(ပြည်တွင်း) မတ် ၁၀
မန္တလေးတိုင်းဒေသကြီး၊ ပြင်ဦးလွင်မြို့နယ်အတွင်း တရားမဝင် မြေကျူးကျော်အခြေချနေထိုင်မှုများနှင့် ခွင့်ပြုချက်မရှိဘဲ မြေအသုံးချမှုများ မဖြစ်ပေါ်စေရန်အတွက် သက်ဆိုင်ရာအစိုးရဌာနပေါင်းစုံ ပါဝင်သည့်အဖွဲ့များဖြင့် မြေပြင်ကွင်းဆင်းစစ်ဆေးမှုများ ဆောင်ရွက်သွားမည်ဖြစ်ကြောင်း သိရသည်။
ပြီးခဲ့သည့် မတ်လ ၈ ရက်နေ့က သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန ပြည်ထောင်စုဝန်ကြီး ဦးခင်မောင်ရီသည် မန္တလေးတိုင်းဒေသကြီး ဝန်ကြီးချုပ် ဦးမျိုးအောင်နှင့်အတူ တာဝန်ရှိသူများလိုက်ပါလျက် ပြင်ဦးလွင်မြို့နယ်အတွင်း မြေအသုံးချမှု ပြောင်းလဲနေသည့် အခြေအနေများကို လေယာဉ်ဖြင့် လှည့်လည်ကြည့်ရှုစစ်ဆေးခဲ့သည်။
အဆိုပါစစ်ဆေးရေးအဖွဲ့တွင် ကြေးတိုင်နှင့် မြေစာရင်းဦးစီးဌာန၊ သစ်တောဦးစီးဌာနနှင့် မြေတိုင်းဦးစီးဌာနတို့မှ ကျွမ်းကျင်သူများ ပါဝင်ခဲ့ကြသည်။
ပြင်ဦးလွင်မြို့နယ်၏ စိမ်းလန်းစိုပြည်မှုနှင့် ရေဝေရေလဲဒေသများ ထိန်းသိမ်းနိုင်ရေးအတွက် သစ်တောစိုက်ခင်းများ တိုးချဲ့တည်ထောင်ခြင်းနှင့် သဘာဝတောများ ကာကွယ်ခြင်းလုပ်ငန်းများကို အရှိန်မြှင့်ဆောင်ရွက်လျက်ရှိသည်။
ထို့ပြင် ယခုကဲ့သို့ ပွင့်လင်းရာသီတွင် ဖြစ်ပေါ်တတ်သော တောမီးလောင်ကျွမ်းမှုနှင့် မီးခိုးမြူငွေ့အန္တရာယ်များကို တားဆီးနိုင်ရန်အတွက်လည်း လေယာဉ်ဖြင့် လှည့်လည်ကင်းလှည့်စစ်ဆေးခြင်းများကို ဆက်လက်လုပ်ဆောင်နေကြောင်း သိရသည်။
တရားမဝင် မြေကျူးကျော်မှုများနှင့် မြေအသုံးချမှု မမှန်ကန်မှုများအား ထိရောက်စွာ တားဆီးနိုင်ရေးအတွက် သက်ဆိုင်ရာဌာနကိုယ်စားလှယ်များ ပါဝင်သောအဖွဲ့များဖြင့် မြေပြင်ကွင်းဆင်း စစ်ဆေးမှုများကို ဆက်တိုက်ဆောင်ရွက်သွားမည်ဖြစ်ကြောင်း သတင်းရရှိသည်။