(ပို့ဆောင်ရေး) မေ ၂၈
စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ ယာဉ်အို/ယာဉ်ဟောင်းများ ပယ်ဖျက်ရေးနှင့် လျှပ်စစ်သုံးယာဉ်များ အစားထိုးတင်သွင်းရေးဆိုင်ရာ အသိပေးကြေညာချက်ကို ၂၀၂၆ ခုနှစ် မေ ၂၈ ရက်တွင် ထုတ်ပြန်ခဲ့ကြောင်း သိရသည်။
ထုတ်ပြန်ချက်အရ ထုတ်လုပ်သည့်ခုနှစ်မှ သက်တမ်း ၂၀ နှစ်ကျော်လွန်ပြီး အိုမင်းဟောင်းနွမ်းနေသော မော်တော်ယာဉ်များသည် စက်သုံးဆီ ပိုမိုသုံးစွဲရခြင်းကြောင့် ပြည်သူ့ဘဏ္ဍာငွေများ လေလွင့်မှုဖြစ်စေနိုင်ခြင်း၊ ယာဉ်ကြံ့ခိုင်မှုအားနည်းမှုကြောင့် ယာဉ်မတော်တဆမှုများ ဖြစ်ပွားနိုင်ခြင်းနှင့် မီးခိုးငွေ့ထွက်ရှိမှုများကြောင့် သဘာဝပတ်ဝန်းကျင် ထိခိုက်စေခြင်းတို့ကြောင့် ယာဉ်အိုများ ပယ်ဖျက်ရေးကို ဆောင်ရွက်ခြင်းဖြစ်ကြောင်း ဖော်ပြထားသည်။
ထို့ပြင် သက်တမ်း ၂၀ နှစ်ကျော်ယာဉ်များအပြင် မောင်းနှင်ရန် မလုံခြုံတော့သည့် ယာဉ်များနှင့် သက်တမ်းမပြည့်သော်လည်း မိမိဆန္ဒအရ အပ်နှံလိုသည့် ယာဉ်များကိုလည်း အပ်နှံနိုင်ပြီး ယာဉ်တန်ဖိုးနှင့်အညီ လျှပ်စစ်သုံးယာဉ် (EV) များဖြင့် အစားထိုးလဲလှယ်ခွင့်ပြုသွားမည်ဖြစ်ကြောင်း သိရသည်။
ယာဉ်အိုအပ်နှံရာတွင် ကုန်းလမ်းပို့ဆောင်ရေးညွှန်ကြားမှုဦးစီးဌာနမှ ထုတ်ပေးသည့် ဖျက်သိမ်းယာဉ်ထောက်ခံချက်ပုံစံ (ဃ) ကို တင်ပြရမည်ဖြစ်ပြီး အပ်နှံသည့်ယာဉ်အမျိုးအစားအလိုက် သင့်လျော်သော လျှပ်စစ်သုံးယာဉ်တစ်စီးအား အမျိုးသားအဆင့် လျှပ်စစ်သုံးယာဉ်နှင့် ဆက်စပ်လုပ်ငန်းများ ဖွံ့ဖြိုးတိုးတက်ရေးဦးဆောင်ကော်မတီမှ စိစစ်၍ တင်သွင်းခွင့်ပြုသွားမည်ဖြစ်ကြောင်း သိရသည်။
ထို့အပြင် လျှပ်စစ်ယာဉ်တင်သွင်းရာတွင် လိုအပ်သော နိုင်ငံခြားငွေများကိုလည်း မြန်မာနိုင်ငံတော်ဗဟိုဘဏ်မှ သင့်တင့်သောဈေးနှုန်းဖြင့် ရောင်းချပေးသွားမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။
#PAN