(နိုင်ငံတကာ) ဇူလိုင် ၆
ဗင်နီဇွဲလားနိုင်ငံတွင် ရာစုနှစ်တစ်ခုကျော်အတွင်း သေဆုံးမှုအများဆုံးဖြစ်ခဲ့သည့် ပြင်းအား ၇.၂ အဆင့်ရှိ ကမွှာငလျင်ကြီးများကြောင့် လက်ရှိအချိန်အထိ လူပေါင်း ၃,၃၄၂ ဦး သေဆုံးကြောင်း အတည်ပြုထားပြီး၊ လူပေါင်း ၅၀,၀၀၀ ကျော် ပျောက် ဆုံးနေဆဲဖြစ်သည်။
ယခုကဲ့သို့ အဆောက်အအုံပေါင်း ရာနှင့်ချီ ပြိုကျပျက်စီးခဲ့သည့် ဘေးဒုက္ခဆိုးကြီးအတွင်း အပျက်အစီးများအောက်၌ ပိတ်မိနေသော ဖခင်နှင့် ညီငယ်နှစ်ဦးကို မီးသတ်သမားဟောင်းဖြစ်သူ သားကြီးဖြစ်သူက ၂၀ နာရီကျော်အကြာတွင် အံ့ဖွယ်ပြန် လည်ကယ်ထုတ်နိုင်ခဲ့သည့် ဝမ်းနည်းစရာနှင့် စိတ်လှုပ်ရှားဖွယ်ဖြစ်ရပ်တစ်ခု လူထုကြား ရေပန်းစားလျက်ရှိသည်။
ပြီးခဲ့သည့် ဇွန်လ ၂၄ ရက် ညနေ ၆ နာရီကျော်အချိန်က လာဂွိုင်ရာ (La Guaira) မြို့၏ ကမ်းခြေဆင်ခြေဖုံးရပ် ကွက်ရှိ ၁၁ ထပ်မြင့် ကွန်ကရစ်အဆောက်အအုံကြီးဖြစ်သော ရီတာဆိုးလ် ပဲလေ့စ်(Ritasol Palace)၏ ဒုတိယထပ်တွင် မော်တော်ယာဉ်မက္ကင်းနစ်ဖြစ်သူ အသက် ၄၆ နှစ်အရွယ် ဟိုဆေး ဂါစီယာ(Jose Garcia)သည် ဇနီး၊ အသက် ၇ နှစ်နှင့် ၁၂ နှစ်အရွယ် သားငယ်နှစ်ဦးတို့နှင့်အတူ ရှိနေစဉ် ပြင်းထန်သော ငလျင်နှစ်ခု ဆက်တိုက်လှုပ်ခတ်သွားခဲ့သည်။ စက္ကန့်ပိုင်းအတွင်း အဆောက်အအုံကြီးတစ်ခုလုံး ပြိုကျပျက်စီးသွားခဲ့ရာ ဟိုဆေးနှင့် ၎င်း၏သားငယ်နှစ်ဦးသည် ဒုတိယထပ်မှနေ၍ အဆောက်အအုံ၏ မြေအောက်ထပ်အထိ ပြိုကျပိတ်မိကာ မြေမြုပ်ခြင်း ခံခဲ့ရသည်။
ဟိုဆေး၏ သားကြီးဖြစ်သူ အသက် ၂၆ နှစ်အရွယ် ဟေရှုး ဂါစီယာ(Jesus Garcia)သည် ယခင်က မီးသတ်သမားတစ်ဦးဖြစ်ပြီး ငလျင်မလှုပ်မီကပင် အလုပ်မှ ထွက်ထားခဲ့သူဖြစ်သည်။ ၎င်းသည် အခင်းဖြစ်ပွားရာနေရာသို့ အပြေးအလွှား ရောက်ရှိလာချိန်တွင် ၎င်း၏ မီးသတ်ရဲဘော်ဟောင်းတစ်ဦးက ဟေရှုး၏ မီးသတ်ဦးထုပ်နှင့် ဂျာကင်အင်္ကျီတို့ကို ယူဆောင်ပေးခဲ့ပြီး ဖခင်ဖြစ်သူ အသက်ရှင်လျက် အောက်တွင် ပိတ်မိနေကြောင်း ပြောကြားခဲ့သည်။
ဟေရှုးသည် အပျက်အစီးများကြားမှ ဖခင်ဖြစ်သူ၏ “ငါ့ကို ဒီမှာ ထားမသွားပါနဲ့” ဟူသော အော်ဟစ်သံကို ကြားလိုက်ရပြီးနောက် “အဖေတို့ကို မခေါ်ဘဲ ကျွန်တော် ဘယ်မှမသွားဘူး” ဟု ကတိပေးကာ ကယ်ဆယ်ရေးကို စတင်ခဲ့သည်။
သို့သော်လည်း လေးလံလှသော ကွန်ကရစ်ကြမ်းပြင်လွှာများကို ဖြတ်သန်းရန်အတွက် ကွန်ကရစ်တူးစက် (Jackhammer) အကူအညီ လိုအပ်သဖြင့် နောက်တစ်နေ့နံနက်အထိ စောင့်ဆိုင်းခဲ့ရသည်။ ဇွန်လ ၂၅ ရက် မွန်းလွဲ ၃ နာရီခွဲခန့်တွင် ရဲတပ်ဖွဲ့အထူးအဖွဲ့နှင့် လာဂွိုင်ရာမြို့မှ မီးသတ်တပ်ဖွဲ့ဝင်ဟောင်းများ၏ အင် တိုက်အားတိုက် ကူညီမှုကြောင့် ငလျင်လှုပ်ပြီး ၂၀ နာရီကျော်အကြာတွင် ဖခင်ဖြစ်သူ ဟိုဆေးနှင့် ညီငယ်နှစ်ဦးကို ဒဏ်ရာအနည်းငယ်ဖြင့် အပျက်အစီးများအောက်မှ အောင်မြင်စွာ ကယ်ထုတ်နိုင်ခဲ့သည်။
ယခုကဲ့သို့ အံ့ဖွယ်အသက်ရှင်လွတ်မြောက်ခဲ့သော်လည်း ဟိုဆေး၏ ဇနီးဖြစ်သူမှာမူ ၁၁ ရက်တိုင်တိုင် အပျက်အစီးများအောက်တွင် ပိတ်မိနေဆဲဖြစ်ပြီး အသက်ရှင်လျက် ပြန်တွေ့ရန် မျှော်လင့်ချက် မပျက်သေးကြောင်း ဟိုဆေးက ဆိုသည်။
အလားတူပင် ကိုလံဘီယာတွင် အလုပ်လုပ်ကိုင်ပြီး သမီးနှင့်မြေးများကို ထောက်ပံ့နေသည့် အန်ဒရီနာရေး ဆိုသူ အမျိုးသမီးမှာလည်း ငလျင်ကြောင့် သမီးဖြစ်သူ၏ အသက် ၂၀ ပြည့်မွေး နေ့တွင် မိသားစုဝင်အားလုံး အပျက်အစီးအောက် ပိတ်မိပျောက် ဆုံးသွားခဲ့ရသဖြင့် ဘဝပျက်လျက်ရှိသည်။
ဗင်နီဇွဲလားအစိုးရ၏ ထုတ်ပြန်ချက်အရ အဆောက်အအုံပေါင်း ၈၅၆ လုံး ပျက်စီးပြီး ၁၉၀ လုံး လုံးဝပြိုကျခဲ့ကြောင်း သိရသည်။ ကျွမ်းကျင်သူများက ယခုအကျပ် အတည်းသည် နိုင်ငံအတွင်း တစ်ခါမျှမကြုံဖူးလောက်အောင် ကြီးမားကြောင်း သုံး သပ်ကြသည်။
သို့သော်လည်း ဘေးအန္တရာယ်အပေါ် အစိုးရ၏ တုံ့ပြန်ဆောင်ရွက်မှု အလွန်နှေးကွေးခြင်း၊ ထောက်ပံ့ကူညီမှုများကို ပိတ်ဆို့နှောင့်နှေးခြင်းတို့ကြောင့် ပြည်သူများအကြား အစိုးရအပေါ် စိတ်ပျက်ဒေါသထွက်မှုများနှင့် မရေရာမှုများ အလွန်မြင့်တက်လျက်ရှိကြောင်း စိတ်ကျန်းမာရေးပညာရှင်များက ထောက်ပြထားကြသည်။
Telegram»…
https://t.me/positiveanglenews
#PAN