(နိုင်ငံတကာ) ဇူလိုင် ၂၂
အမေရိကန်နှင့် အစ္စရေးတို့ ဆင်နွှဲနေသော အီရန်စစ်ပွဲအတွက် လက်ရှိတရားဝင် ကုန်ကျစရိတ်မှာ ဒေါ်လာ ၃၇.၅ ဘီလီယံ ရှိပြီဖြစ်ကြောင်း အမေရိကန် ကာကွယ်ရေးဝန်ကြီး Pete Hegseth က အတည်ပြုပြောကြားလိုက်သည်။
အမေရိကန် ဆီးနိတ်လွှတ်တော် ဘတ်ဂျက်ကော်မတီ၏ ကြား နာပွဲသို့ ပူးတွဲစစ်ဦးစီးချုပ်များဥက္ကဋ္ဌ Dan Caine နှင့်အတူ လာရောက်စစ်ဆေးမေးမြန်းခံစဉ် ကာကွယ်ရေးဝန်ကြီး Hegseth က အဆိုပါ ကိန်းဂဏန်းကို ထုတ်ဖော်ခဲ့ခြင်းဖြစ်သည်။ အစိုးရအနေဖြင့် အမေရိကန် ဒေါ်လာ ၁.၅ ထရီလီယံရှိသော ကာကွယ် ရေးဘတ်ဂျက်ကို တောင်းခံထားရာ ယင်းတွင် အီရန်စစ်ပွဲအတွက် သီးသန့်ခန့်မှန်းခြေ ဒေါ်လာ ၇၀ ဘီလီယံ ပါဝင်သည်။
ယခုထုတ်ပြန်လိုက်သော ကုန်ကျစရိတ်မှာ မေလတုန်းက သမ္မတ ဒေါ်နယ်ထရမ့် အစိုးရအဖွဲ့ ထုတ်ပြန်ခဲ့သည့် ဒေါ်လာ ၂၉ ဘီလီယံထက် ဒေါ်လာ ၈ ဘီလီယံခန့် ပိုမိုများပြားလာခြင်း ဖြစ် သည်။
သို့သော် ဤတရားဝင် ကိန်းဂဏန်းမှာ အမေရိကန် စွမ်းအင်ဈေးနှုန်း မြင့်တက်လာခြင်းကဲ့သို့သော ပြည်တွင်းစားသုံးသူများအတွက် သက်ရောက်မည့် နောက်ဆက်တွဲ ကုန်ကျစရိတ်များကို ထည့်သွင်းတွက်ချက်ထားသည့် အခြားခန့်မှန်းချက်များနှင့် ယှဉ်ပါက သိသိသာသာ နည်းပါးနေသည်။ ဥပမာအားဖြင့် မူဒီ့စ် အန်နာလစ်တစ် (Moody’s Analytics) ၏ ခန့်မှန်းချက်အရ ပြည် တွင်း၌ ကျခံရမည့် ကုန်ကျစရိတ်မှာ ဒေါ်လာ ၁၅၀ ဘီလီယံအထိ ရှိနိုင်ကြောင်း သိရသည်။
ဇွန်လလယ်ပိုင်းက ရပ်ဆိုင်းထားခဲ့သည့် တိုက်ခိုက်မှုဆိုင်ရာ နားလည်မှုစာချွန်လွှာ (MoU) ပျက်ပြားသွားပြီးနောက် နှစ်နိုင်ငံအကြား တိုက်ပွဲများမှာ ပိုမိုပြင်းထန်လာနေသည်။ စစ်ပွဲကြောင့် အမေရိကန်၏ လက်နက်ခဲယမ်း မီးကျောက် စုဆောင်းမှုအပေါ် ကြီးမားသော ဖိစီးမှုများ ရှိနေကြောင်း ထောက်ပြခဲ့ပြီး၊ အထူး သဖြင့် ပဲ့ထိန်းဗုံးများ၊ ဟိုက်ပါဆောနစ်လက်နက်များနှင့် ဒရုန်းတန်ပြန် တိုက်ခိုက်ရေး ကိရိယာများ ထုတ်လုပ်မှုကို အရှိန်မြှင့်တင်ရန် ရန်ပုံငွေ အရေးတကြီး လိုအပ်နေကြောင်း Hegseth က အလေးပေးပြောကြားခဲ့သည်။
လာမည့်လများတွင် စစ်ပွဲဆိုင်ရာ ကုန်ကျစရိတ်များနှင့် ဘတ် ဂျက်လိုအပ်ချက်များမှာ အမေရိကန် ကွန်ဂရက်လွှတ်တော်၏ အဓိက ဆွေးနွေးရမည့် အကြောင်းအရာတစ်ခု ဖြစ်လာနေ သည်။
Telegram»… https://t.me/positiveanglenews
#PAN