(မှုခင်း) ဇူလိုင် ၁
ပဲခူးတိုင်းဒေသကြီးဝေါမြို့နယ်၊ ညောင်ခါးရှည်ကျေးရွာအနီးတွင် မော်တော်ယာဉ်များအား စစ်ဆေးရှာဖွေစဉ်Tramadol ဆေးတောင့်များ ဖမ်းဆီးရမိကြောင်း သိရသည်။
ဇွန်လ ၂၉ ရက်နေ့ ည၈နာရီခွဲ အချိန်တွင် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များသည် ဝေါမြို့နယ်၊ ညောင်ခါးရှည်ကျေးရွာအနီးတွင် မော်တော်ယာဉ်များအား စစ်ဆေးရှာဖွေစဉ် ဘားအံမြို့ဘက်မှ ရန်ကုန်မြို့ဘက်သို့ သက်အောင်ထွန်း(ခ)နဂါး မောင်းနှင်ပြီး စိုးမျိုးထွန်း(ခ)ကိုကြီး နှင့် မလဖိုင်နန်ဘောက် လိုက်ပါလာသည့် TOYOTA HIACE အမျိုးအစား မော်တော်ယာဉ်အား ရပ်တန့်စစ်ဆေးရှာဖွေရာ ယာဉ်ပေါ်တွင် သယ်ဆောင်လာသော စက္ကူဂျပ်ဖာများအတွင်းမှ Tramadol ဆေးတောင့် ၂၀,၅၀၀ တောင့်(ဒေသကာလတန်ဖိုးငွေကျပ် ၁၀၂.၅ သိန်း)နှင့် လက်ကိုင်ဖုန်း ၃ လုံးတို့အား တွေ့ရှိသိမ်းဆည်းရမိခဲ့သည်။
အဆိုပါ Tramadol ဆေးတောင့်များ သယ်ဆောင်လာသူ သက်အောင်ထွန်း(ခ)နဂါး(၄၃)နှစ်၊ စိုးမျိုးထွန်း(ခ)ကိုကြီး(၄၃)နှစ် နှင့် မလဖိုင်နန်ဘောက်(၃၁)နှစ်တို့အား ဝေါမြို့မရဲစခန်းတွင် မူးယစ်ဆေးဝါးနှင့် စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အမှုဖွင့် အရေးယူထားရှိပြီး ကွင်းဆက်များ ဆက်လက်ဖော်ထုတ်လျက်ရှိကြောင်း သိရသည်။
#PAN