(နိုင်ငံတကာ) ဩဂုတ် ၁၈
အမေရိကန်နိုင်ငံ Las Vegas မြို့တွင် ၁၉၉၆ ခုနှစ်က နာမည်ကျော် ဟစ်ဟော့အဆိုတော် Tupac Shakur ကို ကားပေါ်မှ သေနတ်ဖြင့် ပစ်ခတ်သတ်ဖြတ်ခဲ့သည့် အမှုနှင့်ပတ်သက်၍ ယခင်လမ်းပေါ်ဂိုဏ်းခေါင်းဆောင်တစ်ဦးက ၎င်း၏ တူဖြစ်သူ ရိုက်နှက်ခံခဲ့ရမှုအတွက် လက်စားချေရန် ပစ်ခတ်သတ်ဖြတ်မှုကို စီစဉ်ခဲ့ခြင်းဖြစ်ကြောင်း အစိုးရရှေ့နေက တရားခွင်အဖွင့်မိန့်ခွန်းတွင် ပြောကြားခဲ့သည်။
အသက် ၆၃ နှစ်အရွယ် Duane “Keffe D” Davis သည် Nevada ပြည်နယ် Clark County တွင် အန္တရာယ်ရှိသေစေနိုင်သည့် လက်နက်အသုံးပြု၍ လူသတ်မှုကျူးလွန်မှု တစ်မှုဖြင့် တရားစွဲဆိုခံထားရပြီး အပြစ်မရှိကြောင်း ဝန်ခံထားသည်။
Davis သည် ၁၉၉၆ ခုနှစ် စက်တင်ဘာ ၇ ရက်ညက Las Vegas မြို့ရှိ MGM Grand ကာစီနိုအတွင်း Shakur နှင့် ၎င်း၏အဖွဲ့ဝင်များက Davis ၏တူကို ရိုက်နှက်ခဲ့မှုအတွက် လက်စားချေရန် လူတစ်စုကို ဦးဆောင်ကာ Shakur ကို သတ်ဖြတ်ရန် စီစဉ်ခဲ့သည်ဟု အာဏာပိုင်များက စွပ်စွဲထားသည်။
အဆိုပါပစ်ခတ်မှုကြောင့် အသက် ၂၅ နှစ်အရွယ် Shakur သည် လမ်းပေါ်မှ ကားဖြင့် ပစ်ခတ်ခံရပြီး ခန္ဓာကိုယ်တွင် ကျည်ဆန် ၄ ချက် ထိမှန်ခဲ့သည်။ ဆေးရုံတွင် ၆ ရက်ကြာ ကုသမှုခံယူပြီးနောက် သေဆုံးခဲ့သည်။
Las Vegas မြို့လယ်ရှိ တရားရုံးတွင် အစိုးရရှေ့နေ Binu Palal က “လက်စားချေရန် အခွင့်အရေးပေါ်လာချိန်မှာ Duane Davis က သေနတ်သမားတွေ လက်နက်ကိုင်ပြီး အစီအစဉ်ကို အကောင်အထည်ဖော်ရန် အသင့်ဖြစ်နေစေခဲ့တာကို သိရှိရမှာပါ။ ထူးခြားတာက ဒီအချက်ကို Duane Davis ကိုယ်တိုင် ပြောခဲ့တာကိုလည်း သိရှိရမှာပါ” ဟု ဂျူရီအဖွဲ့ဝင်များကို ပြောကြားခဲ့သည်။
ယင်းသို့ပြောကြားခြင်းမှာ Davis က မကြာသေးမီနှစ်များအတွင်း လူသိရှင်ကြား ပြောဆိုခဲ့သည့် မှတ်ချက်များကို ရည်ညွှန်းခြင်းဖြစ်ပြီး အဆိုပါပြောဆိုချက်များကြောင့် နှစ်ပေါင်းများစွာ မဖြေရှင်းနိုင်ခဲ့သည့် အမှုကို ပြန်လည်ဖော်ထုတ်နိုင်ခဲ့ခြင်းဖြစ်သည်။
သို့သော် Davis ၏ ရှေ့နေ Michael Sandt က အမှုဖြစ်ပွားပြီး နှစ်ပေါင်း ၃၀ ကြာမြင့်လာသော်လည်း တရားစွဲဆိုမှုကို ထောက်ခံနိုင်သည့် အထောက်အထား အလွန်နည်းပါးနေဆဲဖြစ်ကြောင်း ပြောသည်။
Davis သည် အင်တာဗျူးများနှင့် ၎င်း၏စာအုပ်တွင် အတည်မပြုနိုင်သည့် ပြောဆိုချက်များ ပြုလုပ်လေ့ရှိပြီး “အဓိပ္ပာယ်မရှိတဲ့ စကားတွေ ပြောတတ်သူ” ဖြစ်ကြောင်းလည်း Sandt က တရားရုံးသို့ ပြောကြားခဲ့သည်။
