(နိုင်ငံတကာ) ဇွန် ၂၉
တောင်ကိုရီးယားနိုင်ငံကို ကမ္ဘာ့နည်းပညာနှင့် စက်မှု ကဏ္ဍတွင် အပြတ်အသတ် ဆက်လက်ဦးဆောင်နိုင်စေရန်အတွက် အတုယူဖန်တီးထားသော ဉာဏ်ရည်တု (AI) နှင့် ဆီမီးကွန်ဒတ်တာ ချစ်ပ်ပြားကဏ္ဍတို့တွင် ရေရှည်၌ ဝမ် ၁,၀၀၀ ထရီလီယံ (ဒေါ်လာ ၁ ထရီလီယံကျော်) အထိ ရင်းနှီးမြှုပ်နှံသွားမည့် ကြီးမားကျယ်ပြန့် သော စက်မှုဗျူဟာတစ်ရပ်ကို သမ္မတ လီဂျေမြောင်က တရားဝင် ထုတ်ဖော်ကြေညာလိုက်သည်။
သမ္မတ လီဂျေမြောင်က ယခုစီမံကိန်းသည် ဆီမီးကွန်ဒတ်တာများ၊ ကာယပိုင်းဆိုင်ရာ အိုင်အေ (Physical AI) နှင့် ဒေတာစင်တာများ ဟူသည့် “မဏ္ဍိုင်သုံးရပ်” ကို ဗဟိုပြု၍ နိုင်ငံတော်စီးပွား ရေးကို ရှေ့သို့ ကြီးမားစွာ ခုန်ပျံကျော်လွှားစေမည့် လုပ်ငန်းစဉ်ဖြစ်ကြောင်း၊ အခြားမည်သည့်နိုင်ငံထက်မဆို AI ဆိုင်ရာ အဓိကအချက်အချာများကို ပိုမိုမြန်ဆန်စွာ ဆုပ်ကိုင်နိုင်ရန် လိုအပ်ကြောင်း ရုပ်မြင်သံကြားမိန့်ခွန်းတွင် အလေးပေးပြောကြားခဲ့သည်။
ယခုစီမံကိန်းအရ ကမ္ဘာ့ထိပ်သီး မန်မိုရီချစ်ပ်ထုတ်လုပ် သူများဖြစ်သည့် ဆမ်ဆောင်း အီလက်ထရွန်းနစ် (Samsung Electr-onics) နှင့် အက်စ်ကေ ဟိုင်းနစ် (SK Hynix) လုပ်ငန်းကြီးနှစ်ခုသည် ၎င်းတို့၏ ကုန်ပစ္စည်းပံ့ပိုးသူများနှင့် ပူးပေါင်းကာ နိုင်ငံအနောက်တောင်ပိုင်းဒေသတွင် ချစ်ပ်ပြားထုတ်လုပ်မည့် စက်ရုံအသစ် ၄ ရုံ တည်ဆောက်ရန် ဝမ် ၈၀၀ ထရီလီယံ(ဒေါ်လာ ၅၁၈ ဘီလီယံ) စိုက်ထုတ်သွားမည်ဖြစ်သည်။
ထို့ပြင် ဆိုးလ်မြို့အနီး ချောင်ချွန်းဒေသတွင် ချစ်ပ်ထုပ် ပိုးမှုဇုန်အတွက် ဝမ် ၈၁ ထရီလီယံ ထပ်မံသုံးစွဲမည်ဖြစ်ပြီး ဒေသန္တရအစိုးရများကလည်း ဝမ် ၅ ထရီလီယံမှ ၂၀ ထရီလီယံအထိ ပါ ဝင်ရင်းနှီးမြှုပ်နှံသွားမည်ဖြစ်သည်။ တစ်ပြိုင် နက်တည်းမှာပင် SK Group၊ GS Group နှင့် Naver ကဲ့သို့သော အဓိကလုပ် ငန်းစုကြီးများက ဝမ် ၅၅၀ ထရီလီယံ (ဒေါ်လာ ၃၅၆ ဘီလီယံ) စိုက်ထုတ်ကာ အဆိုပါဒေသ၌ AI ဒေတာစင်တာများ ဆောက် လုပ်မည်ဖြစ်ပြီး ၂၀၃၅ ခုနှစ်တွင် ဒေါ်လာ ၆၄၈ ဘီလီယံကျော် တန်ဖိုးရှိသည့် ၁၀ ဂီဂါဝပ်ပမာဏရှိ AI ဒေတာစင်တာကြီးတစ်ခု ထပ်မံထွက်ပေါ်လာမည် ဖြစ်သည်။
အစိုးရအနေဖြင့် ယခုစီမံကိန်းသည် ဆိုးလ်မြို့တော်ဧရိယာပြင်ပရှိ ဒေသတွင်းစီးပွားရေး ကွာဟမှုများကို ကျဉ်း မြောင်းစေရန် ရည်ရွယ်သည်ဟု ဆိုသော်လည်း အတိုက် အခံပါတီများဘက်ကမူ ပြင်းပြင်းထန်ထန် ဝေဖန်ကန့်ကွက်လျက်ရှိသည်။ အတိုက် အခံများက ဒုတိယမြောက် ဆီမီးကွန်ဒတ်တာစက်မှုဇုန်ကို လက်ရှိအာဏာရ လစ်ဘရယ်ဒီမိုကရက်တစ်ပါတီ၏ အစဉ်အဆက် မဲဆန္ဒခံတပ်ဖြစ်သော ဟိုနမ်(Honam)ဒေသ (အနောက်တောင်ပိုင်း)တွင် အခြေ စိုက်ရန် ဆုံးဖြတ်ခြင်းမှာ စက်မှုလုပ်ငန်းဆိုင်ရာ ကျိုးကြောင်းဆီလျော်မှုမရှိဘဲ နိုင်ငံရေးအမြတ်ထုတ်ရန် ကုမ္ပဏီများကို ဖိအားပေးရွေးချယ်ခိုင်းခြင်းဖြစ်သည်ဟု စွပ်စွဲခဲ့ကြသည်။
သို့သော်လည်း သမ္မတ လီဂျေမြောင်က ၎င်း၏ X လူမှုကွန် ရက်စာမျက်နှာမှတစ်ဆင့် အဆိုပါစွပ်စွဲချက်များကို ပယ်ချခဲ့ပြီး၊ အနောက်တောင်ပိုင်းဒေသကို ရွေးချယ်ရခြင်းမှာ လက်ရှိအချိန်အထိ အသုံးမချရသေးသည့် ကြွယ်ဝသော စွမ်းအင် အရင်း အမြစ်များကို စနစ်တကျ အသုံးချနိုင်ရန်ဖြစ်ကြောင်းနှင့် လွန်ခဲ့သည့် သမ္မတရွေးကောက်ပွဲတွင် မိမိကို ၈၅ ရာခိုင်နှုန်းအထိ မဲပေးထောက်ခံခဲ့သည့် ဒေသဖြစ်၍ မျက်နှာသာပေးခြင်းမဟုတ်ကြောင်း ပြန်လည်တုံ့ ပြန် ချေပခဲ့သည်။
Telegram»…
https://t.me/positiveanglenews
#PAN