စက်တင်ဘာ ၁၉
ရန်ကုန်တိုင်း၊ ဗိုလ်တထောင်မြို့နယ်ရှိ ကျောက်လမ်းမပေါ်တွင် ယမန်နေ့ ညနေ ၅နာရီခွဲအချိန်ခန့်က ကွန်တိန်နာကားတစ်စီးမှ အမျိုးသားတစ်ဦးအား ဝင်တိုက်မိခဲ့၍ သေဆုံးသွားခဲ့ကြောင်း သိရသည်။
“ဗိုလ်တထောင် ကျောက်လမ်းမပေါ်က ဂိုးချိုးဝင်းအရှေ့မှာဖြစ်သွားတာပါ။ ကွန်တိန်နာနဲ့ တိုက်ခံရပြီး သေဆုံးသွားတဲ့လူက အသက်(၃၅)နှစ်ဝန်းကျင်လောက်ပါ။ ကွန်တိန်နာမောင်းတဲ့လူက ဖြစ်စဥ်ဖြစ်တော့ အခင်းဖြစ်တဲ့နေရာမှာ ကားကိုထားပြီး ထွက်ပြေးသွားပါတယ်”ဟု လင်းလက်လူမှုကူညီရေးအသင်း ဝင်တစ်ဦးကပြောသည်။
အဆိုပါ ကွန်တိန်နာကားဖြင့်တိုက်ခံခဲ့ရသည့် အမျိုးသားမှာ ထိခိုက်ဒဏ်ရာများရရှိ၍ အခင်းဖြစ်နေရာ၌သေဆုံးသွားခဲ့သဖြင့် လင်းလက်လူမှုကူညီရေးအသင်းမှ ရန်ကုန်ပြည်သူ့ဆေးရုံကြီးရင်ခွဲရုံသို့ ပို့ဆောင်ပေးခဲ့ကြကြောင်း သိရသည်။