“အမှန်တကယ်ရှိတဲ့ အချက်အလက်တွေကိုပဲ ကြည့်ပါ။ Keffe D က သူ့ရဲ့အင်တာဗျူးတွေ ဒါမှမဟုတ် စာအုပ်ထဲမှာ ပြောခဲ့သမျှထဲက ဘာကို ထောက်ခံနိုင်မယ့် အချက်အလက်ရှိပါသလဲ” ဟု Sandt က ဂျူရီအဖွဲ့ဝင်များကို မေးမြန်းခဲ့သည်။
ဟစ်ပ်ဟော့သမိုင်းတွင် အရေးပါသည့် လူသတ်မှု Shakur သတ်ဖြတ်ခံရမှုသည် “Gangsta Rap” ခေတ်၏ အထွတ်အထိပ်ကာလအတွင်း ဟစ်ပ်ဟော့ယဉ်ကျေးမှုနှင့် သီချင်းစာသားများအတွင်း အကြမ်းဖက်မှုများ ပျံ့နှံ့နေသည်ဆိုသည့် အမြင်ကို ပိုမိုထင်ရှားစေခဲ့ပြီး ထိုကာလက နာမည်ကြီးခဲ့သည့် အမေရိကန်အရှေ့ဘက်ကမ်းရိုးတန်းနှင့် အနောက်ဘက်ကမ်းရိုးတန်း ရက်ပ်ဂီတလောကအကြား ပြိုင်ဆိုင်မှုကိုလည်း ပိုမိုပြင်းထန်စေခဲ့သည်။
Davis ကို ၂၀၂၃ ခုနှစ်တွင် ဖမ်းဆီးခဲ့ပြီးနောက် ရဲတပ်ဖွဲ့က ၎င်းသည် Shakur သတ်ဖြတ်ခံရမှုတွင် ကာလရှည် သံသယရှိသူဖြစ်ကြောင်း ပြောခဲ့သည်။ သို့သော် Davis ကိုယ်တိုင် လူသိရှင်ကြား ပြောဆိုချက်များမှတစ်ဆင့် မိမိပါဝင်ပတ်သက်မှုကို ဖော်ပြလာသည်အထိ တရားရုံးတွင် လက်ခံနိုင်သည့် လုံလောက်သောအထောက်အထား မရရှိခဲ့ကြောင်း ရဲတပ်ဖွဲ့က ဆိုသည်။
တရားသူကြီး Carli Kierny ရှေ့မှောက်တွင် ပြုလုပ်မည့် တရားခွင်မှာ ရက်သတ္တပတ် ၆ ပတ်အထိ ကြာမြင့်နိုင်သည်။ ဂျူရီအဖွဲ့ဝင်များကိုလည်း ပြီးခဲ့သည့်သီတင်းပတ်က ရွေးချယ်ပြီးဖြစ်သည်။
တရားခွင်တွင် Shakur သတ်ဖြတ်ခံရသည့်ညက ၎င်းနှင့်အတူ ရှိနေခဲ့သော Death Row Records ပူးတွဲတည်ထောင်သူဟောင်း Marion “Suge” Knight ထွက်ဆိုနိုင်ဖွယ်ရှိသည်။ Knight သည် လက်ရှိတွင် အခြားသော လူသေဆုံးစေသည့် ရည်ရွယ်ချက်မရှိသော လူသတ်မှုတစ်ခုနှင့်ပတ်သက်၍ ထောင်ဒဏ် ၂၈ နှစ် ကျခံနေရသည်။
အာဏာပိုင်များက Davis သည် ၎င်း၏တူကို Shakur နှင့် ၎င်း၏အဖွဲ့ဝင်များက ရိုက်နှက်ခဲ့မှုအတွက် အလျင်အမြန် လက်စားချေရန် စီစဉ်ခဲ့သည့် အစီအစဉ်၏ “ဆုံးဖြတ်ချက်ချပေးသူ” ဖြစ်ကြောင်း ဖော်ပြထားသည်။
ယင်းအကြမ်းဖက်မှုသည် Los Angeles ဒေသရှိ လမ်းပေါ်ဂိုဏ်းနှစ်ခုဖြစ်သည့် Davis ကိုယ်တိုင် ခေါင်းဆောင်ဖြစ်ကြောင်း ပြောဆိုထားသည့် South Side Compton Crips နှင့် ရဲတပ်ဖွဲ့က Knight နှင့် Death Row Records တို့နှင့် ဆက်စပ်သည်ဟု ဆိုထားသည့် Mob Piru တို့အကြား ရန်ငြိုးမှ စတင်ခဲ့ခြင်းဖြစ်သည်။
ထိုအချိန်က ၎င်းတို့သည် Mike Tyson နှင့် Bruce Seldon တို့၏ ကမ္ဘာ့ဟဲဗီးဝိတ်ချန်ပီယံဆု လက်ဝှေ့ပွဲကို ကြည့်ရှုရန် Las Vegas သို့ ရောက်ရှိနေကြခြင်းဖြစ်သည်။
