(နိုင်ငံတကာ) ဇူလိုင် ၂
ထိုင်းနိုင်ငံ အရှေ့မြောက်ပိုင်း မုက္ကဒါဟန် (Mukdahan) ခရိုင်တွင် အသက် ၁၁ နှစ်အရွယ် ကလေးငယ်တစ်ဦး ခိုးယူမောင်းနှင်လာသည့် ပစ်ကပ်ထရပ်ကားတစ်စီးက လမ်းဘေး၌ ခြေကျင်စီတန်း၍ ဒေသစာရီကြွချီနေသော ဗုဒ္ဓဘာသာသံဃာ တော်များကို အရှိန်ပြင်းစွာ ဝင်တိုက်မိခဲ့သဖြင့် သံဃာတော် ရှစ်ပါး ပျံလွန်တော်မူပြီး အခြားလူအများအပြား ပြင်းထန်စွာ ဒဏ် ရာရရှိခဲ့ကြောင်း ဒေသခံရဲတပ်ဖွဲ့နှင့် ကျန်းမာရေးတာဝန်ရှိသူများက သတင်းထုတ်ပြန်သည်။
ပျံလွန်တော်မူသွားသည့် သံဃာတော်များနှင့် လူဝတ်ကပ္ပိယ နောက်လိုက်အဖွဲ့(၃၀ခန့်)သည် မြို့တော်ဘန် ကောက်၏ အရှေ့ မြောက်ဘက် ၆၀၀ ကီလိုမီတာခန့်အကွာရှိ မုက္ကဒါဟန်ခရိုင်မှ ဥဘွန်ရတ်ချာသာနီ (Ubon Ratchathani) ပြည်နယ်သို့ သွားမည့် ၂၆၀ ကီလိုမီတာ ရှည်လျားသော ခြေကျင်ဒေသစာရီခရီးစဉ်ကို စတင်ထွက်ခွာပြီး မိနစ် ၃၀ ခန့်အကြာ လမ်းဘေးတစ်လျှောက် စီတန်းကြွချီနေစဉ် ယခုကဲ့သို့ မော်တော်ယာဉ် တိုက်မိမှုဖြစ်ပွားခဲ့ခြင်းဖြစ်သည်။
ဒေသခံ ကယ်ဆယ်ရေးအဖွဲ့ (Ruam Jai Mukdahan Rescue Association) က ထုတ်ပြန်သည့် CCTV လုံခြုံရေးကင်မရာ မှတ်တမ်းများအရ သံဃာတော်များ လမ်းဘေးတွင် တစ်ပါးချင်း စီတန်းကြွချီနေစဉ် ပစ်ကပ်ကားတစ်စီးက အရှိန်မထိန်းနိုင်ဘဲ နောက်ကွယ်မှ ဒုန်းစိုင်းဝင်တိုက်ခဲ့ခြင်း ဖြစ်သည်။ ယခုဖြစ်စဉ်ကြောင့် သံဃာတော် ငါးပါးမှာ အခင်းဖြစ်ပွားရာနေရာ၌ပင် ပျံလွန်တော်မူခဲ့ပြီး အခြားသုံးပါးမှာ ဆေးရုံ၌ ကုသမှုခံယူရင်း ထပ်မံပျံလွန်တော်မူသွားခဲ့ခြင်း ဖြစ်သည်။
ယာဉ်တိုက်မှုအတွင်းမှ ကံကောင်းထောက်မစွာ လွတ်မြောက်လာခဲ့သည့် အရှင်သောမပုန်း (Phra Sompong) က “ကလေးတစ်ယောက် ပစ်ကပ်ကားမောင်းပြီး လာနေတာကို မြင်လိုက်တယ်။ အဲဒီအချိန်မှာ ကျွန်တော်က ‘ဗုဒ္ဓေါ၊ ဗုဒ္ဓေါ’ ဆိုပြီး စိတ်ထဲက ကမ္မဋ္ဌာန်းစီးဖြန်းနေတာ။ အဲဒီနောက် ချက်ချင်းပဲ ထရပ်ကားက အရှိန်အပြည့်နဲ့ ကျွန်တော်တို့ကို ဝင်တိုက်တော့တာပဲ။ ကျွန်တော်နဲ့ နောက်ထပ် သံဃာတစ်ပါးကတော့ လမ်းဘေးကို အချိန်မီ ခုန်ရှောင်နိုင်ခဲ့တယ်။ ရှေ့ဆုံးက ကိုးပါးကတော့ လွတ်သွားပေမဲ့ အတိုက်ခံရတဲ့ ကျန်တဲ့သံဃာတွေကတော့ လေထဲကို မြောက်တက်သွားကြတယ်” ဟု ၎င်း၏ မျက်မြင်ကြုံတွေ့မှုကို ဝမ်းနည်းဖွယ် မိန့်ကြားခဲ့သည်။
လက်ရှိတွင် သံဃာတော် လေးပါးမှာ မုက္ကဒါဟန်ဆေးရုံ၏ အရေးပေါ်လူနာဆောင်၌ စိုးရိမ်ရသည့် အခြေအနေတွင် ရှိနေပြီး၊ အခြား ၁၀ ပါးမှာ ပြင်းထန်စွာ ဒဏ်ရာရရှိခဲ့ကာ ကျန်ရှိသည့် လူဝတ်ကပ္ပိယ နောက်လိုက် ၁၀ ဦးမှ ၂၀ ဦးခန့်ကိုလည်း ဆေးရုံတွင် ကုသမှုပေးနေရသည်။
မုက္ကဒါဟန်ခရိုင် ရဲတပ်ဖွဲ့မှူး ဗိုလ်ချုပ် ပိုင်ရော့ ထိုင်ဖူဆာ (Major General Pairoj Thaiphutsa) က ကလေးငယ်သည် မိဘများထံမှ ခွင့်ပြုချက်မရှိဘဲ ကားကို ခိုးယူမောင်းနှင်ခဲ့ခြင်းဖြစ်ပြီး လက်ရှိတွင် ဖမ်းဆီးထိန်းသိမ်းထားကြောင်း၊ အစိုး ရကလေးသူငယ် ကာကွယ်စောင့်ရှောက်ရေးအရာရှိများနှင့်အတူ စစ်ဆေးသွားမည်ဖြစ်ကြောင်း ပြောကြားခဲ့သည်။ ထို့ပြင် ကဲ့သို့သော ဖြစ်စဉ်မျိုးအတွက် ကလေးသူငယ်အပေါ် တာဝန်ယူရမည့် မိဘများကိုလည်း ရဲစခန်းသို့ ခေါ်ယူကာ ဥပဒေကြောင်းအရ ဆက်လက်အရေးယူ ဆောင်ရွက်နေကြောင်း သိရသည်။
Telegram»…
https://t.me/positiveanglenews
#PAN