(နိုင်ငံတကာ) ဩဂုတ် ၂၆
ဗီယက်နမ်နိုင်ငံခြားရေးဝန်ကြီး လီဟိုင်းထရုန် (Le Hoai Trung) သည် မြန်မာနိုင်ငံခြားရေးဝန်ကြီး ဦးတင်မောင်ဆွေ၏ ဖိတ်ကြားချက်အရ ယနေ့ ဩဂုတ် ၂၆ ရက်တွင် မြန်မာနိုင်ငံသို့ တရားဝင်ခရီးစဉ် လာရောက်မည်ဖြစ်ကြောင်း သိရသည်။
ဗီယက်နမ်နိုင်ငံခြားရေးဝန်ကြီး၏ ခရီးစဉ်အတွင်း နေပြည်တော်၌ ကျင်းပမည့် ဗီယက်နမ်-မြန်မာ နှစ်နိုင်ငံပူးပေါင်းဆောင်ရွက်ရေး ပူးတွဲကော်မတီ၏ ၁၀ ကြိမ်မြောက်အစည်းအဝေးကို မြန်မာနိုင်ငံခြားရေးဝန်ကြီး ဦးတင်မောင်ဆွေနှင့်အတူ ပူးတွဲဥက္ကဋ္ဌအဖြစ် ဆောင်ရွက်မည်ဖြစ်သည်။
ထို့အပြင် ဗီယက်နမ်နိုင်ငံခြားရေးဝန်ကြီး လီဟိုင်းထရုန်သည် မြန်မာနိုင်ငံခြားရေးဝန်ကြီးနှင့် တွေ့ဆုံ၍ နှစ်နိုင်ငံအကြား နှစ်ဖက်ဆက်ဆံရေး၊ ပူးပေါင်းဆောင်ရွက်မှုများနှင့် အပြန်အလှန်အကျိုးရှိမည့် ကိစ္စရပ်များကို ဆွေးနွေးသွားမည်ဟု သိရသည်။
ယခုခရီးစဉ်သည် ဗီယက်နမ်နိုင်ငံခြားရေးဝန်ကြီးတစ်ဦး၏ မြန်မာနိုင်ငံသို့ ပထမဆုံး တရားဝင်လာရောက်သည့် ခရီးစဉ်ဖြစ်ပြီး၊ နှစ်နိုင်ငံအကြား သံအမတ်အသစ်များ အပြန်အလှန်ခန့်အပ်ပြီး တစ်လခန့်အကြာတွင် ဖြစ်ပေါ်လာခြင်းဖြစ်သည်။
ဗီယက်နမ်နိုင်ငံခြားရေးဝန်ကြီးဌာနက မြန်မာနိုင်ငံသည် အာဆီယံအဖွဲ့၏ အရေးပါသည့် အဖွဲ့ဝင်နိုင်ငံတစ်နိုင်ငံဖြစ်ကြောင်း ထုတ်ဖော်ပြောကြားထားပြီး၊ အာဆီယံမိသားစုအတွင်း နှစ်နိုင်ငံအကြား ပူးပေါင်းဆောင်ရွက်မှုများ ဆက်လက်တိုးမြှင့်ရန် အရေးပါသည့် ခရီးစဉ်တစ်ရပ်ဖြစ်လာနိုင်သည်။
မြန်မာနိုင်ငံနှင့် ဗီယက်နမ်နိုင်ငံတို့သည် နိုင်ငံရေး၊ စီးပွားရေး၊ ကုန်သွယ်ရေး၊ ရင်းနှီးမြှုပ်နှံမှုနှင့် အာဆီယံဆိုင်ရာကိစ္စရပ်များတွင် ပူးပေါင်းဆောင်ရွက်လျက်ရှိကြပြီး ယခုခရီးစဉ်နှင့် ပူးတွဲကော်မတီအစည်းအဝေးမှတစ်ဆင့် နှစ်နိုင်ငံဆက်ဆံရေးနှင့် ပူးပေါင်းဆောင်ရွက်မှုများ ပိုမိုတိုးမြှင့်နိုင်မည့် အလားအလာရှိသည်။
ယင်းမတိုင်မီ မြန်မာနိုင်ငံ၏ နိုင်ငံတော်သမ္မတ ဦးမင်းအောင်လှိုင်သည် ဇူလိုင်လအတွင်း လာအိုနိုင်ငံသို့လည်းကောင်း၊ ဩဂုတ်လအတွင်း ထိုင်းနိုင်ငံသို့လည်းကောင်း သွားရောက်ခဲ့ပြီး အာဆီယံဒေသတွင်းနိုင်ငံများနှင့် ဆက်ဆံရေးနှင့် ပူးပေါင်းဆောင်ရွက်မှုများ တိုးမြှင့်ရေး ဆောင်ရွက်ခဲ့သည်။