(နိုင်ငံတကာ)မေ ၂၉
ဆွစ်ဇာလန်နိုင်ငံ အရှေ့မြောက်ပိုင်း ဝင်းတားသာ (Winterthur) မြို့ရှိ မီးရထားဘူတာရုံတစ်ခုအတွင်း ကြာသပတေးနေ့ နံနက်ပိုင်းက အမျိုးသားတစ်ဦးက အရပ် သားပြည်သူ ၃ ဦးကို ဓားဖြင့် လိုက်လံထိုးခုတ်မှုတစ်ရပ် ဖြစ်ပွားခဲ့ရာ အာဏာပိုင်များက ယင်းဖြစ်စဉ်ကို “ယုတ်မာဆိုးသွမ်းသော အကြမ်းဖက်လုပ်ရပ်” အဖြစ် တရားဝင်သတ်မှတ် ကြေညာလိုက်သည်။
တိုက်ခိုက်မှုဖြစ်ပွားပြီး ၅ မိနစ်အတွင်း အရေးပေါ်ကယ် ဆယ်ရေးအဖွဲ့များ၏ ဝိုင်းဝန်းဖမ်းဆီးခြင်းကို ခံလိုက်ရသည့် သံသယရှိသူမှာ အသက် ၃၁ နှစ်အရွယ် ဆွစ်-တူရကီ ကပြားနိုင်ငံသားတစ်ဦးဖြစ်ပြီး ၎င်းသည် အဆိုပါမြို့၌ပင် နေထိုင်သူဖြစ်သည်။
ရဲတပ်ဖွဲ့၏ ထုတ်ပြန်ချက်အရ ၎င်းသည် ၂၀၁၅ ခုနှစ်ကတည်းက အကြမ်းဖက်အဖွဲ့ဖြစ်သော ISIL (အိုင်ဒီစ်)၏ ဝါဒဖြန့်ပစ္စည်းများကို ဖြန့်ဝေခဲ့မှုကြောင့် အစိုးရ၏ စောင့်ကြည့်စာရင်းတွင် ပါဝင်နေသူဖြစ်ကြောင်း သိရသည်။ ထို့ပြင် ၎င်းသည် စိတ်ကျန်းမာရေးမကောင်းသဖြင့် ရဲတပ်ဖွဲ့ထံ ဖုန်းခေါ်ဆိုမှုများပြုလုပ်ပြီးနောက် စိတ်ကျန်းမာရေးဆေးရုံသို့ ပို့ဆောင်ခြင်းခံခဲ့ရသော်လည်း၊ တိုက်ခိုက်မှုမဖြစ်ပွားမီ ဗုဒ္ဓဟူးနေ့ကမှ ဆရာဝန်က “အန္တရာယ်မရှိနိုင်” ဟု ဆုံးဖြတ်ကာ ဆေးရုံမှ ပေးဆင်းလိုက်ခြင်း ဖြစ်သည်။
အဆိုပါ ဓားထိုးမှုကြောင့် အသက် ၂၈ နှစ်၊ ၄၃ နှစ်နှင့် ၅၂ နှစ်အရွယ် ဆွစ်ဇာလန်အမျိုးသား ၃ ဦး ဒဏ်ရာရရှိခဲ့ပြီး ၂ ဦးမှာ ဆေးရုံမှ ဆင်းခွင့်ရရှိခဲ့ပြီ ဖြစ်သော်လည်း အသက်အကြီးဆုံးဖြစ်သူမှာမူ ပေါင်ဒဏ်ရာပြင်းထန်သဖြင့် ခွဲစိတ်ကုသမှုခံယူကာ ဆေးရုံ၌ ဆက်လက်စောင့်ကြည့်နေရသည်။ စုံစမ်းစစ်ဆေးသူများကမူ သံသယရှိသူသည် မည်သူ့အကူအညီမျှမပါဘဲ တစ်ဦးတည်းအလိုအလျောက် အကြမ်းဖက်ခြင်းဖြစ်သည်ဟု ယူဆထားကြသည်။
ဆွစ်ဇာလန်သမ္မတ ဂိုင်း ပါမလင်း (Guy Parmelin)က ယခုအကြမ်းဖက်တိုက်ခိုက်မှုကြောင့် အကြီးအကျယ် လန့်ဖျပ်တုန် လှုပ်မိရကြောင်းနှင့် ဒဏ်ရာရသူများ အမြန်ဆုံးသက်သာပါစေကြောင်း ထုတ်ပြန်ပြောကြားခဲ့သည်။
တစ်ချိန်တည်းမှာပင် ဆွစ်ဇာလန် အစ္စလာမ်မစ်ဗဟိုကောင်စီ (IZR) ကလည်း ယခုသူရဲဘောကြောင်သော အရိုင်းစိုင်းဆုံးလုပ် ရပ်ကို ပြင်းထန်စွာ ရှုတ်ချကြောင်းနှင့် ISIL အဖွဲ့သည် အစ္စလာမ်ဘာသာကို ကိုယ်စားမပြုဘဲ မွတ်စလင်များ၏ ဂုဏ်သိက္ခာကို ဖျက်ဆီးကာ အပြစ်မဲ့ပြည်သူ များကို သတ် ဖြတ်ရန်သာ ရည်ရွယ်သည့် ဖောက်ပြန်ပျက် စီးနေသော အကြမ်းဖက်ဂိုဏ်းခွဲတစ်ခုသာဖြစ်ကြောင်း ပူး တွဲထုတ်ပြန်ချက်ထုတ်ကာ တုံ့ပြန်ခဲ့သည်။
Telegram»…
https://t.me/positiveanglenews
#PAN