(ပြည်တွင်း) နိုဝင်ဘာ ၇
PDF အကြမ်းဖက်သမားတွေရဲ့ မီးရှို့ဖျက်ဆီးမှုကြောင့် ကြမ်းခင်းပျက်အချို့ပျက်ဆီးသွားတဲ့ ပလူဇဝတံတားကို ပြင်ဆင်ပြီဖြစ်လို့ ပုံမှန်အတိုင်း သွားလာနိုင်ကြပြီလို့ သိရပါတယ်။
စစ်ကိုင်းတိုင်းဒေသကြီး၊ ကလေးမြို့နဲ့ မော်လိုက်မြို့ကို ဆက်သွယ်ထားတဲ့ ကလေး-မော်လိုက် သွားကားလမ်းမပေါ်က အရှည် ပေ ၃၀၀၊ အကျယ် ၁၈ ပေရှိတဲ့ သံကူကွန်ကရစ် အမျိုးအစားပလူဇဝတံတားကို PDF အကြမ်းဖက် သမားတွေက အောက်တိုဘာလ ၃၀ ရက်မှာ မီးရှို့ဖျက်ဆီးခဲ့ကြတာဖြစ်ပါတယ်။
မီးရှို့ဖျက်ဆီးခံရတာကြောင့် တံတားရဲ့ တောင်ဘက်ခြမ်းကြမ်းခင်း ၁၀ ပေခန့် မီးလောင်ပျက်စီးခဲ့လို့ သွားလာရေးအပြင် ကုန်စည်စီးဆင်းမှုပါပြတ်တောက်သွားခဲ့တာဖြစ်ပါတယ်။
ဒါကြောင့် ဖြတ်သန်းသွားလာနိုင်ဖို့ အခက်အခဲဖြစ်နေတဲ့ တံတားရဲ့ကြမ်းခင်းနေရာကို နယ်မြေလုံခြုံရေးတပ်ဖွဲ့ဝင်တွေက အမြန်ဆုံးပြန်လည်ပြင်ဆင်ပေးခဲ့လို့ အခုချိန်မှာတော့ ပုံမှန်သွားလာနိုင်ကြပြီဖြစ်တယ်လို့ သိရပါတယ်။