လောင်စာဆီပြတ်လပ်မှုကြောင့် သီရိလင်္ကာတွင် ဗုဒ္ဓဟူးနေ့ကို ရုံးပိတ်ရက်အဖြစ် သတ်မှတ်

(ပြည်တွင်း) မတ် ၁၇

အမေရိကန်နှင့် အစ္စရေးတို့၏ အီရန်နှင့် ပဋိပက္ခဖြစ်ပွားပြီးနောက် လောင်စာဆီပြတ်လပ်မှုများ ရင်ဆိုင်နေရသည့် သီရိလင်္ကာနိုင်ငံသည် အစိုးရအဖွဲ့အစည်းများအတွက် လောင်စာဆီသုံးစွဲမှု လျှော့ချရန် ဗုဒ္ဓဟူးနေ့တိုင်းကို ရုံးပိတ်ရက်အဖြစ် သတ်မှတ်ကြောင်း ကြေညာခဲ့သည်။

သမ္မတ အနူရာ ကုမာရာ ဒစ်ဆာနာယာကေးက “အဆိုးဆုံးအတွက် ပြင်ဆင်ရမည်ဖြစ်သော်လည်း အကောင်းဆုံးကို မျှော်လင့်ရမည်” ဟု တနင်္လာနေ့တွင် ပြုလုပ်သော အရေးပေါ်အစည်းအဝေးတွင် အကြီးတန်းအရာရှိများအား ပြောကြားခဲ့သည်။

ယင်းဆုံးဖြတ်ချက်သည် ပင်လယ်ကွေ့ဒေသမှ ရေနံသယ်ယူပို့ဆောင်ရေးအရေးကြီးလမ်းကြောင်းဖြစ်သော ဟော်မုဇ်ရေလက်ကြား ပိတ်ဆို့မှုနောက်ပိုင်း အာရှနိုင်ငံများက လောင်စာဆီသုံးစွဲမှုကို ထိန်းချုပ်ရန် ဆောင်ရွက်လာသည့် အစီအမံများထဲမှ နောက်ဆုံးတစ်ရပ်ဖြစ်သည်။ ယခင်နှစ်တွင် ယင်းရေလက်ကြားမှ ဖြတ်သန်းသော ရေနံနှင့် သဘာဝဓာတ်ငွေ့၏ ၉၀ ရာခိုင်နှုန်းနီးပါးသည် အာရှဒေသသို့ ဦးတည်နေခဲ့သည်။

အာရှဒေသအတွင်း နိုင်ငံများစွာလည်း စွမ်းအင်ချွေတာရေးအစီအမံများကို တိုးမြှင့်ဆောင်ရွက်လျက်ရှိသည်။ ထိုင်းနိုင်ငံတွင် အဲယားကွန်းအသုံးပြုမှု လျှော့ချရန် အဝတ်အစားလွတ်လပ်မှုကို အားပေးနေပြီး မြန်မာနိုင်ငံတွင် ကိုယ်ပိုင်ယာဉ်များကို လိုင်စင်နံပါတ်အလိုက် အလှည့်ကျ မောင်းနှင်ခွင့်ပြုထားသည်။ ဘင်္ဂလားဒေ့ရှ်တွင် တက္ကသိုလ်များ၏ ရမ်ဇာန်အားလပ်ရက်များကို ပြောင်းလဲသတ်မှတ်ကာ နိုင်ငံတစ်ဝန်း မီးအသုံးပြုမှု လျှော့ချရေး စီမံချက်များကို လုပ်ဆောင်လျက်ရှိသည်။

ဖိလစ်ပိုင်နိုင်ငံတွင်လည်း အစိုးရရုံးဝန်ထမ်းများအား တစ်ပတ်လျှင် အနည်းဆုံး တစ်ရက် အိမ်မှ အလုပ်လုပ်ရန် သတ်မှတ်ထားပြီး မရှိမဖြစ်မဟုတ်သည့် ခရီးသွားလာမှုများကို ကန့်သတ်ထားသည်။ ထို့အပြင် သမ္မတ ဖာဒီနန် မားကို့စ် ဂျူနီယာက လောင်စာဆီဈေးနှုန်းမြင့်တက်မှုကို လျှော့ချရန် သုံးဘီးယာဉ်မောင်းများ၊ လယ်သမားများနှင့် တံငါသည်များအား ငွေသားအကူအညီ ပေးအပ်မည်ဟု ကြေညာထားသည်။

ဗီယက်နမ်နိုင်ငံတွင်လည်း ပြည်သူများအား စက်ဘီးစီးခြင်း၊ အများပြည်သူသယ်ယူပို့ဆောင်ရေး အသုံးပြုခြင်းနှင့် ကိုယ်ပိုင်ယာဉ်အသုံးပြုမှု လျှော့ချခြင်းတို့ကို တိုက်တွန်းလျက်ရှိသည်။

သီရိလင်္ကာနိုင်ငံတွင် အသစ်သတ်မှတ်သည့် လေးရက်အလုပ်သမားစနစ်သည် ကျောင်းများနှင့် တက္ကသိုလ်များတွင်လည်း အသက်ဝင်မည်ဖြစ်သော်လည်း ကျန်းမာရေးနှင့် လူဝင်မှုကြီးကြပ်ရေးကဲ့သို့ မရှိမဖြစ်ဝန်ဆောင်မှုများကို ဆက်လက်ပေးဆောင်သွားမည်ဖြစ်ကြောင်း အာဏာပိုင်များက ပြောကြားခဲ့သည်။

ထို့အပြင် အစိုးရသည် လောင်စာဆီဝယ်ယူမှုကို ခွဲတမ်းစနစ်ဖြင့် ထိန်းချုပ်ထားပြီး ကိုယ်ပိုင်ယာဉ်များအတွက် ၁၅ လီတာနှင့် မော်တော်ဆိုင်ကယ်များအတွက် ၅ လီတာသာ ဝယ်ယူခွင့်ပြုထားသည်။ ယင်းကန့်သတ်ချက်များအပေါ် ပြည်သူအချို့က မကျေနပ်မှုများလည်း ထွက်ပေါ်လျက်ရှိသည်။

ခွဲတမ်းစနစ်ကို ၂၀၂၂ ခုနှစ်တွင် နိုင်ငံ၏ အဆိုးရွားဆုံး စီးပွားရေးအကျပ်အတည်းအတွင်း ပထမဆုံး စတင်ကျင့်သုံးခဲ့ခြင်းဖြစ်ပြီး နိုင်ငံခြားငွေအရန်အလွန်နည်းပါးသွားခြင်းကြောင့် မရှိမဖြစ်ပစ္စည်းများနှင့် လောင်စာဆီများ တင်သွင်းနိုင်မှု အခက်အခဲများ ဖြစ်ပေါ်ခဲ့သည်။ လက်ရှိတွင်လည်း အမေရိကန်နှင့် အစ္စရေးတို့၏ တိုက်ခိုက်မှုများနောက်ပိုင်း ကမ္ဘာ့ရေနံဈေးနှုန်းများ မြင့်တက်လာပြီး တစ်စည်လျှင် ဒေါ်လာ ၁၀၀ ဝန်းကျင်အထိ ရောက်ရှိနေကြောင်း သိရသည်။

#PAN