(နိုင်ငံတကာ) ဇွန် ၂၉
ဥရောပတိုက်တစ်ဝှမ်းတွင် သမိုင်းတစ်လျှောက် ပြင်းထန်သော အပူလှိုင်း (Heatwave) များ ဆက်တိုက်ကျရောက်နေမှုကြောင့် ပြင်သစ်နိုင်ငံ၌ ပုံမှန်ထက်ပိုမိုသော သေဆုံးသူ (Excess Deaths) အရေအတွက်မှာ လတ်တလောတွင် ၁,၀၀၀ အထိ မြင့်တက်လာကြောင်း ပြင်သစ်ပြည်သူ့ကျန်း မာရေးအေဂျင်စီက တရားဝင်ထုတ်ပြန်သည်။
ကျန်းမာရေးဝန်ကြီးဌာနအောက်ရှိ ပြည်သူ့ကျန်းမာရေးအေ ဂျင်စီ၏ တနင်္ဂနွေနေ့ထုတ်ပြန်ချက်အရ အပူလွန်ကဲမှုဒဏ်ကြောင့် သေဆုံးရသူအများစုမှာ အသက် ၆၅ နှစ်နှင့်အထက် သက်ကြီးရွယ်အိုများ ဖြစ်ကြသည်။
သို့သော်လည်း လက်ရှိကိန်းဂဏန်းမှာ ကနဦးရေတွက်ချက်မှုသာ ဖြစ်ပြီး နေအိမ်များနှင့် သက်ကြီးရွယ်အိုစောင့် ရှောက်ရေးဂေဟာများမှ သေဆုံးမှုအချက်အလက်များ ထပ်မံရရှိပါက သေ ဆုံးမှုနှုန်းသည် ယခုထက် ပိုမိုမြင့်တက်လာနိုင်ကြောင်း ခန့်မှန်းထားသည်။ ပြင်သစ်ကျန်းမာရေးဝန်ကြီး စတက်ဖနီ ရစ်စ်တ် (Stephanie Rist) က ယခုအပူလှိုင်း၏ ရိုက်ခတ်မှုသည် အနည်းဆုံး ၁၀ ရက်ခန့်အထိ ဆက်လက်တည်ရှိနေနိုင်သေးကြောင်း သတိပေးထားသည်။
ပြီးခဲ့သည့် ဇွန်လ ၂၀ ရက်နေ့ကတည်းက စတင်ခဲ့သော အဆိုပါ အပူလှိုင်းကြောင့် ဥရောပတိုက်ရှိ ပြတိုက်များနှင့် စာသင် ကျောင်း အမြောက်အမြားကို အချိန်စော၍ ပိတ်ထားခဲ့ရသည်။ အေအက်ဖ်ပီ (AFP) သတင်းဌာန၏ တိုင်းတာချက်များအရ ဥရောပရှိ လူဦးရေ အနည်းဆုံး ၁၉၁ သန်းခန့်သည် ၃၅ ဒီဂရီဆဲလ်စီးယပ်စ် (၉၅ ဒီဂရီဖာရင်ဟိုက်) နှင့်အထက် ပြင်းထန်သောအပူချိန်ကို အလူးအလဲ ခံစားနေရသည်။
၎င်းအပူလှိုင်းသည် လတ်တလောတွင် ဂျာမနီ၊ ချက်သမ္မတ နိုင်ငံ၊ ဟန်ဂေရီ၊ ပိုလန်၊ စလိုဗာကီးယား၊ ဆားဘီးယား၊ ခရိုအေးရှား၊ အီတလီ၊ ဩစတြီးယားနှင့် ယူကရိန်းနိုင်ငံအနောက်ပိုင်းတို့သို့ ရွေ့လျားသက်ရောက်လျက်ရှိသည်။
ဂျာမနီနိုင်ငံတွင် ရက်ပေါင်းများစွာတိုင်အောင် အပူချိန် ၄၀ ဒီဂရီဆဲလ်စီးယပ်စ် (၁၀၄ ဒီဂရီဖာရင်ဟိုက်) အထိ မြင့်တက်ခဲ့ပြီး၊ အရှေ့ပိုင်း ကွပ်ရှုဇ် (Kubschuetz) မြို့တွင် စနေနေ့ညပိုင်းအတွင်း အပူချိန်မှာ ၂၉.၄ ဒီဂရီဆဲလ်စီးယပ်စ်အောက်သို့ ကျဆင်းသွားခြင်းမရှိခဲ့ပေ။ ယင်းမှာ လွန်ခဲ့သည့် နှစ်ပေါင်း ၁၅၀ နီးပါးခန့်က သမိုင်းမှတ်တမ်းများ စတင်ကောက်ယူခဲ့ပြီးကတည်းက အပူဆုံးညစံချိန်သစ် ဖြစ်လာခဲ့သည်။
ထို့ပြင် အပူဒဏ်သက်သာစေရန် မြစ်ချောင်းအိုင်များ၌ ရေ ကူးကြရာမှ ယခုသီတင်းပတ်ကုန်တွင် ရေနစ်မှုကြောင့် အနည်း ဆုံး ၇ ဦး ထပ်မံသေဆုံးခဲ့ရသည်။ စနေနေ့က ဂျာမနီ၊ ဒိန်းမတ်နှင့် ချက်သမ္မတနိုင်ငံတို့တွင် သမိုင်းတစ် လျှောက် အမြင့်ဆုံးအပူချိန် စံချိန်သစ်များ စတင်တင်ခဲ့သည်။
ပတ်ဝန်းကျင်ထိန်းသိမ်းရေး သိပ္ပံပညာရှင်များ၏ သုံးသပ်ချက်အရ ယခုကဲ့သို့ ပြင်းထန်လွန်းသော အပူလှိုင်းသည် လူသားတို့ကြောင့် ဖြစ်ပွားရသည့် ကမ္ဘာ့ရာသီဥတုပြောင်းလဲမှု (Climate Change) ကြောင့်သာ ဖြစ်ပွားရခြင်း ဖြစ်သည်။ မြေ ပြင်တွင်မူ “အိုမီဂါပိတ်ဆို့ခြင်း (Omega Block)” ဟု ခေါ်ဆိုသည့် လေထုဖြစ်စဉ်ကြောင့် ပူနွေးသော လေထုထုထည်ကြီးတစ်ခုသည် ဒေသတွင်း၌ အချိန်ကြာမြင့်စွာ ထွက်ပေါက်မရှိ ပိတ်မိနေခြင်းကြောင့် ဖြစ်သည်။
ယခုသီတင်းပတ်ကုန်တွင် အပူလွန်ကဲမှု အနည်းငယ် လျော့ပါးသွားနိုင်သော်လည်း ယင်းနောက်ဆက်တွဲအဖြစ် ပြင်းထန်သော မိုးသက်မုန်တိုင်းများနှင့် လေပြင်းတိုက်ခတ်မှုများ ဝင်ရောက် လာနိုင်ကြောင်း မိုးလေဝသဌာနများက သတိပေးထားသည်။
Telegram»…
https://t.me/positiveanglenews
#PAN