(ပြည်တွင်း) စက်တင်ဘာ ၁၇
ရခိုင်ပြည်နယ်၊ ပုဏ္ဏားကျွန်းမြို့နယ်ထဲက ရခိုင်လက်နက်ကိုင်အဖွဲ့ AA တွေရှိရာ နေရာတွေကို မြန်မာ့တပ်မတော်က ဂျက်ဖိုက်တာတွေနဲ့ ဗုံးကြဲတိုက်ခိုက်နေတယ်လို့ သိရပါတယ်။
စစ်တွေနယ်မြို့နဲ့ ပုဏ္ဏားကျွန်းမြို့နယ်အစပ်မှာရှိတဲ့ ပုဏ္ဏားကျွန်းမြို့နယ်၊ ကွမ်းတောင်ကျေးရွာနဲ့ အနီးတဝိုက်ကို မြန်မာ့တပ်မတော်ဘက်က ဂျက်တိုက်လေယာဉ်တွေ အုပ်စုလိုက်နဲ့ ဗုံးကြဲတိုက်ခိုက်နေတာ ဖြစ်ပါတယ်။
မြန်မာတပ်မတော်ဟာ ဒီကနေ့မနက် ၇ နာရီဝန်းကျင်က စတင်ကာ ဂျက်ဖိုက်တာ ၄ စီးနဲ့ ၇ ကြိမ်ထက်မနည်း တိုက်ခိုက်နေတာ ဖြစ်တယ်လို့ ရခိုင်မီဒီယာတွေရဲ့ ရေးသားချက်အရ သိရတာ ဖြစ်ပါတယ်။
ကွမ်းတောင်ကျေးရွာအနီးတဝိုက်နဲ့ မင်းချောင်း တံတားအနီးပတ်ဝန်းကျင်တို့ကို မနက် ၇ နာရီဝန်းကျင်က ဗုံး ၂ခ လုံးကြဲချတိုက်ခိုက်ခဲ့ပြီးနောက် တစ်နာရီခွဲခန့်အကြာ နံနက် ၈နာရီခွန့်မှာ Y12 နဲ့လည် ထပ်မံ ဗုံးကြဲတိုက်ခိုက် နေတာဖြစ်တယ်လို့ သိရပါတယ်။
ဒါ့အပြင် စက်တင်ဘာ ၁၆ ရက်နေ့ မနေ့က နေ့လည် ၁ နာရီကျော်ကလည်း မြန်မာ့တပ်မတော်က ဂျက်ဖိုက်တာတွေဟာ ပုဏ္ဏားကျွန်းမြို့အနီးက တောင်တန်းတွေကို ဗုံးကြဲတိုက်ခိုက်ခဲ့တဲ့အပြင် စစ်တွေတပ်ရင်းတွေဘက်ကလည်း လက်နက်ကြီးတွေနဲ့ ပစ်ခတ်ခဲ့တာတွေရှိခဲ့တယ်လို့ ဆိုပါတယ်။
စစ်တွေဘက်က မြန်မာ့တပ်မတော်နဲ့ ပုဏ္ဏားကျွန်းဘက်က AA အဖွဲ့တို့အကြား အပြန်အလှန်တိုက်ပွဲတွေဟာ ဒီကနေ့အထိ ရက်ဆက်မပြတ် ပြင်းထန်စွာ ဖြစ်ပွားနေတာလည်း ဖြစ်ပါတယ်။
ပုဏ္ဏားကျွန်းမြို့နယ်က ဒီကနေ့ မြန်မာ့တပ်မတော်ရဲ့ ဗုံးကြဲမှုတွေအတွင်း AA လက်နက်ကိုင်အဖွဲ့ဝင်တွေ ထိခိုက်မှုရှိ/မရှိကို တရားဝင်မသိရှိရသေးပေမယ့် ထိခိုက်သေဆုံးမှု အများအပြား ရှိနိုင်တယ်လို့လည်း ရခိုင်ဒေသခံတွေက ခန့်မှန်းထားကြပါတယ်။
ရခိုင်ပြည်နယ်အတွင်းက AA ထိန်းချုပ်ထားရာ မြို့နယ်အနှံ့က AA လက်နက်ကိုင်တွေ ရှိရာနေရာတွေကို စက်တင်ဘာ ၄ ရက်နေ့က စတင်ပြီး မြန်မာ့တပ်မတော်ဘက်က ၄၉၂၆ စစ်ဆင်ရေးနဲ့ ထိုးစစ်ဆင်တိုက်ခိုက်နေတာလည်း ဖြစ်ပါတယ်။
တပ်ချုပ်သစ် ဗိုလ်ချုပ်ကြီး ရဲဝင်းဦးလက်ထက် မတ်လ ၃၁ ရက်မှ သြဂုတ်လ ၃၁ ရက်အထိ ၅ လတာအတွင်း နိုင်ငံတဝှမ်းလေကြောင်းတိုက်ခိုက်မှု စုစုပေါင်း ၁၅၈၃ ကြိမ်ထက်မနည်း ရှိခဲ့ပြီဖြစ်တယ်လို့ ISP-Myanmar က သုတေသနအချက်အလက်တွေနဲ့ ဆိုထားပါတယ်။။
အဲဒီအထဲက ရခိုင်၊ ချင်း၊ စစ်ကိုင်းနဲ့ မကွေးဒေသတွေပါဝင်တဲ့ အနောက်ပိုင်းနဲ့ အလယ်ပိုင်းဒေသတွေကို အဓိကပစ်မှတ်ထားဦးတည်တိုက်ခိုက်နေတယ်လို့ ပြောဆိုထားပြီး ရခိုင်ပြည်နယ်က လက်နက်ကိုင်စိုးမိုးထားတဲ့ နေရာတွေကို လေကြောင်းတိုက်ခိုက်မှု ၂၂၀ ထက်မနည်း ပြုလုပ်ခဲ့တယ်လို့လည်း ပြောပါတယ်။