(မှုခင်း) ဇွန် ၁၁
ရန်ကုန်တိုင်းဒေသကြီး၊ ရန်ကင်းမြိုနယ်၊ (၅) ရပ်ကွက်၊ပညာ့ဝတီရိပ်သာလမ်း၊ ဆီဒိုးနားဟိုတယ်နောက်ဖက်တွင် ရပ်ထားသောကားတစ်စီးပေါ်သို ဟိုတယ်အမြင့်ဆုံး ၂၉လွှာမှ အမျိုးသားတစ်ဦးပြုတ်ကျသေဆုံးခဲ့ကြောင်းသိရသည်။
ဇွန်လ ၁၀ ရက်နေ့ နံနက် ၁၁ နာရီက ဆီဒိုးနားဟိုတယ် ၂၉လွှာမှ အမျိုးသားတစ်ဦး ခုန်ချသတ်သေသွားကြောင်း သတင်းအရ သက်ဆိုင်ရာတာဝန်ရှိသူများမှ စစ်ဆေးခဲ့ရာ ၂၉ လွှာအရေးပေါ်ထွက်ပေါက်၏ တံခါးဘောင်ပေါ်တွင် ဖုန်းနှစ်လုံး၊ စာတစောင်နှင့် ကားမောင်းလိုင်စင်တခုကို တွေ့ရှိရကြောင်း သိရသည်။
အဆိုပါ ခုန်ချအဆုံးစီရင်သွားသူမှာ ရှမ်းပြည်နယ်မြောက်ပိုင်း တာမိုးညဲအထူးဒေသမှ မုန်းဝန်းလူမျိုး ဦးတင်စိုးဖြစ်ပြီး လှိုင်သာယာမြို့နယ်ရှိ မိန်ကျယ်အထည်ချုပ်စက်ရုံမှ စီမံကိန်းမန်နေဂျာ၊ မရှုလင်အား သတ်ဖြတ်ခဲ့ပြီး မိမိကိုယ်ကိုကိုယ်အဆုံးစီရင်ခဲ့ကြောင်း သိရသည်။
၎င်းထားရှိခဲ့သောစာထဲတွင် “လေးစားရပါသောရဲအရာရှိများခင်ဗျား ။ကျွန်တော် ကိုတင်စိုးသည် ချစ်သူ မရှုလင်ကိုသတ်မိတဲ့အတွက် ကိုယ့်ကိုကိုယ်အဆုံးစီရင်ဖို့ဆုံးဖြတ်တာပါ။ လှိုင်သာယာအရှေ့ပိုင်းမြိုနယ်၊၆ ရပ်ကွက်၊ ပုဂံလမ်း၊ နဝဒေးအိမ်ယာ၊ Block ၂၀၊ ခြံနံပါတ် ၃ အိမ်မှာချစ်သူရဲ့အလောင်းရှိပါတယ်၊ သွားသယ်ပေးပါ၊ သူနဲ့ချစ်တာ ၇ လကျော်ပါပြီ၊ ကမ္ဘာသိပတ်ဝန်း ကျင်သိပြီးမှ သူကလမ်းခွဲဖိုပြောလို့ စိတ်မထိန်းနိုင်ပဲ သတ်မိတာပါ ။ သူမနဲ့အတူ အပေါ်ထပ်မှာသေဖို့ အိမ်သာထဲမှာ ကြိုးဆွဲချသတ်သေဖို့ ကြိုးစားတာမအောင်မြင်ခဲ့ပါဘူး။ အရာရာအားလုံးကိုတောင်းပန်ပါတယ် ။ နောင်တများစွာနဲ့ ။ ” ရေးသားထားကြောင်း သိရသည်။
လုံခြုံရေးတပ်ဖွဲ့မှ လိပ်စာအတိုင်းသွားရောက်ရှာဖွေရာ အဆိုပါအိမ်မြေညီထပ်တွင် အမျိုးသမီးတစ်ဦး ပြတ်ရှဒဏ်ရာများဖြင့် ကြမ်းပြင်ပေါ်တွင် သွေးအိုင်ထဲလဲကျသေဆုံးနေသည်ကိုတွေ့ရပြီး သေဆုံးသူမှာ မရှုလင် ဖြစ်ကြောင်းအတည်ပြုနိုင်ခဲ့ကြောင်း သိရသည်။
ဟိုတယ်ပေါ်က ခုန်ချခဲ့သည့် အမျိုးသားရုပ်အလောင်းအား စံပြဆေးရုံကြီးသို့ မိုးစေတနာ ပရဟိတအသင်းက ပို့ဆောင်ပေးခဲ့ကြောင်း သိရသည်။
#PAN