(ပြည်တွင်း) မတ် ၂၈
ယာယီသမ္မတ၏ လမ်းညွှန်ချက်အရ ပို့ဆောင်ရေးနှင့်ဆက်သွယ်ရေးဝန်ကြီးဌာနအောက်ရှိ မြန်မာ့မီးရထားမှ ခရီးသွားပြည်သူများ အဆင်ပြေစွာသွားလာနိုင်ရေးအတွက် ရထားဆိုင်းများတိုးချဲ့ပြေးဆွဲခြင်းနှင့် ရထားတွဲများ ထပ်မံချိတ်ဆက်ပြေးဆွဲခြင်းကို ၂၀၂၆ ခုနှစ် မတ်လ ၂၆ ရက်နေ့မှ စတင် ဆောင်ရွက်လျက်ရှိကြောင်း သိရသည်။
လက်ရှိတွင် စက်သုံးဆီဈေးနှုန်းမြင့်တက်လာမှုကြောင့် မော်တော်ယာဉ်စီးနှင်းခများ တိုးမြင့်လာသဖြင့် ရထားစီးနင်းသူများ သိသာစွာ တိုးပွားလာကြောင်း ခရီးသွားများထံမှ သိရသည်။
“နေပြည်တော်ကနေ မော်လမြိုင်ကို အမြန်လမ်းကသွားတဲ့ယာဉ်ရဲ့ စျေးနှုန်းက ၄၅,၀၀၀ ကျပ်ကနေ ၆၃,၀၀၀ ကျပ်ထိ တက်သွားပါတယ်။ ယာဉ်စီးခတက်တာကို စိုးရိမ်မိတယ်။ ပြန်မကျတော့မှာကိုပါ။ ရထားပြန်ပြေးစေချင်ပါတယ်” ဟု မော်လမြိုင်သို့ သွားလာနေသူတစ်ဦးက ပြောကြားသည်။
ရန်ကုန်-နေပြည်တော် ရထားလမ်းပိုင်းတွင် လေအေးပေးစက်ပါ DEMU လူစီးအမြန်ရထားများဖြစ်သည့် အမှတ်(၃၁)၊ (၃၂)၊ (၇)၊ (၈) ရထားများ ပြေးဆွဲလျက်ရှိပြီး ခရီးသည်များပြားလာမှုကြောင့် အမှတ်(၃၃)နှင့် (၃၄) ရထားများကို ထပ်မံတိုးချဲ့ပြေးဆွဲပေးခဲ့သည်။
ထို့အပြင် ရန်ကုန်-မန္တလေး ရထားလမ်းပိုင်းတွင် အမှတ်(၁၁)နှင့် (၁၂) အမြန်ရထားများ၌လည်း ခရီးသည်များ တိုးပွားလာသဖြင့် အထက်တန်း (၁) တွဲနှင့် ရိုးရိုးတန်း (၃) တွဲ ထပ်မံချိတ်ဆက်ပြေးဆွဲပေးခဲ့ပြီး ယခင်ရပ်တန့်ဘူတာ (၁၆) ဘူတာအပြင် ဒိုက်ဦး၊ ရေနီ၊ ညောင်ရမ်းနှင့် မြစ်သား ဘူတာများတွင်ပါ ထပ်မံရပ်နားပေးခဲ့ကြောင်း သိရသည်။
ထို့အပြင် ရန်ကုန်-မော်လမြိုင်၊ ရန်ကုန်-ပြည်နှင့် ကြည့်မြင့်တိုင်-ပြည် ရထားလမ်းပိုင်းများတွင်လည်း ခရီးသည်များ တိုးပွားလာသဖြင့် ရထားတွဲများ ထပ်မံချိတ်ဆက်ပြေးဆွဲပေးထားပြီး လက်ပံတန်း-သာရဝေါ လော်ကယ်ရထားကိုလည်း မတ်လ ၂၈ ရက်မှစ၍ နေ့စဉ်ပြေးဆွဲပေးလျက်ရှိကြောင်း သိရသည်။
ရထားလက်မှတ်များကို Online Railways Ticketing and Payment System (ORTP) ဖြင့် ဝယ်ယူနိုင်ပြီး လက်မှတ်ခနှုန်းထားများကို ယခင်အတိုင်းသာ သတ်မှတ်ထားကြောင်း သိရသည်။
မြန်မာ့မီးရထားမှ ခရီးသွားပြည်သူများ အဆင်ပြေစေရန် ရထားခရီးစဉ်များ တိုးချဲ့ပြေးဆွဲခြင်းနှင့် ရထားတွဲများ ထပ်မံချိတ်ဆက်ခြင်းများကို ဆက်လက်ဆောင်ရွက်သွားမည်ဖြစ်ကြောင်း ထုတ်ပြန်ထားသည်။
#PAN