(ပြည်တွင်း) ဇူလိုင် ၁၅
ပြည်ထောင်စုသမ္မတမြန်မာနိုင်ငံတော် ဒုတိယသမ္မတ ဒေါ်နန်းနီနီအေးသည် ဒုတိယဝန်ကြီးများ၊ တိုင်းဒေသကြီးဝန်ကြီးများနှင့် တာဝန်ရှိသူများနှင့်အတူ ဇူလိုင် ၁၄ ရက်နေ့တွင် ရန်ကုန်တိုင်းဒေသကြီးအတွင်းရှိ လူမှုဖွံ့ဖြိုးရေးဆိုင်ရာ သင်တန်းကျောင်းများနှင့် စင်တာများသို့ သွားရောက်ကြည့်ရှုစစ်ဆေးခဲ့ကြောင်း သိရသည်။
နံနက်ပိုင်းတွင် ဒုတိယသမ္မတနှင့်အဖွဲ့သည် မရမ်းကုန်းမြို့နယ်ရှိ မသန်စွမ်းသက်ငယ်သင်တန်းကျောင်းသို့ ရောက်ရှိကာ လူမှုဝန်ထမ်းဦးစီးဌာနမှ တာဝန်ရှိသူများ၏ ရှင်းလင်းတင်ပြချက်များကို နားထောင်ခဲ့သည်။ ရှင်းလင်းချက်များတွင် သင်တန်းကျောင်းနှင့် မသန်စွမ်းကလေးများပြုစုစောင့်ရှောက်ရေးဂေဟာတို့၏ လုပ်ငန်းဆောင်ရွက်မှုများ၊ ကလေးများ၏ ကျန်းမာရေးနှင့် ပညာရေးဖွံ့ဖြိုးတိုးတက်ရေးဆိုင်ရာ လေ့ကျင့်သင်ကြားနေမှုအခြေအနေများ ပါဝင်ခဲ့သည်။
ထို့နောက် ဒုတိယသမ္မတက လိုအပ်ချက်များကို တာဝန်ရှိသူများနှင့် ပေါင်းစပ်ညှိနှိုင်း ဆောင်ရွက်ပေးခဲ့ပြီး ချီးမြှင့်ငွေများပေးအပ်ခဲ့သည်။ ဆက်လက်၍ သင်တန်းကျောင်းအတွင်း လေ့ကျင့်ခန်းဆောင်ရွက်နေမှုများ၊ စာသင်ခန်းများ၊ အိပ်ဆောင်များနှင့် ထမင်းစားဆောင်တို့ကို လှည့်လည်ကြည့်ရှုစစ်ဆေးကာ မသန်စွမ်းကလေးငယ်များအား ရင်းရင်းနှီးနှီး တွေ့ဆုံအားပေးခဲ့သည်။
ယင်းအပြင် မသန်စွမ်းကလေးများအတွက် သင့်လျော်သည့် သင်ကြားရေးအစီအစဉ်များကို စနစ်တကျ အကောင်အထည်ဖော်ရန်၊ ကျန်းမာရေးနှင့် အာဟာရပြည့်ဝရေး၊ စိတ်ပိုင်းဆိုင်ရာ အားပေးကူညီမှုများကို ထိရောက်စွာ ဆောင်ရွက်ရန်နှင့် လုံခြုံဘေးကင်းသော သင်ယူမှုပတ်ဝန်းကျင် ဖန်တီးပေးရန် တာဝန်ရှိသူများအား မှာကြားခဲ့သည်။
ထို့နောက် ဒုတိယသမ္မတနှင့်အဖွဲ့သည် ကမာရွတ်မြို့နယ်ရှိ အမျိုးသမီးများဖွံ့ဖြိုးတိုးတက်ရေးစင်တာသို့ သွားရောက်ကာ စင်တာ၏ သက်မွေးဝမ်းကျောင်းသင်တန်းများ၊ အလုပ်အကိုင် ချိတ်ဆက်ပေးမှုနှင့် ကျန်းမာရေးစောင့်ရှောက်မှုဆိုင်ရာ လုပ်ငန်းများကို ရှင်းလင်းတင်ပြချက်များမှ သိရှိခဲ့သည်။ ဒုတိယသမ္မတက လိုအပ်ချက်များကို ညှိနှိုင်းဆောင်ရွက်ပေးပြီး ချီးမြှင့်ငွေများ ပေးအပ်ခဲ့သည်။
ယင်းနောက် စင်တာအတွင်းရှိ ယက္ကန်းအလုပ်ရုံ၊ စက်ချုပ်ခန်းများနှင့် အရောင်းဆိုင်တို့ကို လှည့်လည်ကြည့်ရှုစစ်ဆေးကာ အမျိုးသမီးများ၏ စွမ်းဆောင်ရည်မြှင့်တင်ရေးလုပ်ငန်းများကို ဆက်လက်အရှိန်မြှင့် ဆောင်ရွက်ရန် မှာကြားခဲ့သည်။
မွန်းလွဲပိုင်းတွင် ဒုတိယသမ္မတနှင့်အဖွဲ့သည် ဗဟန်းမြို့နယ်ရှိ အမျိုးသမီးသက်မွေးအတတ်ပညာသင်ကျောင်းနှင့် အိမ်တွင်းမှုသက်မွေးလုပ်ငန်းပညာသင်ကျောင်းများသို့ သွားရောက်ကြည့်ရှုစစ်ဆေးခဲ့သည်။ သင်တန်းများတွင် စက်ချုပ်၊ အိမ်တွင်းစီမံခန့်ခွဲမှု၊ ပန်းအလှပြင်၊ အစားအစာပြုလုပ်မှုနှင့် လက်မှုလုပ်ငန်းများကို လေ့ကျင့်သင်ကြားနေမှုအခြေအနေများကို ကြည့်ရှုစစ်ဆေးခဲ့သည်။
ဒုတိယသမ္မတက သင်တန်းများကို ခေတ်နှင့်အညီ လက်တွေ့ကျွမ်းကျင်မှုကို အလေးထား သင်ကြားပေးရန်၊ အလုပ်အကိုင်အခွင့်အလမ်းများရရှိစေရေးနှင့် ကိုယ်ပိုင်လုပ်ငန်းများ ထူထောင်နိုင်ရေးအတွက် သက်ဆိုင်ရာဌာနများနှင့် ပုဂ္ဂလိကကဏ္ဍများနှင့် ပူးပေါင်းဆောင်ရွက်ရန်နှင့် ဈေးကွက်လိုအပ်ချက်နှင့်ကိုက်ညီသော သက်မွေးအတတ်ပညာများကို ထိရောက်စွာ သင်ကြားပေးရန် တာဝန်ရှိသူများအား မှာကြားခဲ့ကြောင်း သိရသည်။