(နိုင်ငံတကာ) ဇူလိုင် ၃၀
Facebook ၏ မိခင်ကုမ္ပဏီဖြစ်သော Meta Platforms သည် ဒုတိယ သုံးလပတ်အတွင်း အခမဲ့ငွေသားလည်ပတ်မှု (free cash flow) ကို ၉၁ ရာခိုင်နှုန်းအထိ လျော့နည်းသွားခဲ့ကြောင်း ဗုဒ္ဓဟူးနေ့တွင် ထုတ်ပြန်ခဲ့သည်။ ယင်းသည် AI နည်းပညာအတွက် ကုန်ကျစရိတ်များကို ကြီးမားစွာ သုံးစွဲနေခြင်းကြောင့် ဘဏ္ဍာရေးဖိအားများ တိုးလာနေကြောင်း ပြသနေသည်။
ဇွန်လ ၃၀ ရက်ဖြင့် ပြီးဆုံးသည့် ဒုတိယ သုံးလပတ်တွင် Meta ၏ free cash flow သည် ဒေါ်လာ ၇၈၄ သန်းသာရှိခဲ့ပြီး ယခင်နှစ်အတူကာလရှိ ဒေါ်လာ ၈.၅၅ ဘီလီယံနှင့် နှိုင်းယှဉ်ပါက အလွန်ကျဆင်းခဲ့သည်။ ယင်းသတင်းကြောင့် ကုမ္ပဏီ၏ ရှယ်ယာဈေးသည် အချိန်ပြင်ပ ရောင်းဝယ်မှုတွင် ၁၀ ရာခိုင်နှုန်းကျဆင်းခဲ့သည်။
Meta ၏ ငွေသားလည်ပတ်မှု လျော့နည်းမှုသည် Alphabet ကုမ္ပဏီ၏ အခြေအနေနှင့်လည်း ဆင်တူနေပြီး ယင်းကုမ္ပဏီကလည်း ပြီးခဲ့သည့်အပတ်တွင် ဒုတိယ သုံးလပတ်အတွင်း ဒေါ်လာ ၅.၉ ဘီလီယံ သုံးစွဲခဲ့ကာ ပထမဆုံးအကြိမ် cash flow အနုတ်ဖြစ်ခဲ့ကြောင်း ကြေညာထားသည်။ ထိုကဲ့သို့ ကုန်ကျစရိတ်များ မြင့်မားလာခြင်းသည် Wall Street ရင်းနှီးမြှုပ်နှံသူများကိုပင် အံ့အားသင့်စေခဲ့ပြီး Alphabet ၏ ရှယ်ယာဈေးလည်း ကျဆင်းခဲ့သည်။
Meta ၏ CEO မာ့ခ် ဇူကာဘတ်က ဝင်ငွေကြေညာမှု ဆွေးနွေးပွဲတွင် “ကျွန်တော်တို့၏ ကွန်ပျူတာစွမ်းအားအများစုကို AI မော်ဒယ်များ လေ့ကျင့်ရန်၊ အဓိကစီးပွားရေးကို တိုးချဲ့ရန်နှင့် ကိုယ်ပိုင်အကူအညီပေးနိုင်သော AI များနှင့် ထုတ်ကုန်အသစ်များ ဖန်တီးရန် အသုံးပြုမည်” ဟု ပြောကြားခဲ့သည်။
Meta သည် လက်ရှိတွင် ကမ္ဘာတဝှမ်း data center ၃၂ ခုကို လည်ပတ်နေ သို့မဟုတ် ဆောက်လုပ်နေပြီး ထိုအထဲမှ ၂၈ ခုမှာ အမေရိကန်နိုင်ငံတွင် တည်ရှိသည်။ ထို့အပြင် ၂၀၂၆ ခုနှစ်အတွက် capital expenditure ကိုလည်း တိုးမြှင့်ကာ ဒေါ်လာ ၁၃၀ ဘီလီယံမှ ၁၄၅ ဘီလီယံအထိ ရှိမည်ဟု ခန့်မှန်းထားသည်။
