(ပြည်တွင်း) ဩဂုတ် ၁၈
မြန်မာအမျိုးသမီးတစ်ဦးကို တရုတ်ဇနီးမယားအဖြစ် ပို့ဆောင်ရောင်းစားရန် စီစဉ်ဆောင်ရွက်ခဲ့သည့် လူကုန်ကူးမှုမှ ဖမ်းမိတရားခံ ဒေါ်မြတ်ဆုမွန် (ခ) မဖြူ အား အလုပ်နှင့် ထောင်ဒဏ် ၁၁ နှစ် ကျခံစေရန် တရားရုံးက အမိန့်ချမှတ်ခဲ့ကြောင်း သိရသည်။
ဖြစ်စဉ်မှာ စစ်ကိုင်းတိုင်းဒေသကြီး၊ စစ်ကိုင်းမြို့၊ ပန်းပဲတန်းရပ်ကွက်နေ အမျိုးသမီးတစ်ဦးအား ရှမ်းပြည်နယ် (မြောက်ပိုင်း)၊ မူဆယ်မြို့၊ ဟိုနားရပ်ကွက်နေ ဒေါ်မြတ်ဆုမွန် (ခ) မဖြူ နှင့် ခန့်ပိုင် (ခ) မင်းရန်နိုင် တို့ ၂ ဦးက TikTok မှတစ်ဆင့် ဆက်သွယ်၍ တရုတ်ဇနီးမယား လုပ်ကိုင်ရန်အတွက် မူဆယ်မြို့မှတစ်ဆင့် တရုတ်နိုင်ငံသို့ ပို့ဆောင်ပေးမည်၊ လမ်းခရီးစရိတ် ကုန်ကျခံပေးမည်ဟု ပြောဆိုကာ စည်းရုံးခဲ့ခြင်းဖြစ်ပြီး မူဆယ်မြို့သို့ ရောက်ရှိပါက ၃ လ စာချုပ်ဆိုကာ မြန်မာငွေကျပ် သိန်း ၈၀ ရရှိမည်ဖြစ်ကြောင်း ၃ လပြည့်၍ ဆက်နေလိုပါက နေနိုင်ကြောင်း၊ မနေလိုပါက ၎င်းတို့ကိုယ်တိုင် ပြန်လည်ခေါ်ဆောင်ပေးမည်ဟု မက်လုံးပေးလှည့်ဖြား၍ တရုတ်နိုင်ငံသို့ ပို့ဆောင်ရောင်းစားရန် ခေါ်ဆောင်လာခဲ့ခြင်းဖြစ်ကြောင်း သိရသည်။
ယင်းအမှုနှင့်ပတ်သက်၍ မဟာအောင်မြေခရိုင်တရားရုံးက ဩဂုတ်လ ၁၄ ရက်နေ့တွင် စာရင်းဇယားစစ်ဆေးကာ ဖမ်းမိတရားခံ ဒေါ်မြတ်ဆုမွန် (ခ) မဖြူ အား လူကုန်ကူးမှုတားဆီးနှိမ်နင်းရေးဥပဒေပုဒ်မ ၃၅/၄၄ အရ အလုပ်နှင့် ထောင်ဒဏ် ၁၁ နှစ် ကျခံစေရန် အမိန့်ချမှတ်ခဲ့ပြီး ဖြစ်စဉ်တွင် တိမ်းရှောင်နေသည့် တရားခံ ခန့်ပိုင် (ခ) မင်းရန်နိုင်အား ရာဇဝတ်ကျင့်ထုံးဥပဒေပုဒ်မ ၅၁၂ အရ တရားပြိုင်မရှိဘဲ စစ်ဆေးနိုင်ရေးအတွက် ပုဒ်မ ၈၇/၈၈ အရ တရားဝရမ်းနှင့် ကြော်ငြာစာများ ထုတ်ထားကြောင်း သိရှိရသည်။