(မှု့ခင်း) စက်တင်ဘာ ၂၀
နေပြည်တော်၊ ဇေယျာသီရိမြို့နယ်၊ အိုင်စောက်ကျေးရွာ၊ ရွာဘေးရှိချောင်းထဲသို့ ရေဆင်းချိုးရာမှ G-2 ကျောင်းသား ကလေးငယ်တစ်ဦး ရေနစ်သေဆုံးသွားကြောင်း သိရသည်။
စက်တင်ဘာ ၁၈ ရက်နေ့၊ ညနေ ကျောင်းဆင်းချိန် G-2 ကျောင်းသား မောင်မြတ်ဘုန်းခန့် သည် သူငယ်ချင်းများနှင့်အတူ ရွာဘေးရှိချောင်းအတွင်း ရေချိုးကြရာမှ ချောင်းရေနှင့်အတူ မျောပါသွားခဲ့ပြီး အတူရေဆင်းကူးကြသည့် အပေါင်းဖော်များက စနောက်နေသည်ဟုထင်မှတ်ကာ အိမ်ပြန်သွားခဲ့ကြကြောင်း သိရသည်။
ထို့နောက် မောင်မြတ်ဘုန်းခန့် မိဘများမှ ညအချိန်ထိပြန်မလာသဖြင့် ရွာသားမျာနှင့်အတူ ရွာအတွင်းလိုက်လံရှာဖွေခဲ့ကြရာ အတူရေချိုးကြသည့် သူငယ်ချင်းများမှ ရေထဲပါသွားကြောင်းပြောပြသဖြင့် ရွာသူရွာသားများမှ ချောင်းရိုးတလျှောက်ရှာဖွေခဲ့ရာ မတွေ့ရကြောင်း သိရသည်။
၎င်းနောက် “လူမှုဂရုနာရှင်”လူမှုရေးအသင်းအား အကူညီတောင်း၍ ချောင်းရိုးတလျှောက်လိုက်လံရှာဖွေခဲ့ရာ စက်တင်ဘာ ၁၉ ရက်နေ့ မွန်းလွှဲ ၄ နာရီခွဲအချိန်တွင် ဝဲကြီးရွာထိပ်ရှိ ကင်တာဆည်ဘောင်တွင် ကလေးငယ်၏ ရုပ်အလောင်းအား တွေ့ရှိရကြောင်း သိရသည်။
#PAN