(စီးပွားရေး) ဇွန် ၂၃
ရှမ်းပြည်နယ်(တောင်ပိုင်း)တွင် စိုက်ပျိုးထွက်ရှိနေသော ကုလားအော်ငရုတ်သီးများသည် ပြည်တွင်းဈေးကွက်သာမက ထိုင်း၊ တရုတ်နှင့် အိန္ဒိယနိုင်ငံများမှ ဝယ်ယူမှုများ တိုးလာခြင်းကြောင့် ယခုနှစ်အတွင်း တစ်ပိဿာလျှင် ငွေကျပ် ၃၅,၀၀၀ မှ ၃၈,၀၀၀ အထိ ဈေးကောင်းရရှိနေကြောင်း စားသုံးသူရေးရာဦးစီးဌာနမှ သိရသည်။
အောင်ပန်းဒေသသည် ရှမ်းပြည်နယ်(တောင်ပိုင်း)အတွင်း စိုက်ပျိုးရေးအခြေခံဒေသတစ်ခုဖြစ်ပြီး သီးနှံမျိုးစုံ စိုက်ပျိုးထွက်ရှိနေရာတွင် ကုလားအော်ငရုတ်သီးမှာ တန်ဖိုးမြင့် ဟင်းခတ်အမွှေးအကြိုင် သီးနှံတစ်မျိုးဖြစ်သဖြင့် ပြည်တွင်းနှင့် ပြည်ပဈေးကွက်တွင် ဝယ်လိုအားကောင်းမွန်နေခြင်းဖြစ်သည်။
အဆိုပါ ငရုတ်သီးကို အေးမြသောရာသီဥတုနှင့် မိုးရေချိန်လုံလောက်သည့် တောင်တန်းဒေသများဖြစ်သည့် အောင်ပန်း၊ ဟဲဟိုး၊ ပင်းတယ၊ ရွာငံနှင့် တောင်ကြီးပတ်ဝန်းကျင်ဒေသများတွင် အဓိက စိုက်ပျိုးလျက်ရှိကြောင်း သိရသည်။ ထို့အပြင် အရိပ်အာဝါသကောင်းသော ပတ်ဝန်းကျင်ကို နှစ်သက်သဖြင့် သစ်တောနီးပါးဒေသများတွင် စိုက်ပျိုးလေ့ရှိသည်ဟုလည်း သိရသည်။
ကုလားအော်ငရုတ်သီးကို အခြောက်လှန်း၍ ဟင်းခတ်အမွှေးအကြိုင်အဖြစ် အသုံးပြုကြသည့်အပြင် အစားအသောက်ထုတ်လုပ်ရေးလုပ်ငန်းများနှင့် ဆေးဝါးထုတ်လုပ်ရေးလုပ်ငန်းများတွင်လည်း အသုံးဝင်မှုရှိသဖြင့် ဝယ်လိုအားမှာ တစ်နှစ်ထက် တစ်နှစ် တိုးတက်လျက်ရှိကြောင်း သိရသည်။
ထို့ကြောင့် ကုလားအော်ငရုတ်သီးသည် ပြည်တွင်းစားသုံးမှုအတွက်သာမက ပြည်ပတင်ပို့ရန်အတွက်ပါ အလားအလာကောင်းသော စိုက်ပျိုးရေးသီးနှံတစ်မျိုးဖြစ်ကြောင်း စားသုံးသူရေးရာဦးစီးဌာနက ထုတ်ပြန်ထားသည်။
#PAN