(နိုင်ငံတကာ) ဇွန် ၂၂
မြန်မာနိုင်ငံအတွင်း ဒီဂျစ်တယ်နည်းပညာသုံး တရားမဝင် အွန်လိုင်းလောင်းကစားမှုများနှင့် ငွေကြေးလွှဲပြောင်းမှုများကို ထိရောက်စွာ တားဆီးနှိမ်နင်းနိုင်ရန်အတွက် သံသယဖြစ်ဖွယ် ဆင်းမ်ကတ် (SIM Card) ၁ သိန်းခွဲနီးပါးကို အပြီးတိုင်ပယ်ဖျက်ခဲ့ပြီး၊ လောင်းကစားလုပ်ငန်းများနှင့် ဆက်နွှယ်နေသည့် Mobile Wallet အကောင့် ၁,၀၀၀ ကျော်ကို ပိတ်သိမ်း၍ ငွေကြေးများကို နိုင်ငံတော်ဘဏ္ဍာအဖြစ် သိမ်းဆည်းခဲ့ကြောင်း သိရသည်။
ဒီဂျစ်တယ်ဖွံ့ဖြိုးတိုးတက်ရေးနှင့် ဆက်သွယ်ရေးဝန် ကြီးဌာန ဒုတိယဝန်ကြီး ဦးသက်ဝင်းအောင်က ဇွန်လ ၁၉ ရက်နေ့က ပြု လုပ်ခဲ့သည့် ပြည်သူ့လွှတ်တော်အစည်းအဝေးတွင် မြောက်ဥက္ကလာပမဲဆန္ဒနယ်မှ လွှတ်တော်အမတ် ဦးနေလင်းအောင်၏ တရားမဝင် လောင်းကစားဝဘ်ဆိုက်များနှင့် အပလီကေးရှင်းများ၊ ဒီဂျစ်တယ်ငွေပေးချေမှုအကောင့်များနှင့် ဖုန်းနံပါတ်များကို ဖော်ထုတ်ပိတ်ဆို့ရေး ကြိုးပမ်းမှုများနှင့် ပတ်သက်သည့် မေးမြန်းချက်ကို ဖြေကြားရာ၌ ယခုကဲ့သို့ ထည့်သွင်းရှင်းလင်းခဲ့ခြင်း ဖြစ်သည်။
ယခုနှိမ်နင်းမှုများကို ဒီဂျစ်တယ်ဖွံ့ဖြိုးတိုးတက်ရေးနှင့် ဆက်သွယ်ရေးဝန်ကြီးဌာနနှင့် ပြည်ထဲရေးဝန်ကြီးဌာနတို့ ပူးပေါင်း၍ အရှိန်အဟုန်မြှင့် ဆောင်ရွက်နေခြင်း ဖြစ်သည်။ အာဏာပိုင်များ ၏ ထုတ်ပြန်ချက်အရ ၂၀၂၅ ခုနှစ်၊ ဇန်နဝါ ရီလမှ ၂၀၂၆ ခုနှစ်၊ ဧပြီလအထိ ကာလအတွင်း အိုင်ပီ(IP)ကန့်သတ်ချက်များ အသုံး ပြုကာ မြန်မာနိုင်ငံအတွင်း ဝင်ရောက်ကြည့်ရှုနေသည့် တရားမဝင် အွန်လိုင်းလောင်း ကစားဝဘ်ဆိုက်နှင့် အပလီကေးရှင်း စုစုပေါင်း ၁၀၂ ခုကို ပိတ်ဆို့နိုင်ခဲ့သည်။
ထို့ပြင် တရားမဝင် ဘဏ္ဍာရေးအကောင့်များ ဖွင့်လှစ်လှုပ်ရှားရန် အသုံးပြုခဲ့သည့် ဆင်းမ်ကတ် ၁,၁၂၀ ကို ပိတ်ပစ်ခဲ့သည့်အပြင်၊ ၂၀၂၅ ခုနှစ်၊ မတ်လမှ ၂၀၂၆ ခုနှစ်၊ မေလအထိ ကာလအတွင်း အွန်လိုင်းလောင်းကစားနှင့် ဆက်နွှယ်ပြီး ပမာဏတူ မက်ဆေ့ခ်ျ (SMS) များကို အစုလိုက်အပြုံလိုက် ဖြန့်ဝေနေသည့် သံသယဖြစ်ဖွယ် ဆင်းမ်ကတ် စုစုပေါင်း ၁၄၃,၄၀၉ ကတ်ကို အပြီးတိုင် စနစ်အတွင်းမှ ပယ်ဖျက်နိုင်ခဲ့သည်။
တစ်ပြိုင်နက်တည်းမှာပင် ပြည်ထဲရေးဝန်ကြီးဌာနသည် အွန်လိုင်းစလော့ဂိမ်း (Slot Game) များနှင့် လောင်းကစားကြော်ငြာများ ရိုက်ကူးထုတ်လုပ်ရာတွင် ပါဝင်ပတ်သက်နေသည့် ရုပ်ရှင် သရုပ်ဆောင်များ၊ လူမှုကွန်ရက် အင်ဖလူရန်ဆာ (Influencers)များနှင့် အခြားကာယကံရှင်များကိုလည်း ဥပဒေအရ ထိရောက်စွာ အရေးယူမှုများ စတင်ဆောင်ရွက်နေပြီ ဖြစ် သည်။
လောင်းကစားလုပ်ငန်းများနှင့် ဆက်နွှယ်ပြီး အမြဲတမ်းပိတ်သိမ်းလိုက်သည့် Mobile Wallet အကောင့် ၁,၀၀၀ ကျော်အတွင်းရှိ ကျန်ရှိငွေများကိုလည်း ဥပဒေလုပ်ထုံး လုပ်နည်းများနှင့်အညီ သိမ်းဆည်းကာ နိုင်ငံတော်ဘဏ္ဍာအဖြစ်သို့ လွှဲပြောင်းပေးအပ်လျက်ရှိကြောင်း ဒုတိယဝန်ကြီးက အတည်ပြုပြောကြားခဲ့သည်။
Telegram»…
https://t.me/positiveanglenews
#PAN