(နိုင်ငံတကာ)မတ် ၃၁
အစ္စရေးမြောက်ပိုင်း၊ ဟိုင်ဖာ (Haifa) မြို့ရှိ ဘန်ဇန် (Bazan)ရေနံချက်စက်ရုံသည် အီရန်နှင့် လီဘနွန်ဘက်မှ ပစ်ခတ်လိုက်သော ဒုံးကျည်မိုးရွာသွန်းမှုအတွင်း ထိမှန်ခဲ့ကြောင်း အစ္စရေးမီဒီယာများက ဖော်ပြသည်။ ဤသည်မှာ ပြီးခဲ့သည့်လက အမေရိကန်-အစ္စရေးနှင့် အီရန်တို့အကြား စစ်ပွဲစတင်ခဲ့ပြီးနောက်ပိုင်း အဆိုပါစက်ရုံ ဒုတိယအကြိမ်မြောက် တိုက်ခိုက်ခံရခြင်းဖြစ် သည်။
တနင်္လာနေ့တွင် ဖြစ်ပွားခဲ့သော အဆိုပါတိုက်ခိုက်မှုကြောင့် စက်ရုံအတွင်း မီးလောင်ကျွမ်းခဲ့ပြီး ကောင်း ကင်ယံတွင် မည်းမှောင်နေသော မီးခိုးလုံးကြီးများကို အဝေးမှပင် မြင်တွေ့ခဲ့ရသည်။ ယင်းတိုက်ခိုက်မှုသည် ဒုံးကျည်တိုက်ရိုက်ထိမှန်ခြင်းလော သို့မဟုတ် ဒုံးခွဲ ဖျက်စနစ်ကြောင့် ပျက်ကျလာသော အပိုင်းအစများကြောင့်လော ဆိုသည်ကိုမူ ချက်ချင်း အတည်မပြုနိုင်သေးပေ။
မီးသတ်တပ်ဖွဲ့မှူး အီတန် ရီဖာ (Eitan Rifa) က “အခြေအနေကို အပြည့်အဝ ထိန်းချုပ်နိုင်ပါပြီ။ ထိခိုက်ဒဏ်ရာရသူမရှိသလို၊ အန္တရာယ်ရှိတဲ့ ဓာတု ပစ္စည်းတွေ ယိုစိမ့်မှုနဲ့ ပြည်သူလူထုအတွက် စိုးရိမ်ရတဲ့အခြေအနေ မရှိပါဘူး” ဟု ပြောကြားခဲ့သည်။
စက်ရုံကို လည်ပတ်နေသည့် Bazan Group ကလည်း ဒုံးကျည်သည် ရေနံချက်ကန် (Distillates tank)၏ အမိုးကို ထိမှန်ခဲ့ခြင်းဖြစ်ပြီး လူအသေအပျောက်မရှိကြောင်း အတည်ပြုခဲ့သည်။
အီရန်နှင့် ၎င်း၏မဟာမိတ် ဟစ်ဇ်ဘိုလာအဖွဲ့တို့ သည် အရှေ့အလယ်ပိုင်းဒေသတစ်ဝှမ်းရှိ အမေရိကန်နှင့် အစ္စရေးပစ်မှတ်များကို ဒုံးကျည်နှင့် ဒရုန်းများဖြင့် တောက်လျှောက် တိုက်ခိုက်လျက်ရှိသည်။ အလားတူ အစ္စရေးစစ်တပ်သည် အီရန်ကို တိုက်ခိုက်နေရုံသာမက လီဘနွန်တစ်နိုင်ငံလုံးကိုလည်း လေကြောင်းမှ တိုက် ခိုက်နေပြီး မြေပြင်ကျူးကျော်စစ်ကိုပါ တိုးချဲ့လုပ် ဆောင်နေသည်။
အပြန်အလှန် တိုက်ခိုက်မှုများ ပြင်းထန်လာခြင်းကြောင့် လီဘနွန်နိုင်ငံတွင် စစ်ဘေးရှောင်ပြည်သူ ၁.၂ သန်းကျော် အထိ ရှိလာခဲ့ပြီး ဘေရွတ်မြို့တော်အထိ အစ္စရေး၏ လေ ကြောင်းတိုက်ခိုက်မှုများ ရောက်ရှိနေသည်။ အမေရိကန်-အစ္စရေးနှင့် အီရန်တို့၏ စစ်ပွဲသည် ယခုအခါ ၅ ပတ်မြောက်သို့ ရောက်ရှိလာပြီဖြစ်သော်လည်း နိုင်ငံတကာ ၏ စိုးရိမ်ပူပန်မှုများနှင့် သံတမန်ရေးရာ ကြိုးပမ်းမှုများကြားမှ စစ်ရှိန်မှာ လျော့ ကျသွားမည့်လက္ခဏာ မရှိသေးပေ။
#HaifaUnderAttack #IsraelWarUpdate #HezbollahMissiles #LebanonInvasion #BazanRefinery #BreakingNews #PositiveAngleNews
Telegram»…
https://t.me/positiveanglenews
#PAN