(မှု့ခင်း) မတ် ၃၁
မြန်မာနိုင်ငံရဲတပ်ဖွဲ့၏ ထုတ်ပြန်ချက်အရ ပြည်ကြီးတံခွန်မြို့နယ်တွင် ငွေကျပ် ၄၇၂.၄ သိန်း (၄၇ သန်းကျော်) တန်ဖိုးရှိ စိတ်ပြောင်းဆေးဝါးများနှင့် သာစည်မြို့နယ်တွင် ငွေကျပ် ၂၀၀.၇ သိန်း (၂၀ သန်းကျော်) တန်ဖိုးရှိ မူးယစ်ဆေးဝါးများ ဖမ်းဆီးရမိခဲ့သည်။
ဖြစ်စဉ်မှာ မတ် ၂၈ ရက် မွန်းလွဲ ၁ နာရီခွဲတွင် မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့ဝင်များ ပါဝင်သည့် ပူးပေါင်းအဖွဲ့သည် ပြည်ကြီးတံခွန်မြို့နယ် (ဂ)ရပ်ကွက်၊ ၆၂လမ်း၊ ၁၁၈-၁၁၉ လမ်းကြားတွင် မြင့်နိုင်ဦး(ခ)ကိုရဲ (၅၆နှစ်) မောင်းနှင်လာသည့် ADIXIN ဆိုင်ကယ်ကို စစ်ဆေးရာ စိတ်ကြွရူးသွပ်ဆေးပြား ၆,၀၀၀ (ဒေသတန်ဖိုး ကျပ် ၁၂၀ သိန်း) ဖမ်းမိသည်။ထို့နောက် မွန်းလွဲ ၃ နာရီတွင် အဆိုပါ မြင့်နိုင်ဦးနေထိုင်ရာ တောင်မြင့်ရပ်ကွက်ရှိ နေအိမ်အား ထပ်မံရှာဖွေခဲ့ရာ စိတ်ကြွရူးသွပ်ဆေးပြား ၁၀,၀၀၀ (ကျပ် ၂၀၀ သိန်း)၊ စိတ်ကြွရူးသွပ်ဆေးပြားအကြေ ၁ ကီလို (ကျပ် ၁၅၀ သိန်း)၊အိုက်စ် (မက်သ်အဖက်တမင်း) ၈ ဂရမ် (ကျပ် ၂.၄ သိန်း)တို့ကို ထပ်မံတွေ့ရှိ ၍ မြင့်နိုင်ဦးအား မူးယစ်ဆေးဝါးဥပဒေအရ အရေးယူထားသည်။
ဆက်လတ်ပီး သာစည်မြို့နယ် ကျွဲတပ်ဆုံကျေးရွာအနီး၌ တောင်ကြီးမှ မန္တလေးသို့ မောင်းနှင်လာသည့် JINDEI အမျိုးအစား ခရီးသည်တင်ယာဉ်အား ည ၁၁ နာရီခွဲအချိန်တွင် ပူးပေါင်းအဖွဲ့များ စစ်ဆေးရာ လိုက်ပါလာသူ မမြင့်မြင့်ထွေး (၂၆နှစ်) နှင့် မစုစုဝင်း (၄၅နှစ်) တို့ထံမှ စိတ်ကြွရူးသွပ်ဆေးပြား ၁၁,၇၀၀ (ဒေသတန်ဖိုး ကျပ် ၁၇၅.၅ သိန်း)၊ဘိန်းစိမ်း ၂.၈ ကီလို (ဒေသတန်ဖိုး ကျပ် ၂၅.၂ သိန်း)တို့ကို ဖမ်းဆီးရမိသည်။ အဆိုပါ အမျိုးသမီးနှစ်ဦးအား မူးယစ်ဆေးဝါးဥပဒေအရ အရေးယူထားကြောင်း သိရသည်။
#PAN