Davis သည် လူသတ်မှုတွင် အသုံးပြုသည့် သေနတ်ကို ရယူပြီး လူဖြူရောင် Cadillac ကား၏ နောက်ခုံတွင် ထိုင်နေသည့် အမျိုးသား ၂ ဦးထံ လွှဲပြောင်းပေးခဲ့သည်ဟု စွပ်စွဲခံထားရသည်။ ထို့နောက် Knight နှင့် Shakur တို့ စီးနင်းလာသည့်ကားကို လိုက်လံရှာဖွေခဲ့ကြသည်။
Knight နှင့် Shakur တို့၏ကားကို လိုက်မီသည့်အချိန်တွင် ပစ်ခတ်မှုဖြစ်ပွားခဲ့ခြင်းဖြစ်သည်။ Shakur သည် ကျည်ဆန် ၄ ချက် ထိမှန်ခဲ့ပြီး ၆ ရက်အကြာတွင် ဆေးရုံ၌ သေဆုံးခဲ့သည်။ ထိုအချိန်တွင် ကားမောင်းနေသည့် Knight သည်လည်း ကျည်ဆန်အပိုင်းအစတစ်ခု ဦးခေါင်းကို ပွတ်ထိခဲ့သဖြင့် အနည်းငယ် ဒဏ်ရာရရှိခဲ့သည်။
လူသတ်မှုစုံစမ်းစစ်ဆေးမှုသည် နှစ်ပေါင်းများစွာ တိုးတက်မှုမရှိဘဲ ရပ်တန့်နေခဲ့သော်လည်း Davis က ၂၀၁၈ ခုနှစ်တွင် မီဒီယာအချို့နှင့် ပြုလုပ်ခဲ့သည့် အင်တာဗျူးများ၌ ၎င်း၏ပါဝင်ပတ်သက်မှုကို ပြောဆိုခဲ့ခြင်းကြောင့် အမှုကို ပြန်လည်စုံစမ်းခဲ့ခြင်းဖြစ်သည်။
ရဲတပ်ဖွဲ့၏ အဆိုအရ Davis သည် အင်တာဗျူးများနှင့် ၂၀၁၉ ခုနှစ်တွင် ထုတ်ဝေခဲ့သည့် “Compton Street Legend” အမည်ရှိ ကိုယ်တိုင်ရေးအတ္ထုပ္ပတ္တိစာအုပ်တွင် ၎င်းသည် Cadillac ကား၏ ရှေ့ခုံတွင် ထိုင်ခဲ့ပြီး သေနတ်ကို ၎င်း၏နောက်တွင် ထိုင်နေသည့် အမျိုးသား ၂ ဦးထဲမှ တစ်ဦးထံ လွှဲပေးခဲ့ကြောင်း ရေးသားထားသည်။
သို့သော် Shakur ကို သေနတ်ဖြင့် အမှန်တကယ် ပစ်ခတ်ခဲ့သူမှာ မည်သူဖြစ်ကြောင်း ရဲတပ်ဖွဲ့က ထုတ်ဖော်ပြောဆိုထားခြင်း မရှိသေးပေ။ Davis နှင့်အတူ Cadillac ကားပေါ်တွင် ရှိနေခဲ့သည့် အခြားအမျိုးသား ၃ ဦးမှာလည်း ယခုအခါ သေဆုံးပြီးဖြစ်သည်။
Nevada ပြည်နယ်ဥပဒေအရ Davis သည် သေနတ်ကို ကိုယ်တိုင်မပစ်ခတ်ခဲ့သော်လည်း လူသတ်မှုတွင် ပါဝင်ခဲ့ကြောင်း သက်သေပြနိုင်ပါက လူသတ်မှုဖြင့် တရားစွဲဆိုနိုင်သည်။Davis သည် ၎င်း၏စာအုပ်တွင် Shakur နှင့် နယူးယောက်အခြေစိုက် Bad Boy Entertainment တေးဂီတကုမ္ပဏီနှင့် လက်တွဲခဲ့သည့် နာမည်ကျော် ရက်ပ်အဆိုတော် Christopher Wallace (The Notorious B.I.G.) တို့၏ လူသတ်မှုများတွင်လည်း ကာလရှည် သံသယရှိသူအဖြစ် သတ်မှတ်ခံခဲ့ရကြောင်း ရေးသားထားသည်။
Wallace သတ်ဖြတ်ခံရမှုမှာ ယနေ့အချိန်အထိ မဖြေရှင်းနိုင်သေးသော်လည်း Shakur သတ်ဖြတ်ခံရပြီး လအနည်းငယ်အကြာတွင် လက်စားချေသည့်အနေဖြင့် Wallace ကို ပစ်ခတ်သတ်ဖြတ်ခဲ့ခြင်းဖြစ်နိုင်ကြောင်း စုံစမ်းစစ်ဆေးသူများက ကာလရှည်ကြာ သုံးသပ်ထားကြသည်။