(ပညာရေး) ဩဂုတ် ၂၈
၂၀၂၇ ခုနှစ်တွင် ကျင်းပမည့် တက္ကသိုလ်ဝင်စာမေးပွဲ ဖြေဆိုမည့် ကျောင်းသား၊ ကျောင်းသူများအတွက် စာမေးပွဲဖြေဆိုခွင့်လျှောက်လွှာများနှင့် စာမေးပွဲဝင်ကြေး ငွေသွင်းတံဆိပ်ခေါင်းများကို ၂၀၂၆ ခုနှစ် စက်တင်ဘာ ၁ ရက်မှစတင်၍ ရောင်းချပေးမည်ဖြစ်ကြောင်း မြန်မာနိုင်ငံစာစစ်ဦးစီးဌာနက ဩဂုတ် ၂၈ ရက်တွင် သတင်းထုတ်ပြန်သည်။
စာမေးပွဲဖြေဆိုခွင့် လျှောက်လွှာတစ်စောင်လျှင် ၅၀၀ ကျပ် ကျသင့်မည်ဖြစ်ပြီး စာမေးပွဲဝင်ကြေးအတွက် ၂,၀၀၀ ကျပ်တန် ပညာရေးဝန်ကြီးဌာန ငွေသွင်းတံဆိပ်ခေါင်း သတ်မှတ်ထားသည်။
စာမေးပွဲဖြေဆိုခွင့် လျှောက်လွှာတင်သွင်းရာတွင် ဖြေဆိုမည့် ဘာသာတွဲအလိုက် အစိမ်းရောင်နှင့် ပန်းရောင် လျှောက်လွှာကတ်ပြားပုံစံ နှစ်မျိုးခွဲခြားသတ်မှတ်ထားကြောင်း သိရသည်။
ပြင်ပဖြေဆိုရန် လျှောက်ထားသူများအနေဖြင့် စာမေးပွဲဝင်ကြေး ၂,၀၀၀ ကျပ်တန် ငွေသွင်းတံဆိပ်ခေါင်းကို သက်ဆိုင်ရာ မြို့နယ်ပညာရေးမှူးရုံး တွင် ဝယ်ယူရမည်ဖြစ်ပြီး ဝင်ခွင့်လျှောက်လွှာ၏ လက်ဝဲဘက်ထိပ်ပိုင်းတွင် ကပ်ရမည်ဖြစ်သည်။
ထို့နောက် မိမိတို့ အမှန်တကယ်နေထိုင်သည့် မြို့နယ် ၏ ပညာရေးမှူးရုံးတွင် ၂၀၂၆ ခုနှစ် စက်တင်ဘာ ၁ ရက်မှ ၃၀ ရက်အတွင်း လျှောက်လွှာများကို တင်သွင်းရမည်ဖြစ်ကြောင်း သိရသည်။
အခြေခံပညာအထက်တန်းကျောင်းများ၊ ကျောင်းခွဲများ၊ တွဲဖက်ကျောင်းများ၊ တွဲဖက်ဘုန်းတော်ကြီးသင်ပညာရေးကျောင်းများနှင့် ကိုယ်ပိုင်အထက်တန်းကျောင်းများမှ စာမေးပွဲဖြေဆိုမည့် ကျောင်းသား၊ ကျောင်းသူများအတွက် စာမေးပွဲဝင်ကြေး ၂,၀၀၀ ကျပ်တန် ငွေသွင်းတံဆိပ်ခေါင်းများကို ကျောင်းအုပ်ကြီးများက ဝယ်ယူ၍ လျှောက်လွှာတစ်စောင်ချင်းစီတွင် ကပ်ပေးရမည်ဖြစ်သည်။
ယင်းလျှောက်လွှာများကို စုပေါင်း၍ မြို့နယ်ပညာရေးမှူးရုံးမှတစ်ဆင့် မြန်မာနိုင်ငံစာစစ်ဦးစီးဌာနသို့ စက်တင်ဘာ ၁ ရက်မှ ၃၀ ရက်အတွင်း သတ်မှတ်ရက်အမီ တင်သွင်းရမည်ဖြစ်သည်။
သတ်မှတ်ထားသည့် ရက်အတွင်း လျှောက်လွှာများကို အချိန်မီပေးပို့ခြင်းမရှိပါက စာမေးပွဲဖြေဆိုခွင့် ရရှိမည်မဟုတ်ကြောင်း မြန်မာနိုင်ငံစာစစ်ဦးစီးဌာနက သတိပေးထားသည်။
ထို့အပြင် စာဖြေသူတင်သွင်းသည့် စာမေးပွဲဖြေဆိုခွင့်လျှောက်လွှာနှင့် ကတ်ပြားတွင် ဖော်ပြထားသည့် ဘာသာတွဲမှအပ အခြားဘာသာတွဲသို့ ပြောင်းလဲဖြေဆိုခွင့် ပြုမည်မဟုတ် ကြောင်း သိရသည်။
ထို့ကြောင့် ကျောင်းသား၊ ကျောင်းသူများအနေဖြင့် မိမိဖြေဆိုမည့် ဘာသာတွဲနှင့် ကိုက်ညီသည့် လျှောက်လွှာပုံစံ၊ ကတ်ပြားအရောင်နှင့် ဖြည့်စွက်ထားသည့် အချက်အလက်များ မှန်ကန်မှုရှိ၊ မရှိကို သေချာစွာ စစ်ဆေးပြီး တင်သွင်းကြရန် လိုအပ်ကြောင်း အသိပေးထားသည်။
လျှောက်လွှာပုံစံများနှင့် ငွေသွင်းတံဆိပ်ခေါင်းများကို မြန်မာနိုင်ငံစာစစ်ဦးစီးဌာန (ရုံးချုပ်)၊ ရုံးအမှတ် (၅)၊ နေပြည်တော် နှင့် မြန်မာနိုင်ငံစာစစ်ဦးစီးဌာန ရန်ကုန်ရုံးခွဲ၊ ပါရမီလမ်း၊ (၁၂) ရပ်ကွက်၊ လှိုင်မြို့နယ်၊ ရန်ကုန်မြို့ တို့တွင် လာရောက်ဝယ်ယူနိုင်ကြောင်း သိရသည်။
#PAN