(နိုင်ငံတကာ) ဇွန် ၁၉
အမေရိကန်-အစ္စရေး မဟာမိတ်အဖွဲ့နှင့် အီရန်နိုင်ငံတို့အကြား ဖြစ်ပွားခဲ့သည့် စစ်ပွဲကို အဆုံးသတ်ရန် ဗုဒ္ဓဟူးနေ့က လက်မှတ်ရေးထိုးခဲ့သည့် နားလည်မှုစာချွန်လွှာ (MoU) အတွင်း အီရန်နိုင်ငံ ပြန်လည်ထူထောင်ရေးအတွက် ဒေါ်လာဘီလီယံ ၃၀၀ သုံးစွဲမည့် ပြဋ္ဌာန်းချက်တစ်ရပ် ပါဝင်လာမှုကြောင့် ဝါရှင်တန်ဒီစီတွင် အာဏာရ ရီပတ်ဘလစ်ကန်နှင့် အတိုက်အခံ ဒီမိုကရက်တို့အကြား နိုင်ငံရေးအရ အပြင်း အထန် အခြေအတင် အငြင်းပွားစရာ အချက်အချာကိစ္စရပ်တစ်ခု ဖြစ်လာခဲ့သည်။
အဆိုပါ MoU တွင် အမေရိကန်အနေဖြင့် အီရန်နိုင်ငံ၏ စီးပွားရေးနှင့် ပြန်လည်ထူထောင်ရေးအတွက် အနည်းဆုံး ဒေါ်လာဘီလီယံ ၃၀၀ ရှိမည့် စီမံကိန်းတစ်ရပ်ကို ဒေသတွင်းမိတ်ဖက်များနှင့်အတူ ပူးပေါင်းဖော်ဆောင်သွားမည်ဟု ဖော်ပြထားခြင်း ဖြစ်သည်။ ထိုကိစ္စနှင့်ပတ်သက်၍ လာမည့် နိုဝင်ဘာ သက် တမ်းဝက်ရွေးကောက်ပွဲအတွက် စီးပွား ရေးလူထုအခြေပြုဝါဒ (Economic Populism) ကို အသုံးချနေသည့် ဒီမိုကရက်ပါတီဝင်များနှင့် ရီပတ်ဘလစ်ကန် အမတ်အချို့က ပြည်တွင်းစီးပွားရေး ကျပ်တည်းနေချိန်တွင် အီရန်ကို ငွေကြေးထောက်ပံ့ရန် ကြိုးပမ်းမှုအဖြစ် အပြင်းအထန် ဝေဖန်တိုက်ခိုက်လာကြသည်။
ဝေဖန်မှုများ ပြင်းထန်လာပြီးနောက် သမ္မတ ဒေါ်နယ်ထရမ်ပ်က ၎င်း၏ Truth Social လူမှုကွန်ရက်တွင် “အမေရိကန်က အီရန်ကို ဒေါ်လာဘီလီယံ ၃၀၀ ပေးချေရမယ်ဆိုတာ မရှိပါဘူး။ အဲဒါ ဒီမိုကရက်တွေရဲ့ ဝါဒဖြန့် သတင်းတု (Fake News) သာဖြစ်တယ်” ဟု ရေးသားကာ ပယ်ချခဲ့သည်။
အလားတူ ဒုတိယသမ္မတ ဂျေဒီ ဗန့်စ် (JD Vance) ကလည်း The New York Times နှင့် အင်တာဗျူးတွင် “အမေရိကန်အခွန်ထမ်းတွေရဲ့ ငွေ တစ်ဆင့် (တစ်ပြား)မှ အီရန်ဆီ သွားမှာမဟုတ်ဘူး” ဟု အာမခံခဲ့သည်။ ဗန့်စ်၏ အဆိုအရ ယခု ရန်ပုံငွေကို ဒေသတွင်းရှိ အာရပ်နိုင်ငံများနှင့် အီရန်တွင် ရင်းနှီးမြှုပ်နှံရန် စိတ်ဝင်စားသည့် ပြင်ပနိုင်ငံများက စိုက်ထုတ်ပေးသွားမည်ဖြစ်ပြီး၊ အီရန်အနေဖြင့်လည်း ရက်ပေါင်း ၆၀ ဆွေးနွေးပွဲကာလအတွင်း ၎င်းတို့၏ အပြု အမူများကို အပြည့်အဝ ပြောင်းလဲလိုက်နာမှသာ အဆိုပါ ရန်ပုံငွေများကို ရရှိနိုင်မည်ဟု ဆိုသည်။
သို့သော်လည်း လက်ရှိအချိန်အထိ မည်သည့်နိုင်ငံကမျှ အဆို ပါ ရန်ပုံငွေအတွက် ငွေကြေးစိုက်ထုတ်ပေးရန် အတည်ပြုထားခြင်း မရှိသေးပေ။
အခြားတစ်ဖက်တွင် ဒီမိုကရက် အထက်လွှတ်တော်အမတ် အေမီ ကလိုဗူချာ (Amy Klobuchar) က “ဒေါ်လာဘီလီယံ ၃၀၀ ရှိရင် ပြည်တွင်းက အိုးမဲ့အိမ်မဲ့ပြဿနာကို အဆုံးသတ်နိုင်သလို ကင်ဆာသုတေသနကို အနှစ် ၄၀ စာ ထောက်ပံ့နိုင်တယ်။ ဒါပေမဲ့ ထရမ်ပ်က အီရန်ဆီ ပို့ဖို့လုပ်နေတယ်” ဟု X တွင် ရေး သားဝေဖန်ခဲ့သည်။
အထက်လွှတ်တော် ဒီမိုကရက်ခေါင်းဆောင် ချက် ရှူးမား (Chuck Schumer) ကလည်း ဒီမိုကရက်များအနေ ဖြင့် ယင်းလုပ်ငန်းစဉ်ကို ကူညီမည်မဟုတ်ကြောင်း ပြတ်ပြတ်သားသား ပြောကြားခဲ့သည်။
ထို့ပြင် ရီပတ်ဘလစ်ကန်ပါတီမှ အီရန်အရေး တင်းမာသူ အထက်လွှတ်တော်အမတ် ရော်ဂျာ ဝစ်ကာ (Roger Wicker)ကလည်း ဤပမာဏသည် ၂၀၁၅ ခုနှစ်က သမ္မတ အိုဘားမားအစိုး ရ ချုပ်ဆိုခဲ့သည့် JCPOA သဘောတူညီချက်အောက်တွင် အီရန်ကို ပေးခဲ့သည့်ပမာဏထက် များစွာ သာလွန်နေသဖြင့် အီရန်ကို အကျိုးအမြတ် အဆမတန် ရရှိစေလိမ့်မည်ဟု ဝေဖန်ခဲ့သည်။
ယခု အသစ်ချုပ်ဆိုခဲ့သည့် အမေရိကန်-အီရန် MoU တွင် ပြန်လည်ထူထောင်ရေး ရန်ပုံငွေအပြင် အီရန်၏ ရုပ်ကြွင်းလောင်စာလုပ်ငန်းအပေါ် ချမှတ်ထားသည့် ပိတ်ဆို့မှုများကို ချက်ချင်းရုပ်သိမ်းရန်နှင့် အေးခဲထားသည့် အီရန်ပိုင်ဆိုင်မှု ဘီလီယံပေါင်းများစွာကို ပြန်လည်လွှတ်ပေးရန်အတွက် ရက်ပေါင်း ၆၀ ကြာ ဆွေးနွေးပွဲများ ဆက်လက်ပြုလုပ်သွားရန် ပါဝင်ကြောင်း သိရသည်။
Telegram»…
https://t.me/positiveanglenews
#PAN