(မှုခင်း) စက်တင်ဘာ ၂၃
ပါတီစုံဒီမိုကရေစီ အထွေထွေရွေးကောက်ပွဲကျင်းပမှုကို ပျက်ပြားစေဖို့ရည်ရွယ်ပြီး နှောင့်ယှက်ဟန့်တားဖျက်ဆီးခြင်း ပြုလုပ်တဲ့ လွိုင်ကော်နဲ့ ရွှေပြည်သာက လူငယ် ၈ ဦးကို ဖမ်းဆီးအရေးယူထားတယ်လို့ သိရပါတယ်။
ရွေးကောက်ပွဲလုပ်ငန်းစဉ်တွေ ပျက်ပြားစေဖို့ လှုံ့ဆော်ခဲ့ကြတဲ့ ကယားပြည်နယ် လွိုင်ကော်မြို့၊ ဒေါနိုးကူးရပ်ကွက်မှာနေထိုင်တဲ့ ပိုင်ပိုင်စိုး(ခ) မျိုးမင်းခန့်(ခ)ပိုင်စိုး (၁၈)နှစ်၊ ဟန်ထွန်းအောင်(ခ) ရဲမင်းကိုကို (ခ)ဟန်ကြီး (၁၈)နှစ်၊ အောင်နိုင်လင်း (၁၇)နှစ်၊ ဖြိုးပိုင်ဇေအောင် (၁၆)နှစ်နဲ့ ထွန်းနေဦးလှိုင် (၁၄)နှစ်တို့ကို စက်တင်ဘာလ ၁၄ ရက်နေ့က လွိုင်ကော်မြို့မရဲစခန်းက (ပ)၂၁၈/၂၀၂၅ နဲ့ဖမ်းဆီးအရေးယူခဲ့တယ်လို့ သိရပါတယ်။
ဒါ့အပြင် ရွှေပြည်သာမြို့နယ်မှာ ရွေးကောက်ပွဲလုပ်ငန်းစဉ်တွေ ပျက်ပြားစေဖို့ ဆန္ဒပြ၊ လှုံ့ဆော်တာတွေပြုလုပ်ခဲ့တဲ့ ရွှေပြည်သာမြို့နယ် အမှတ်(၅)ရပ်ကွက်က ရဲသူရအောင် (၃၆)နှစ်၊ ကျော်ဝဏ္ဏ (၂၅)နှစ်၊ ချစ်ဝင်း (၄၅)နှစ်နဲ့ ပြေထွန်း (၃၄)နှစ်တို့ကိုလည်း စက်တင်ဘာလ ၁၆ ရက်နေ့က ရွှေပြည်သာမြို့မရဲစခန်းက (ပ) ၃၄၇/၂၀၂၅ နဲ့ဖမ်းဆီးအရေးယူထားတယ်လို့ သိရပါတယ်။
အဆိုပါ နှောင့်ယှက်ဟန့်တာယသူတွေကို ပါတီစုံဒီမိုကရေစီ အထွေထွေရွေးကောက်ပွဲများကို နှောင့်ယှက်ဟန့်တားခြင်းမှ ကာကွယ်ပေးရေးဥပဒေပုဒ်မ ၂၃ (က)နဲ့ အသီးသီးအမှုဖွင့်ကာ ဖမ်းဆီးအရေးယူစစ်ဆေးနေတယ်လို့ ထုတ်ပြန်ချက်အရ သိရပါတယ်။
ပါတီစုံဒီမိုကရေစီအထွေထွေရွေးကောက်ပွဲတွေကို ပျက်ပြားစေဖို့ ရည်ရွယ်ကာ လူမှုကွန်ရက်စာမျက်နှာတွေ အများပြည်သူဆိုင်ရာနေရာတွေမှာ ဟောပြောခြင်း၊ ပြောဆိုခြင်း၊ စည်းရုံးလှုံ့ဆော်ခြင်း၊ ဆန္ဒပြခြင်း၊ စာရေးသားခြင်း၊ ရုပ်ပုံပိုစတာတွေချိတ်ဆွဲခြင်း စတဲ့ နှောင့်ယှက်ဟန့်တားဖျက်ဆီးတာတွေကို စုံစမ်း ဖော်ထုတ်ပြီး ထိရောက်စွာအရေးယူမယ်လို့ သိရပါတယ်။