒေသတွင် နှစ်များအတွင်း လူနေအိမ်အဆောက်အအုံ အများအပြားကို ကျောင်းသားများနေထိုင်ရန် အဆောင်များအဖြစ် ပြောင်းလဲအသုံးပြုလာခဲ့ကြောင်း သိရသည်။
ဒေလီဝန်ကြီးချုပ် Rekha Gupta သည် တနင်္လာနေ့တွင် Satya Niketan သို့ ရောက်ရှိလာပြီး နှစ်ပေါင်းများစွာ သက်တမ်းရှိသည့် အထပ်မြင့်အဆောက်အအုံတစ်လုံး ပြိုကျကာ လူ ၆ ဦးသေဆုံးပြီး အများအပြား ဒဏ်ရာရရှိခဲ့သည့် ဖြစ်စဉ်အတွက် ဒုတိယနေ့မြောက် ရှာဖွေကယ်ဆယ်ရေးလုပ်ငန်းများကို ကြီးကြပ်ခဲ့သည်။
တနင်္ဂနွေနေ့ကလည်း အခင်းဖြစ်နေရာသို့ သွားရောက်ခဲ့သည့် ဝန်ကြီးချုပ် Gupta သည် ယခုတစ်ကြိမ်တွင် ဒေလီအစိုးရနှင့် Municipal Corporation of Delhi (MCD) မှ အကြီးတန်းတာဝန်ရှိသူများနှင့်အတူ အခင်းဖြစ်နေရာ၌ စစ်ဆေးကြည့်ရှုခဲ့သည်။
ထို့အပြင် ဝန်ကြီးချုပ်သည် AIIMS ဆေးရုံတွင် ဒဏ်ရာရရှိသူများနှင့် တွေ့ဆုံခဲ့ပြီး ဖြစ်စဉ်တွင် အပြစ်ရှိသူများကို တင်းကျပ်စွာ အရေးယူမည်ဟု ကတိပြုခဲ့သည်။
ဒေလီဝန်ကြီးချုပ်ရုံး၏ ပြောကြားချက်အရ အစိုးရအနေဖြင့် ဒဏ်ရာရရှိခဲ့သည့် ကျောင်းသားများ၏ မိသားစုများနှင့်လည်း ဆက်သွယ်ထားပြီး လိုအပ်သည့် အထောက်အပံ့များ ပေးအပ်လျက်ရှိကြောင်း သိရသည်။