(နိုင်ငံတကာ) ဇွန် ၂၂
ဖိလစ်ပိုင်နိုင်ငံအလယ်ပိုင်း၊ လိုင်တေးပြည်နယ်(Leyte)၊ တက်ကလိုဘန်စီးတီး (Tacloban City)ရှိ ဆန်ဟိုဆေးအမျိုး သားအထက်တန်းကျောင်း (San Jose National High School)တွင် ယနေ့ ဇွန်လ ၂၂ ရက် (တနင်္လာနေ့) ဒေသစံတော် ချိန် နံနက် ၉:၀၀ နာရီခန့်က ဝမ်း နည်းတုန်လှုပ်ဖွယ်ရာ ကျောင်းတွင်းသေနတ်ပစ်ခတ်မှုတစ်ခု ဖြစ်ပွားခဲ့ရာ ကျောင်းသား ၃ ဦး အသက်ဆုံးရှုံးခဲ့ပြီး အခြားကျောင်းသား ၅ ဦး အပြင်းအထန် ဒဏ်ရာရရှိခဲ့ကြောင်း ဖိလစ်ပိုင်ရဲတပ်ဖွဲ့၏ ထုတ်ပြန်ချက်အရ သိရသည်။
ဖြစ်စဉ်မှာ ကျောင်းသင်ခန်းစာများ စတင်ပို့ချနေသည့် နံနက်ပိုင်းအချိန်တွင် အဆိုပါအထက်တန်းကျောင်းဝင်းအတွင်းသို့ သေနတ်သမားအမျိုးသားနှစ်ဦး ဝင်ရောက်လာပြီး ကျောင်းသား များကို ရုတ်တရက် သေနတ်ဖြင့် အကြောင်းမဲ့ ပစ်ခတ်ခဲ့ခြင်း ဖြစ်သည်။
ပစ်ခတ်မှုကြောင့် အပြစ်မဲ့ကျောင်းသား ၃ ဦးမှာ ရရှိထားသော သေနတ်ဒဏ်ရာများဖြင့် အခင်းဖြစ်ပွားရာနေရာ၌ပင် ပွဲ ချင်းပြီး သေဆုံးသွားခဲ့ရသည်။ ထို့ပြင် အခြားကျောင်းသား ၅ ဦးလည်း ကျည်ထိမှန်ဒဏ်ရာများ ရရှိခဲ့သဖြင့် အာဏာပိုင်များနှင့် ကျောင်းတာဝန်ရှိသူများက အနီးနားရှိ ဆေးဘက်ဆိုင်ရာ ဆေးရုံ၊ ဆေးခန်းများသို့ အရေးပေါ်လူနာတင်ယာဉ်များဖြင့် အမြန်ဆုံး ပို့ဆောင်ကုသပေးထားရကြောင်း သိရသည်။
ပစ်ခတ်မှုဖြစ်ပွားပြီးနောက် ဒေသခံရဲတပ်ဖွဲ့ဝင်များသည် အခင်းဖြစ်ပွားရာကျောင်းဝင်းအတွင်းသို့ ချက်ချင်းဝင်ရောက်စီးနင်းကာ တရားခံများကို လိုက်လံပိတ်ဆို့ဖမ်းဆီးခဲ့ရာ ပစ်ခတ်မှုတွင် ပါဝင်ပတ်သက်သူ သံသယရှိသူ အမျိုး သားနှစ်ဦးအနက် အသက် ၁၅ နှစ်အရွယ်ရှိ ယင်းကျောင်းမှ ကျောင်းသားတစ်ဦးကို လက်ရဖမ်းဆီး ထိန်းသိမ်းနိုင်ခဲ့သည်။ သို့သော်လည်း ပစ် ခတ်မှုတွင် အတူတကွ ပူးပေါင်းပါဝင်ခဲ့သည့် ဒုတိယမြောက် သံသယရှိသူ အမျိုးသားတစ်ဦးမှာမူ လတ်တလောတွင် ထွက် ပြေးလွတ်မြောက်နေဆဲဖြစ်သဖြင့် ရဲတပ်ဖွဲ့က နယ်မြေပိတ်ဆို့ကာ အပြင်းအထန် ရှာဖွေလျက်ရှိသည်။
လက်ရှိတွင် တိုင်းဒေသကြီးရဲတပ်ဖွဲ့ခွဲ ၈ (Police Regional Office 8) မှ ရဲတပ်ဖွဲ့ဝင်အမြောက်အမြားကို အဆိုပါ အထက် တန်းကျောင်းဝင်းနှင့် ပတ်ဝန်းကျင်လူထုအသိုင်းအဝိုင်းအတွင်းသို့ စေလွှတ်ကာ လုံခြုံရေးကို အထူးတိုးမြှင့် တင်းကျပ်ထားကြောင်း သိရသည်။ ရဲစုံစမ်းစစ် ဆေးရေးမှူးများသည် ယခု ကဲ့သို့ ကျောင်းသားအချင်းချင်း ရက်စက်စွာ ပြန်လည်ပစ်ခတ်ရသည့် နောက်ကွယ်က သွေးထိုးလှုံ့ဆော်မှုနှင့် မည်သည့်အကြောင်းရင်းက စတင်ကာ ယခုအကြမ်းဖက်မှုကို ဖြစ်ပွားစေခဲ့သည်ဆိုသော နောက်ခံအကြောင်းရင်းကို သိရှိနိုင်ရန် စုံစမ်းစစ်ဆေးမှုများ ပြုလုပ်နေသည်။
ဖိလစ်ပိုင်နိုင်ငံတွင် ယခုကဲ့သို့ ကျောင်းတွင်းသေနတ်ပစ်ခတ်မှုမျိုးမှာ ဖြစ်ပွားလေ့ဖြစ်ထနည်းပါးသော်လည်း ယခင်ကလည်း ကြီးမားသည့် ဖြစ်စဉ် အချို့ ရှိခဲ့ဖူးသည်။ ပြီးခဲ့သည့် ၂၀၂၂ ခုနှစ်၊ ဇူလိုင်လအတွင်းကလည်း ကွီဇုန်စီးတီး (Quezon City) ရှိ အာတီနီယိုဒီမနီလာတက္ကသိုလ် (Ateneo de Manila University) ၏ ဥပဒေကျောင်း ဘွဲ့နှင်းသဘင်အခမ်းအနားကျင်းပနေစဉ် သေနတ်သမားတစ်ဦးက ဝင်ရောက်ပစ်ခတ်ခဲ့သဖြင့် လာမီတန်မြို့တော်ဝန်ဟောင်း အပါအဝင် လူ ၃ ဦး သေဆုံးခဲ့သည့် သွေးထွက်သံ ယိုဖြစ်ရပ်မျိုး ရှိခဲ့ဖူးကြောင်း သိရသည်။
Telegram»…
https://t.me/positiveanglenews
#PAN