နည်းပညာကုမ္ပဏီကြီးများ၏ AI ရင်းနှီးမြှုပ်နှံမှုများသည် ယခုနှစ်အတွင်း ဒေါ်လာ ၇၀၀ ဘီလီယံကျော်အထိ ရောက်ရှိမည်ဟု ခန့်မှန်းထားပြီး နောက်နှစ်တွင် ဒေါ်လာ ၁ ထရီလီယံကျော်အထိ တိုးတက်နိုင်ကြောင်း Morgan Stanley က ခန့်မှန်းထားသည်။
Investing.com မှ အကြီးတန်း သုံးသပ်သူ Thomas Monteiro က “ဝင်ငွေတိုးတက်မှုရှိသော်လည်း သုံးစွဲမှုက ပိုမိုမြန်ဆန်စွာ တိုးတက်နေသည်။ free cash flow အနာဂတ်သည် မကောင်းလာနိုင်ကြောင်း စျေးကွက်က ပြန်လည်သတ်မှတ်နေသည်” ဟု ပြောကြားခဲ့သည်။
သို့သော် Madison and Wall မှ Luke Stillman က Meta ၏ ကြော်ငြာလုပ်ငန်းသည် အားကောင်းနေဆဲဖြစ်ပြီး ကုမ္ပဏီ၏ အဓိကဝင်ငွေ အရင်းအမြစ်အဖြစ် ဆက်လက်တည်ရှိနေကြောင်း ပြောကြားခဲ့သည်။
Meta သည် AI ရင်းနှီးမြှုပ်နှံမှုများနှင့်အတူ ဥပဒေရေးရာ အန္တရာယ်များကိုလည်း ရင်ဆိုင်နေရပြီး ယခုလအတွင်း အမေရိကန်ပြည်နယ် ၄ ခုက Facebook နှင့် Instagram ပလက်ဖောင်းများကို လူငယ်များကို စွဲလမ်းစေရန် ဒီဇိုင်းထုတ်ထားသည်ဟု စွပ်စွဲကာ ဒေါ်လာ ၁.၄ ထရီလီယံ ဒဏ်ငွေတောင်းဆိုထားကြောင်း သိရသည်။
ထို့အပြင် Meta က ယခင်ဧပြီလတွင် ဥရောပသမဂ္ဂနှင့် အမေရိကန်နိုင်ငံတို့တွင် လူငယ်များ၏ လူမှုကွန်ရက်အသုံးပြုမှုနှင့်ပတ်သက်သော စည်းမျဉ်းများကြောင့် ကုမ္ပဏီ၏ လုပ်ငန်းနှင့် ဘဏ္ဍာရေးရလဒ်များအပေါ် သက်ရောက်မှုကြီးမားနိုင်ကြောင်း သတိပေးထားသည်။
Meta ၏ ဘဏ္ဍာရေးအရာရှိချုပ် Susan Li က ဒုတိယ သုံးလပတ်တွင် ဥပဒေရေးရာ ကုန်ကျစရိတ်များနှင့် ဝန်ထမ်းလျှော့ချမှု ကုန်ကျစရိတ်များ မပါဝင်ပါက လုပ်ငန်းလည်ပတ်မှုဝင်ငွေသည် ၉ ရာခိုင်နှုန်း တိုးတက်နိုင်ခဲ့ကြောင်း ပြောကြားခဲ့သော်လည်း အမှန်တကယ်တွင် ၈ ရာခိုင်နှုန်း ကျဆင်းခဲ့ကြောင်း သိရသည်။
ထို့အပြင် “လူငယ်များနှင့် ဆိုင်သော ပြဿနာများအပေါ် စောင့်ကြည့်မှုများ ဆက်လက်ရှိနေပြီး ယခုနှစ်အတွင်း အမေရိကန်တွင် အမှုများစွာကို ရင်ဆိုင်ရမည်ဖြစ်သည်။ ထိုအမှုများသည် အရေးကြီးသော ငွေကြေးဆုံးရှုံးမှုများ ဖြစ်ပေါ်စေနိုင်သည်” ဟု Susan Li က ထပ်မံပြောကြားခဲ့သည်။
Telegram – t.me/positiveanglenews