အင်ဒိုနီးရှား တောမီးမီးခိုးမြူ လျှော့ချရန် ရေခဲခြောက် ၂.၄ တန် အသုံးပြု

(နိုင်ငံတကာ) အောက်တိုဘာ ၁၉

အင်ဒိုနီးရှားနိုင်ငံ၊ တောင်ဆူမားတြားပြည်နယ်တွင် တောမီးကြောင့် ဖြစ်ပေါ်လာသည့် မီးခိုးမြူများကို လျှော့ချရန် သဘာဝဘေးအန္တရာယ် လျှော့ချရေးအေဂျင်စီ (BNPB) က အောက်တိုဘာ ၁၅ ရက်နှင့် ၁၆ ရက်တို့တွင် ရာသီဥတု ပြုပြင်ပြောင်းလဲရေးလုပ်ငန်း ဆောင်ရွက်ခဲ့ရာ ရေခဲခြောက် ၂.၄ တန် အသုံးပြုခဲ့ကြောင်း သိရသည်။

BNPB ၏ သဘာဝဘေးအန္တရာယ်ဆိုင်ရာ အချက်အလက်၊ သတင်းအချက်အလက်နှင့် ဆက်သွယ်ရေးဗဟိုဌာန ယာယီအကြီးအကဲ ဘာတန် ပန်ဂျိုင်တန် (Berton Panjaitan) က အဆိုပါလုပ်ငန်းကို ဆောင်ရွက်ခဲ့ခြင်းဖြစ်ကြောင်း ပြောကြားသည်။

ပါလမ်ဘန်းမြို့ရှိ ဆူလ်တန် မာမွတ် ဘာဒါရွတ်ဒင် (၂) အပြည်ပြည်ဆိုင်ရာလေဆိပ်တွင် လေကြောင်းခရီးစဉ်များ အနှောင့်အယှက်ဖြစ်ပေါ်ခဲ့ခြင်းနှင့် မီးခိုးမြူများကြောင့် ကျန်းမာရေးထိခိုက်မှုများ ဖြစ်ပေါ်ခဲ့ခြင်းတို့အပြီး ယခုလုပ်ငန်းကို ဆောင်ရွက်ခဲ့ခြင်းဖြစ်သည်။BNPB လေယာဉ်များသည် လမ်ပွန်းပြည်နယ်၊ ဘန်ဒါလမ်ပွန်းမြို့ရှိ ရာဒင် အင်တန် (၂) လေဆိပ်မှ ထွက်ခွာခဲ့ပြီး စုစုပေါင်း ပျံသန်းချိန် ၇ နာရီနှင့် ၃ မိနစ်ကြာမြင့်သည့် ပျံသန်းမှုသုံးကြိမ် ပြုလုပ်ခဲ့သည်။

ပထမအကြိမ် နံနက်ပိုင်းပျံသန်းမှုတွင် ပါလမ်ဘန်းလေဆိပ်တစ်ဝိုက်၌ ရေခဲခြောက် ၈၀၀ ကီလိုဂရမ် ကြဲချခဲ့သည်။

မိုးလေဝသ၊ ရာသီဥတုနှင့် ဘူမိရူပဗေဒအေဂျင်စီ (BMKG) ၏ အချက်အလက်များအရ မြင်ကွင်းအကွာအဝေးသည် မွန်းလွဲ ၁ နာရီတွင် မီတာ ၁,၀၀၀ ရှိရာမှ နာရီအနည်းငယ်အကြာတွင် မီတာ ၁,၅၀၀ မှ ၂,၀၀၀ အကြားသို့ တိုးတက်လာခဲ့သည်။

ဘာတန်က ရေခဲခြောက်ကြဲချခြင်းသည် ပူနွေးသောလေထုက အေးမြသောလေထုအပေါ်တွင် တည်ရှိနေသည့် အပူချိန်ပြောင်းပြန်အလွှာ (Inversion Layer) ၏ တည်ငြိမ်မှုကို လျော့နည်းစေရန် ရည်ရွယ်ကြောင်း ပြောကြားသည်။

ယင်းအလွှာ၏ တည်ငြိမ်မှု လျော့နည်းသွားပါက မြေပြင်အနီးတွင် ပိတ်မိနေသည့် မီးခိုးများ ပျံ့နှံ့သွားစေပြီး မြင်ကွင်းအကွာအဝေး ပိုမိုကောင်းမွန်လာစေရန် အထောက်အကူပြုနိုင်ကြောင်း ၎င်းက ရှင်းပြသည်။

ဒုတိယနှင့် တတိယအကြိမ် ပျံသန်းမှုများ ပြုလုပ်ပြီးနောက် မြင်ကွင်းအကွာအဝေးသည် မီတာ ၂,၈၀၀ အထိ ရောက်ရှိလာခဲ့ပြီး နောက်ပိုင်းတွင် မီတာ ၃,၀၀၀ အထိ တိုးတက်လာခဲ့သည်။

ထိုအခြေအနေကို ည ၈ နာရီခွဲအထိ ထိန်းထားနိုင်ခဲ့ကြောင်း သိရသည်။

မြင်ကွင်းအကွာအဝေး ပိုမိုကောင်းမွန်လာခြင်းသည် ဒေသတွင်း လေကြောင်းခရီးစဉ်များ ဘေးကင်းချောမွေ့စွာ ပြေးဆွဲနိုင်ရေးအတွက် အထောက်အကူပြုသည်။

သို့သော် မြင်ကွင်းအကွာအဝေး တိုးတက်လာမှုအပေါ် ရေခဲခြောက်ကြဲချခြင်းက မည်မျှအထိ အထောက်အကူပြုခဲ့သည်ကို အခြားမိုးလေဝသဆိုင်ရာ အကြောင်းရင်းများနှင့် ခွဲခြားသိရှိနိုင်ရန် ထပ်မံလေ့လာသုံးသပ်မှုများနှင့် သုတေသနများ လိုအပ်ကြောင်း ဘာတန်က ပြောကြားခဲ့သည်။