(နိုင်ငံတကာ) ဇွန် ၂၅
ဗင်နီဇွဲလားနိုင်ငံတွင် ဗုဒ္ဓဟူးနေ့ညနေပိုင်းက ပြင်းအား ၇.၂ နှင့် ၇.၅ ရှိသော အဖျက်စွမ်းအားပြင်း အမြွှာမြေငလျင်ကြီးနှစ်ခု မိနစ်ပိုင်းအတွင်း ဆက်တိုက်လှုပ်ခတ်သွားခဲ့ရာ အနည်းဆုံး ပြည်သူ ၁၆၄ ဦး သေဆုံးပြီး ၉၇၁ ဦး ဒဏ်ရာရရှိခဲ့သဖြင့် အစိုးရက တစ်နိုင်ငံလုံးအတိုင်းအတာဖြင့် နိုင်ငံ တော် အရေးပေါ်အခြေ အနေ ကြေညာလိုက်ပြီဖြစ်သည်။
အဆိုပါငလျင်ဆိုးကြီးကြောင့် မြို့တော် ကာရာကတ်စ် (Caracas) အပါအဝင် ဗင်နီဇွဲလားအလယ်ပိုင်းနှင့် အနောက်ပိုင်းဒေသများတွင် အဆောက်အအုံများစွာ ပြိုကျကာ အခြေခံအဆောက်အအုံများ ပျက်စီးခဲ့ရသဖြင့် အကြီးစားရှာဖွေကယ် ဆယ်ရေးလုပ်ငန်းများကို အရှိန်မြှင့်လုပ် ဆောင်လျက်ရှိသည်။
အမေရိကန်ဘူမိဗေဒလေ့လာရေးဌာန (USGS) ၏ ထုတ်ပြန်ချက်အရ ငလျင်ဗဟိုချက်သည် မြို့တော်အနောက်ဘက်ရှိ ယာရာကူအီ (Yaracuy) ပြည်နယ်တွင် တည်ရှိပြီး ကာရစ်ဘီယံကျောက်ဖျာချပ်နှင့် တောင်အမေရိကကျောက်ဖျာချပ်တို့အကြား အနက်မပြတ်သော ပြတ်ရွေ့လျှောမှု (Shallow strike-slip faulting)ကြောင့် ဖြစ်ပွားခဲ့ခြင်းဖြစ်သည်။
ငလျင်သည် ဗင်နီဇွဲလားနိုင်ငံ၏ ကာရာဘိုဘိုတိုက်ပွဲ အထိမ်း အမှတ် အမျိုးသားရုံးပိတ်ရက် ညနေ ၆ နာရီ ၄ မိနစ်တွင် လှုပ်ခတ်ခဲ့ခြင်းဖြစ်ပြီး မြို့တော်ကာရာကတ်စ်၏ အယ်လ်တာမီရာခရိုင်တွင် ၂၂ ထပ်ရှိ အဆောက်အအုံကြီးတစ် လုံး ပြိုကျပျက်စီးခဲ့ကာ အပျက်အစီးများအောက်၌ လူများစွာ ပိတ်မိနေဆဲဖြစ်သည်။ ဗင်နီဇွဲလား ယာယီသမ္မတ ဒယ်လ်စီ ရိုဒရီဂွက်ဇ် (Delcy Rodriguez) က ကျန်းမာရေးဝန် ထမ်းအားလုံး ဆေးရုံများသို့ ချက်ချင်းသတင်းပို့ရန် ညွှန်ကြားထားပြီး ဆိုင်မွန်ဘိုလီဗာ အပြည်ပြည်ဆိုင်ရာလေဆိပ်ကို ပိတ်ပစ်ကာ ကျောင်းသင်ခန်းစာများကို ဆိုင်းငံ့ထားသည်။
USGS က ဘေးဒဏ်သင့်ဒေသရှိ အဆောက်အအုံအများစုမှာ ငလျင်ဒဏ်မခံနိုင်သည့် ရွှံ့အုတ်များနှင့် သံကူကွန်က ရစ်မဟုတ်သော အုတ်နံရံများဖြင့် ဆောက်လုပ်ထားသဖြင့် သေဆုံးသူအရေအတွက်သည် ၁,၀၀၀ မှ ၁၀၀,၀၀၀ ကြားအထိ သိသိသာသာ မြင့်တက်သွားနိုင်ခြေ ၃၇% ကျော်ရှိကြောင်း ကိန်း ဂဏန်းဆိုင်ရာ သတိပေးချက် ထုတ်ပြန်ထားသည်။ ထို့ပြင် လာမည့်ရက်ပိုင်းအတွင်း ပြင်းထန်သော နောက်ဆက်တွဲငလျင် (Aftershocks) များ ထပ်မံလှုပ်ခတ်နိုင်ကြောင်း ကျွမ်းကျင်သူများက ဆိုသည်။
လက်ရှိတွင် နိုင်ငံတကာအသိုင်းအဝိုင်းက ဗင်နီဇွဲလားနိုင်ငံအတွက် ကယ်ဆယ်ရေးအကူအညီများ စတင်စုစည်းနေပြီဖြစ် သည်။ အမေရိကန်သမ္မတ ဒေါ်နယ်ထရမ့်က “အမေရိကန်အနေ ဖြင့် အစိုးရအေဂျင်စီအားလုံးကို အမြန်ဆုံးလှုပ်ရှားရန် ညွှန်ကြားထားပြီး ကူညီရန် အသင့်ရှိနေသည်” ဟု ၎င်း၏ Truth Social စာမျက်နှာတွင် ရေးသားခဲ့ကာ ရှာဖွေကယ်ဆယ်ရေးအဖွဲ့များနှင့် ဆေးဝါးများ စေလွှတ်မည်ဟု ဆိုသည်။
အလားတူ အယ်လ်ဆာဗေဒိုသမ္မတ နာယစ်ဘွတ်ကီလီက ကယ်ဆယ်ရေးဝန်ထမ်း ၃၀၀ နှင့် ဆေးဝါးတန်ချိန် ၅၀ စေလွှတ်ရန် ပြင်ဆင်နေပြီး၊ အီကွေဒေါ၊ ပနားမား၊ မက္ကဆီကိုနှင့် ဘရာဇီးနိုင်ငံတို့ကလည်း နိုင်ငံရေးသဘောထားကွဲလွဲမှုများကို ဘေးဖယ်၍ လူသားချင်းစာနာမှုဆိုင်ရာ ကူညီမှုများ ပြုလုပ်သွားမည်ဖြစ်ကြောင်း အသီးသီးထုတ်ဖော်ပြောကြားထားကြသည်။
Telegram»…
https://t.me/positiveanglenews
#PAN