(နိုင်ငံတကာ) ဧပြီ ၁၁
အစ္စရေးနိုင်ငံသည် လာမည့်အပတ် ဝါရှင်တန်ဒီစီတွင် လက်ဘနွန်အရာရှိများနှင့် တွေ့ဆုံဆွေးနွေးရာ၌ ဟစ်ဇ်ဘိုလာအဖွဲ့နှင့် အပစ်အခတ်ရပ်စဲရေးကိစ္စကို ထည့်သွင်းဆွေးနွေးမည်မဟုတ်ကြောင်း ပြောကြား လိုက်ပြီး၊ တစ်ဖက်တွင်လည်း လက်ဘနွန်အပေါ် တိုက်ခိုက်မှုများကို ဆက်လက်လုပ်ဆောင်နေသည်။
အမေရိကန် နိုင်ငံခြားရေးဝန်ကြီးဌာနတွင် လာမည့်အင်္ဂါနေ့၌ ပြုလုပ်မည့် အဆင့်မြင့်တွေ့ဆုံပွဲအတွက် အစ္စရေးနှင့် လက်ဘနွန် သံအမတ်ကြီးများသည် သောကြာနေ့ညဉ့်နက်ပိုင်းအထိ ညှိနှိုင်းမှုများ ပြုလုပ်ခဲ့ကြသည်။ အစ္စရေးဘက်က လက်ဘနွန်အစိုးရနှင့် တရားဝင်ငြိမ်းချမ်းရေး ဆွေးနွေးရန် သဘောတူညီခဲ့သော်လည်း၊ “ငြိမ်းချမ်းရေး၏ အဓိကအဟန့်အတား” အဖြစ် သတ်မှတ်ထားသော ဟစ်ဇ်ဘိုလာအဖွဲ့နှင့်မူ မည်သည့်အပစ်ရပ်စဲရေးကိုမျှ ဆွေးနွေးမည်မဟုတ်ကြောင်း ပြတ်ပြတ်သားသား ကြေညာခဲ့သည်။
တစ်ဖက်တွင်လည်း အစ္စလာမ္မာဘတ်သို့ ရောက်ရှိနေသော အီရန်ကိုယ်စားလှယ်အဖွဲ့က လက်ဘနွန်တွင် အပစ်အခတ်ရပ်စဲခြင်း မရှိဘဲ အမေရိကန်နှင့် မည်သည့်ဆွေးနွေးမှုမျှ ပြုလုပ်မည်မဟုတ်ကြောင်း တုံ့ပြန်ထား သည်။ အီရန်ဘက်က ၎င်းတို့နှင့် အမေရိကန်ကြား သဘောတူထားသော နှစ်ပတ်ကြာ တိုက်ပွဲရပ်နားရေးတွင် ဟစ်ဇ်ဘိုလာလည်း ပါဝင်ရမည်ဟု အဓိပ္ပာယ်ဖွင့်ဆိုထားသော်လည်း၊ သမ္မတထရန့်ကမူ လက်ဘနွန်သည် ယင်းအစီအစဉ်တွင် မပါဝင်ကြောင်း ပြောကြားခဲ့သည်။
သံတမန်ရေးလမ်းကြောင်းများ ပွင့်နေသော်လည်း မြေပြင်တွင် အစ္စရေး၏ ဗုံးကြဲတိုက်ခိုက်မှုများမှာ ပိုမိုပြင်းထန်လာနေသည်။ ပြီးခဲ့သည့် ဗုဒ္ဓဟူးနေ့ တစ်ရက်တည်းမှာပင် လက်ဘနွန်၌ လူပေါင်း ၃၅၀ ကျော် သေဆုံးခဲ့ပြီး၊ စနေနေ့ကလည်း နာဘာတီးယားခရိုင်ရှိ လူနေအဆောက်အအုံတစ်ခု တိုက်ခိုက်ခံရမှုကြောင့် လူ ၃ ဦး ထပ်မံသေဆုံးခဲ့သည်။ ပြီးခဲ့သည့် သီတင်း ပတ်အနည်းငယ်အတွင်း လက်ဘနွန်တွင် သေဆုံးသူ စုစုပေါင်း ၂,၀၀၀ နီးပါး ရှိလာပြီဖြစ်ကြောင်း သိရသည်။
သမ္မတ ထရန့်က ပါကစ္စတန်ရှိ အမေရိကန်-အီရန် ဆွေးနွေးပွဲများ ပျက်ပြားမသွားစေရန်အတွက် လက်ဘနွန်ရှိ စစ်ဆင်ရေးများကို အရှိန်လျှော့ချထားရန် အစ္စရေးဝန်ကြီးချုပ် နေတန်ယာဟုကို တိုက်တွန်းထားသော် လည်း၊ အစ္စရေးဘက်ကမူ ဟစ်ဇ်ဘိုလာကို ဆက်လက်ချေမှုန်းသွားမည့် အရိပ်အယောင်များ ပြသနေပါသည်။
#Israel #Lebanon #Hezbollah #Iran #Trump #MiddleEastConflict #CeasefireTalks #PositiveAngleNews
Telegram»…
https://t.me/positiveanglenews
#PAN