(ပြည်တွင်း) စက်တင်ဘာ ၃၀
ပြည့်စုံမှန်ကန်တဲ့ မဲဆန္ဒရှင်စာရင်းရရှိဖို့အတွက် မဲဆန္ဒရှင်ပြည်သူတွေအနေနဲ့ အိမ်ထောင်စုတစ်စုကို အနည်းဆုံးတစ်ဦး မပျက်မကွက် လာရောက်ကြည့်ရှုကြဖို့ ပြည်ထောင်စုရွေးကောက်ပွဲကော်မရှင် မေတ္တာရပ်ခံထားသည်။
ပြည်ထောင်စုရွေးကောက်ပွဲကော်မရှင်ဟာ ၂၀၂၅ ခုနှစ်၊ ဒီဇင်ဘာလ ၂၈ ရက်မှာ စတင်ကျင်းပမယ့် အထွေထွေရွေးကောက်ပွဲအတွက် မဲစာရင်းတွေကို ဒီနေ့ စက်တင်ဘာ ၃၀ ရက်နေ့ကနေ
အောက်တိုဘာ ၁၃ ရက်နေ့အထိ ၁၄ ရက်ကြာ သက်ဆိုင်ရာ ရပ်ကွက်/ ကျေးရွာအုပ်စုကော်မရှင်အဖွဲ့ခွဲရုံးတွေနဲ့ ကျေးရွာအုပ်စုအတွင်းက ကျေးရွာတွေမှာ ပထမအကြိမ်အဖြစ် ကပ်ထားကြေညာထားတာဖြစ်ပါတယ်။
အကြောင်းအမျိုးမျိုးကြောင့် ရပ်ကွက်နဲ့ကျေးရွာအုပ်စုတွေမှာ ကပ်ထားကြေညာနိုင်ခြင်း မရှိရင် သက်ဆိုင်ရာမြို့နယ်ကော်မရှင်အဖွဲ့ခွဲရုံးတွေမှာ မဲစာရင်းကြည့်ရှုနိုင်ရေးဆောင်ရွက်ထားမယ်လို့ ရွေးကောက်ပွဲကော်မရှင်က ကြေညာပါတယ်။
မဲဆန္ဒရှင်စာရင်းတွေ ကပ်ထားကြေညာချိန်မှာ မဲဆန္ဒရှင်တွေ က မဲစာရင်း လာရောက်ကြည့်ရှုမှသာ ပြည့်စုံမှန်ကန်တဲ့ မဲစာရင်း ရရှိနိုင်မှာတယ်လို့လည်း UEC ကဆိုပါတယ်။
မဲဆန္ဒရှင်တွေအနေနဲ့ မဲစာရင်းကို လာရောက်ကြည့်ရှုပြီး မိမိအမည်မဲစာရင်းမှာ မပါဝင်ပါက ပုံစံ (၃) နဲ့ မဲစာရင်းမှာ အမည်ထည့်သွင်းပေးဖို့ တောင်းဆိုခြင်း၊ မပါဝင်သင့်သူတွေပါဝင်နေပါက ပုံစံ (၄) နဲ့ ကန့်ကွက်ခြင်း၊ မဲစာရင်းပါအချက်အလက်တွေ မှားယွင်းနေပါက ပုံစံ (၄-ဂ) နဲ့ ပြင်ဆင်လွှာတင်သွင်းခြင်းတို့ကို ဆောင်ရွက်စေလိုတယ်လို့လည်း ပြောပါတယ်။
လိုအပ်တဲ့ပုံစံတွေကိုလည်း ရပ်ကွက်/ကျေးရွာအုပ်စုကော်မရှင်အဖွဲ့ခွဲရုံးတွေမှာ အခမဲ့ ရယူနိုင်ပြီး ခုလို ဖြည့်စွက်၊ ပယ်ဖျက်၊ ပြင်ဆင်တာတွေ ဆောင်ရွက်ပြီးပါက အထွေထွေရွေးကောက်ပွဲအတွက် မဲဆန္ဒရှင်စာရင်းကို ၂၀၂၅ ခုနှစ်၊ နိုဝင်ဘာလအတွင်းမှာ နောက်ဆုံးအကြိမ်အဖြစ် ထပ်မံကပ်ထားကြေညာမှာဖြစ်တယ်လို့ UEC ကထုတ်ပြန်ပါတယ်။