(ပြည်တွင်း) စက်တင်ဘာ ၁၇
သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာန၊ သစ်တောဦးစီးဌာနသည် တရားမဝင် သစ်နှင့် သစ်တောထွက်ပစ္စည်းများ ဖမ်းဆီးရမိရေးအတွက် ပြည်သူလူထုပါဝင်သော CMRS စနစ် အပါအဝင် နည်းလမ်းမျိုးစုံဖြင့် အဟန့်အတားမရှိ ဖော်ထုတ်ဖမ်းဆီးလျက်ရှိကြောင်း သိရသည်။
ထိုသို့ ဆောင်ရွက်လျက်ရှိရာ စက်တင်ဘာလ ၇ ရက်မှ ၁၃ ရက်နေ့အထိ တစ်ပတ်တာကာလအတွင်း နေပြည်တော်၊ ပြည်နယ်နှင့် တိုင်းဒေသကြီး သစ်တောဦးစီးဌာနများမှ ပေးပို့လာသော စာရင်းများအရ တရားမဝင် ကျွန်းသစ် ၈ ဒသမ ၇၅၉၁ တန်၊ သစ်မာ ၁၁ ဒသမ ၃၁၃၄ တန်၊ အခြားသစ် အမျိုးအစား ၇၂ ဒသမ ၆၂၇၀ တန်၊ စုစုပေါင်း တရားမဝင်သစ် ၉၂ ဒသမ ၆၉၉၅ တန်အား ဖမ်းဆီးရမိခဲ့ကြောင်းသိရသည်။
ထို့ပြင် ပြစ်မှုကျူးလွန်ရာတွင် အသုံးပြုသည့် ယာဉ်/ယန္တရား ၈ စီးနှင့် တရားမဝင် သစ်များ လက်ဝယ်ထားရှိသူ တရားခံ ၈ ဦးတို့အား သက်သေခံ ပစ္စည်းများနှင့်အတူ ဖမ်းဆီးရမိခဲ့ကြောင်းသိရသည်။
လက်ရှိတွင် ဖမ်းဆီးရမိခဲ့သည့် တရားမဝင် သစ်များ၊ ယာဉ်/ယန္တရားများနှင့် တရားခံများအား သက်ဆိုင်ရာ ဥပဒေများနှင့်အညီ ထိရောက်စွာ အရေးယူနိုင်ရေးအတွက် သစ်တောဦးစီးဌာနက ဆက်လက် ဆောင်ရွက်လျက်ရှိကြောင်း သိရသည်။