(နိုင်ငံတကာ) ဇူလိုင် ၂၅
စင်ကာပူနိုင်ငံမှ အမေရိကန်သို့ တင်ပို့သည့် ကုန်ပစ္စည်းများအပေါ် သွင်းကုန်အခွန် ၁၂.၅ ရာခိုင်နှုန်း ထပ်မံချမှတ်လိုက်ခြင်းနှင့်ပတ်သက်၍ စင်ကာပူအစိုးရက တရားမဝင်လုပ်သားခိုင်းစေမှုများကို ထိရောက်စွာ အရေးယူဆောင်ရွက်ထားသည့် မှတ်တမ်းကောင်းရှိကြောင်း တုံ့ပြန်ပြောကြားခဲ့သည်။
အမေရိကန် ကုန်သွယ်ရေးကိုယ်စားလှယ်ရုံး (USTR) သည် မေလတွင် စတင်ခဲ့သည့် အတင်းအကျပ်လုပ်အားဖြင့် ထုတ်လုပ်ထားသော ကုန်ပစ္စည်းများနှင့်ပတ်သက်သည့် စုံစမ်းစစ်ဆေးမှုကို ဇူလိုင်လတွင် အပြီးသတ်ခဲ့ပြီး၊ စင်ကာပူနိုင်ငံကို အဆိုပါကုန်ပစ္စည်းများ တင်သွင်းမှုအား ထိရောက်စွာ တားမြစ်အရေးယူနိုင်ခြင်း မရှိသည့် စီးပွားရေးဒေသ ၆၀ အနက် တစ်ခုအဖြစ် ထည့်သွင်းဖော်ပြခဲ့သည်။
ယင်းနှင့်ပတ်သက်၍ စင်ကာပူ ကုန်သွယ်ရေးနှင့် စက်မှုဝန်ကြီးဌာန (MTI) က အတင်းအကျပ်လုပ်အား အသုံးပြုမှုကို လုံးဝလက်မခံကြောင်း၊ နိုင်ငံအတွင်း တရားမဝင်လုပ်သားခိုင်းစေမှုများကို အရေးယူနိုင်ရန် ပြည့်စုံသည့် ဥပဒေစိုးမိုးရေးမူဘောင်နှင့် အောင်မြင်သည့် အရေးယူဆောင်ရွက်မှု မှတ်တမ်းများရှိကြောင်း ထုတ်ပြန်ပြောကြားခဲ့သည်။
ထို့ပြင် အတင်းအကျပ်လုပ်အား ပြဿနာသည် နိုင်ငံတကာ ထောက်ပံ့ရေးကွင်းဆက်များနှင့် ဆက်စပ်သည့် နယ်စပ်ဖြတ်ကျော် ပြဿနာဖြစ်သဖြင့် နိုင်ငံတကာပူးပေါင်းဆောင်ရွက်မှုဖြင့်သာ ထိရောက်စွာ ကိုင်တွယ်ဖြေရှင်းနိုင်မည်ဖြစ်ကြောင်းနှင့် ယင်းပြဿနာကို ဖြေရှင်းနိုင်ရေးအတွက် နိုင်ငံတကာအသိုက်အဝန်းနှင့် ဆက်လက်ပူးပေါင်းဆောင်ရွက်သွားမည်ဖြစ်ကြောင်း MTI က ပြောကြားခဲ့သည်။
MTI ၏ အဆိုအရ အမေရိကန်က အသစ်ချမှတ်လိုက်သည့် သွင်းကုန်အခွန်သည် စင်ကာပူမှ အမေရိကန်သို့ တင်ပို့သည့် ပြည်တွင်းထုတ်ကုန်များ၏ သုံးပုံတစ်ပုံခန့်အပေါ် သက်ရောက်မှုရှိမည်ဖြစ်သည်။
အဆိုပါကိစ္စနှင့်ပတ်သက်၍ စင်ကာပူအစိုးရသည် USTR နှင့် ဆက်လက်ဆွေးနွေးကာ ဖြေရှင်းနိုင်မည့် နည်းလမ်းများကို ရှာဖွေသွားမည်ဖြစ်ပြီး၊ သွင်းကုန်အခွန်ကောက်ခံမည့် အသေးစိတ်အစီအစဉ်များကိုလည်း အဆင်သင့်ဖြစ်သည်နှင့် ထုတ်ပြန်အသိပေးသွားမည်ဖြစ်ကြောင်း သိရသည်။