(နိုင်ငံတကာ)မေ ၄
အမေရိကန်သမ္မတ ဒေါ်နယ်ထရန့်ကို လုပ်ကြံရန် ကြိုးပမ်းသည်ဟု စွပ်စွဲခံထားရသော သံသယရှိသူသည် ပြီးခဲ့သည့်လက အိမ်ဖြူတော် သတင်းထောက်များအသင်း၏ ညစာစားပွဲတွင် Secret Service အေးဂျင့်တစ်ဦးကို ပစ်ခတ်ခဲ့သူဖြစ်ကြောင်း အမေရိကန်အာဏာပိုင်များက ပြောကြားလိုက်သည်။
အစပိုင်းတွင် အာဏာပိုင်များက ကျည်ကာအင်္ကျီဝတ်ဆင်ထားသည့် အဆိုပါအေးဂျင့် မည်သို့ဒဏ်ရာရရှိခဲ့သည်ကို အသေးစိတ်ထုတ်ဖော်ပြောကြားခြင်း မရှိခဲ့ပေ။ သို့သော် တနင်္ဂနွေနေ့တွင် အမေရိကန်ရှေ့နေ ဂျန်းနင်း ပီရို (Jeanine Pirro) က CNN သို့ ပြောကြားရာ၌ အဆိုပါအေးဂျင့်အား ပစ်ခတ်ခဲ့သည့်ကျည်ဆန်မှာ သံသယရှိသူ ကိုးလ် တောမတ်စ် အလန် (Cole Tomas Allen) ၏ သေနတ်မှ ထွက်ပေါ်လာခြင်းဖြစ်ကြောင်း စုံစမ်းစစ်ဆေးသူများက အတည်ပြုနိုင်ခဲ့သည်ဟု ဆိုသည်။
“ဒါဟာ သူ (သံသယရှိသူ) ပစ်လိုက်တဲ့ ကျည်ဆန်ဆိုတာ အသေအချာပါပဲ။ အမေရိကန်သမ္မတကို သတ်ဖို့သွားတဲ့လမ်းမှာ သူ့ကိုတားဆီးမယ့် ဘယ်သူ့ကိုမဆို သတ်ပစ်ဖို့ သူက ရည်ရွယ်ချက်အပြည့် ရှိနေခဲ့တာပါ” ဟု ပီရိုက ပြောကြားခဲ့သည်။ သံသယရှိသူ၏ ပြောင်းချောသေနတ် (Shotgun) မှ ထွက်လာသော ခဲကျည်လုံးမှာ အေးဂျင့်၏ ကျည်ကာအင်္ကျီ အမျှင်များကြားတွင် “ငြိတွယ်နေသည်” ကို တွေ့ရှိခဲ့ရကြောင်းလည်း သူမက ဖြည့်စွက်ပြောဆိုသည်။
အသက် ၃၁ နှစ်အရွယ်ရှိ သံသယရှိသူ အလန်သည် လော့စ်အိန်ဂျလိစ်မြို့အနီးရှိ ၎င်း၏နေအိမ်မှ ရှီကာဂိုသို့ ရထားဖြင့်သွားရောက်ပြီးနောက် ဝါရှင်တန်ဒီစီသို့ ဆက် လက်ထွက်ခွာလာခဲ့ခြင်းဖြစ်သည်။ ၎င်းသည် ဧပြီလ ၂၄ ရက်နေ့ (ညစာစားပွဲမတိုင်မီ တစ်ရက်အလို) တွင် ဝါရှင်တန်သို့ ရောက်ရှိလာခဲ့သည်။
ယာယီရှေ့နေချုပ် တော့ဒ် ဘလန့်ချ် (Todd Blanche)၏ ပြောကြားချက်အရ အလန်သည် သမ္မတထရန့်ရှိနေသည့် ခန်းမ၏ အပေါ်ထပ်ရှိ လုံခြုံရေးဂိတ်တစ်ခုသို့ သေနတ်ရှည်တစ်လက်ကိုင်ဆောင်ကာ ပြေးဝင်လာခဲ့သည်။ ထိုစဉ် သေနတ်သံကျယ်လောင်းစွာ ထွက်ပေါ်လာပြီး လျှို့ဝှက်ဝန်ဆောင်မှုအရာရှိတစ်ဦး၏ ရင်ဘတ်ကို ထိမှန်ခဲ့သော်လည်း ကျည်ကာအင်္ကျီကြောင့် အသက်ဘေးမှ လွတ်မြောက်ခဲ့သည်။ အဆိုပါအရာရှိသည် အလန်အား ၅ ချက် ပြန်လည်ပစ်ခတ်ခဲ့သော်လည်း မထိမှန်ဘဲ အလန်မှာ မြေပြင်ပေါ်သို့ လဲကျသွားချိန်တွင် ဖမ်းဆီးထိန်းသိမ်းနိုင်ခဲ့ခြင်းဖြစ်သည်။
အလန်တွင် ပြောင်းချောသေနတ် တစ်လက်၊ Semiautomatic Pistol ပစ္စတိုသေနတ် တစ်လက်နှင့် ဓားသုံးချောင်း ပါရှိကြောင်း အရာရှိများက ဆိုသည်။ ဤဖြစ်စဉ်သည် ၂၀၂၄ ခုနှစ်နောက်ပိုင်း ထရန့်အပေါ် တတိယအကြိမ်မြောက် လုပ်ကြံရန် ကြိုးပမ်းမှုအဖြစ် သတ်မှတ်ထားပြီး အမေရိကန်နိုင်ငံရေးလောကကို တုန်လှုပ်စေခဲ့သည်။
လက်ရှိတွင် အလန်အား ထရန့်ကို လုပ်ကြံရန် ကြိုး ပမ်းမှု၊ ရာဇဝတ်မှုကျူးလွန်ရန် ရည်ရွယ်ချက်ဖြင့် ပြည် နယ်များကို ဖြတ်ကျော်ကာ လက်နက်သယ် ဆောင်မှုနှင့် အကြမ်းဖက်မှုအတွင်း လက်နက်အသုံး ပြုမှု စသည့် ပုဒ်မ ၃ ခုဖြင့် တရားစွဲဆိုထားသည်။ လုပ် ကြံရန် ကြိုး ပမ်းမှုဖြင့် ပြစ်မှုထင်ရှားပါက တစ်သက် တစ်ကျွန်း ပြစ်ဒဏ် ချမှတ်ခံရနိုင်ကြောင်း သိရသည်။
#Trump #AssassinationAttempt #Secret Service #WhiteHouseDinner #USPolitics #BreakingNews #Positive AngleNews #InternationalNews
Telegram»…
https://t.me/positiveanglenews
#PAN