“ဆွေးနွေးပွဲ မအောင်မြင်ရင် စစ်ရေးတိုက်ခိုက်မှု ပြန်စမယ်” လို့ အီရန်ကို ထရမ့် သတိပေး

(နိုင်ငံတကာ) ဇူလိုင် ၂၈

အမေရိကန်သမ္မတ ဒေါ်နယ်ထရမ့်က အီရန်နှင့် ဆွေးနွေးမှုများ အခြေအနေကောင်းမွန်နေပြီး နှစ်နိုင်ငံအကြား သဘောတူညီချက်တစ်ရပ် ရရှိနိုင်ခြေရှိကြောင်း ပြောကြားခဲ့သလို၊ ဆွေးနွေးပွဲများ မအောင်မြင်ပါက အမေရိကန်၏ စစ်ရေးတိုက်ခိုက်မှုများကို ပြန်လည်စတင်သွားမည်ဟုလည်း သတိပေးပြောကြားခဲ့သည်။

ဇူလိုင် ၂၇ ရက်က ပြုလုပ်သည့် ပြောကြားချက်တွင် ထရမ့်က “ဆွေးနွေးမှုတွေ ကောင်းကောင်းလုပ်နေပါတယ်။ အောင်မြင်နိုင်တဲ့ အခွင့်အလမ်းရှိပါတယ်။ မအောင်မြင်ရင်တော့ နှစ်ရက်အရင်က လုပ်ခဲ့သလိုပဲ ပြန်လုပ်သွားမှာပါ” ဟု ပြောကြားခဲ့သည်။

ထရမ့်က ဆွေးနွေးရေးအပေါ် အကောင်းမြင်သဘောထား ထုတ်ဖော်ခဲ့သော်လည်း အီရန်ဘက်ကမူ အမေရိကန်၏ စစ်ရေးရပ်နားမှုကို စမ်းသပ်သည့်သဘောဖြင့် လှုပ်ရှားမှုများ ပြုလုပ်ခဲ့သည့် အရိပ်လက္ခဏာများ ပေါ်ပေါက်ခဲ့ပြီး ဆော်ဒီအာရေဗျ၊ ဂျော်ဒန်နှင့် အီရတ်နိုင်ငံတို့တွင် ဒရုန်းတိုက်ခိုက်မှုများ ဖြစ်ပွားခဲ့ကြောင်း သက်ဆိုင်ရာနိုင်ငံများက ထုတ်ပြန်ခဲ့သည်။

အမေရိကန်သည် ငါးလကြာ ပဋိပက္ခအတွင်း နှစ်ပတ်ဆက်တိုက် ပြုလုပ်ခဲ့သည့် လေကြောင်းတိုက်ခိုက်မှုများကို ဇူလိုင် ၂၅ ရက်တွင် ရုတ်တရက် ရပ်ဆိုင်းခဲ့သည်။

မီချီဂန်ပြည်နယ်၌ ကျင်းပသည့် မဲဆွယ်စည်းရုံးပွဲတွင်လည်း ထရမ့်က “အီရန်ကို ညှိနှိုင်းပြီး ဝယ်လို့မရဘူး။ အနိုင်ယူရမှာဖြစ်တယ်။ ဒါပေမဲ့ အခုလက်ရှိတော့ အလွန်ဖော်ရွေတဲ့ ဆွေးနွေးမှုတွေ လုပ်နေပါတယ်” ဟု ထပ်မံပြောကြားခဲ့သည်။

အီရန်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ အက်စ်မေးလ် ဘာဂါအီက နှစ်ဖက်အကြား ကြားဝင်ဖျန်ဖြေသူများမှတစ်ဆင့် သတင်းစကားများ ဆက်လက်ဖလှယ်နေဆဲဖြစ်ပြီး အီရန်အနေဖြင့် သံတမန်ရေးလမ်းကြောင်းကို စွန့်လွှတ်ထားခြင်း မရှိကြောင်း ပြောကြားခဲ့သည်။ သို့သော် အီရန်ဘက်က ဆွေးနွေးပွဲတောင်းဆိုခဲ့သည်ဆိုသော သတင်းများမှာ မမှန်ကန်ကြောင်း ငြင်းဆိုခဲ့သည်။

