(ပြည်တွင်း) မေ ၈
မကွေးတိုင်းဒေသကြီး၊ မကွေးမြို့၊ အောင်မေတ္တာရပ်ကွက်၊ သစ်တောလမ်းရှိ အောင်သစ်လွင်ဈေးသစ်ဖွင့်ပွဲအခမ်းအနားကို ယနေ့နံနက် ၉:၀၀ နာရီအချိန်တွင် အဆိုပါဈေးသစ်တည်ရှိရာနေရာ၌ ကျင်းပပြုလုပ်ခဲ့သည်။
အခမ်းအနားတွင် မကွေးတိုင်းဒေသကြီးအစိုးရအဖွဲ့ ဝန်ကြီးချုပ် ဦးတင်ကိုကိုက အဖွင့်အမှာစကားပြောကြားရာ၌ တိုင်းဒေသကြီးအစိုးရအနေဖြင့် ပြည်သူများ၏ လူမှုစီးပွားဘဝဖွံ့ဖြိုးတိုးတက်ရေး၊ အလုပ်အကိုင်အခွင့်အလမ်းများ ဖော်ဆောင်ပေးရေးနှင့် အခြေခံအဆောက်အအုံများ ပြည့်စုံစေရေးတို့ကို အစဉ်တစိုက် အကောင်အထည်ဖော်ဆောင်ရွက်လျက်ရှိကြောင်း၊ အောင်သစ်လွင်ဈေးသစ်သည် ပြည်သူလူထု၏ အခြေခံလိုအပ်ချက်များ ဖြည့်ဆည်းပေးနိုင်သည့် အရေးပါသော အဆောက်အအုံတစ်ခုဖြစ်ကြောင်း ပြောကြားခဲ့သည်။
ထို့နောက် မကွေးမြို့နယ် စည်ပင်သာယာရေးအဖွဲ့ အမှုဆောင်အရာရှိက ဈေးသစ်တည်ဆောက်ခြင်းလုပ်ငန်းများနှင့် ပတ်သက်၍ ရှင်းလင်းတင်ပြခဲ့သည်။
ဆက်လက်၍ ဝန်ကြီးချုပ်နှင့် တာဝန်ရှိသူများက အောင်သစ်လွင်ဈေးသစ်ကို ဖဲကြိုးဖြတ်ဖွင့်လှစ်ပေးပြီး ဆိုင်းဘုတ်အား အမွှေးနံ့သာရည်များ ပက်ဖျန်းခဲ့ကြသည်။ ထို့နောက် အခမ်းအနားတွင် ပါဝင်ကူညီခဲ့သော ပန်းပွားအဖွဲ့နှင့် ဘင်ခရာအဖွဲ့များအား ဂုဏ်ပြုဆုငွေများ ချီးမြှင့်ခဲ့ပြီး ဈေးအတွင်း လှည့်လည်ကြည့်ရှုစစ်ဆေးခဲ့ကြသည်။
အဆိုပါ အောင်သစ်လွင်ဈေးသစ်တွင် ဆိုင်ခန်းစုစုပေါင်း (၂၄၉) ခန်း ပါဝင်ပြီး သားငါးဆိုင်ခန်းများ၊ ပျံကျဆိုင်ခန်းများနှင့် စနစ်တကျရောင်းချနိုင်ရန် အဆောက်အအုံများ တည်ဆောက်ထားကြောင်း သိရသည်။ မီးဘေးကင်းရှင်းရေး၊ ရေစီးရေလာကောင်းမွန်ရေးနှင့် သန့်စင်ခန်းများအပါအဝင် အခြေခံအဆောက်အအုံများကိုလည်း စနစ်တကျ ထည့်သွင်းတည်ဆောက်ထားကြောင်း မြို့နယ်စည်ပင်သာယာရေးအဖွဲ့မှ သိရသည်။