Reuters သို့ အီရန်အကြီးတန်းတာဝန်ရှိသူတစ်ဦးကလည်း အမေရိကန်၏ အပစ်ရပ်အစီအစဉ် ဆက်လက်တည်ရှိနေသရွေ့ အီရန်ဘက်ကလည်း တိုက်ခိုက်မှုများကို ရပ်ဆိုင်းထားမည်ဖြစ်ကြောင်း ပြောကြားခဲ့သည်။

တစ်ဖက်တွင် အီရန်စစ်ဘက်က အမေရိကန်သည် အီရန်ရေပိုင်နက်အတွင်း သင်္ဘောများနှင့် ရေနံတင်သင်္ဘောများကို ခြိမ်းခြောက်နေပြီး တရားမဝင် ရေကြောင်းပိတ်ဆို့မှု ပြုလုပ်ရန် ကြိုးပမ်းနေကြောင်း စွပ်စွဲခဲ့သည်။

ဆော်ဒီအာရေဗျကလည်း ရေနံအခြေခံအဆောက်အအုံများကို ဦးတည်ပျံသန်းလာသည့် ဒရုန်းများကို ပစ်ချနိုင်ခဲ့ကြောင်း ထုတ်ပြန်ခဲ့ပြီး ယင်းဒရုန်းများမှာ အီရန်ကျောထောက်နောက်ခံပြု လက်နက်ကိုင်အဖွဲ့များက အီရတ်နိုင်ငံမှ ပစ်လွှတ်ခဲ့ခြင်းဖြစ်ကြောင်း ပြောကြားခဲ့သည်။

ယီမင်ရှိ ဟူသီအဖွဲ့ကလည်း ဆော်ဒီနိုင်ငံ၏ Yanbu ဆိပ်ကမ်းသို့ ရေနံပို့ဆောင်သည့် East-West Pipeline ကို ပစ်မှတ်ထား တိုက်ခိုက်ခဲ့ကြောင်း ထုတ်ပြန်ခဲ့ပြီး အီရန်ကလည်း ကမ္ဘာ့စွမ်းအင်တင်ပို့မှုအတွက် အရေးပါသည့် ဟော်မုဇ်ရေလက်ကြားကို ဆက်လက်ထိန်းချုပ်ထားဆဲဖြစ်ကြောင်း ပြောကြားခဲ့သည်။

ထို့ပြင် အမေရိကန်၏ လေကြောင်းတိုက်ခိုက်မှုများ ရပ်ဆိုင်းသွားခြင်းနှင့် ဆွေးနွေးရေးအပေါ် ထရမ့်၏ မှတ်ချက်များကြောင့် ကမ္ဘာ့ရေနံဈေးနှုန်းများ ကျဆင်းခဲ့ပြီး အမေရိကန်ရေနံစိမ်းဈေးသည် တစ်စည်လျှင် ၈၁ ဒသမ ၉၈ ဒေါ်လာသို့ ကျဆင်းကာ Brent ရေနံဈေးမှာလည်း တစ်စည်လျှင် ၈၇ ဒသမ ၇၇ ဒေါ်လာအထိ လျော့ကျခဲ့သည်။

အမေရိကန်စစ်ဘက်တာဝန်ရှိသူတစ်ဦး၏ အဆိုအရ စစ်ရေးရည်မှန်းချက်များ အတိုင်းအတာတစ်ခုအထိ ပြီးမြောက်နေပြီဖြစ်ကြောင်း စစ်ဘက်ခေါင်းဆောင်များက သမ္မတထရမ့်အား အကြံပြုခဲ့ခြင်းကြောင့် လေကြောင်းတိုက်ခိုက်မှုများကို ရပ်ဆိုင်းရန် ဆုံးဖြတ်ခဲ့ခြင်းဖြစ်သည်ဟု Reuters က ဖော်ပြထားသည်။

လက်ရှိတွင် အမေရိကန်နှင့် အီရန်တို့သည် အီရန်၏ နျူကလီးယားအစီအစဉ်အပါအဝင် အဓိကပြဿနာများကို ဖြေရှင်းရန် သြဂုတ်လမကုန်မီ ဆွေးနွေးပွဲများ ကျင်းပနိုင်ရေး သဘောတူထားသော်လည်း ဟော်မုဇ်ရေလက်ကြား ဖြတ်သန်းခွင့်နှင့်ပတ်သက်၍ နှစ်ဖက်အကြား သဘောထားကွဲလွဲမှုများ ဆက်လက်ရှိနေကြောင်း သိရသည်။

Telegram – t.me/positiveanglenews

#PAN