ဧပြီ ၁
ဘိုင်ယန်မြူးနစ်အသင်း၏နည်းပြ သောမတ်စ်တူဟယ်လ်က ထိပ်ဆုံးမှ လေဗာကူဆင်အသင်းနှင့် (၁၃)မှတ်အထိ ကွာဟသွားပြီးနောက် ဘွန်ဒစ်လီဂါချန်ပီယံလုပွဲ ပြီးဆုံးသွားပြီဖြစ်ကြောင်း ပြောကြားခဲ့ပါတယ်။
နည်းပြတူချယ်က- “ဘိုင်ယန်ရဲ့ချန်ပီယံမျှော်လင့်ချက်က မဖြစ်နိုင်တော့ပါဘူး။ လေဗာကူဆင်အသင်းနဲ့ပတ်သက်လို့ ဂုဏ်ပြုပါတယ်”လို့ ပြောသွားခဲ့တာဖြစ်ပါတယ်။
ယခုတစ်ပတ် ယှဉ်ပြိုင်ကစားသည့် ဘွန်ဒစ်လီဂါပွဲစဉ်တွင် လေဗာကူဆင်အသင်းက ဟော်ဖန်ဟင်မ်အသင်းအား အိမ်ကွင်း၌ (၂-၁) ဂိုးဖြင့် အနိုင်ရပြီး ဘိုင်ယန်မြူးနစ်အသင်း မှာမူ Der Klassiker ပြိုင်ဘက် ဒေါ့မွန်အသင်းကို အိမ်ကွင်းမှာပင် (ဝ-၂) ဂိုးဖြင့် ရှုံးနိမ့်ခဲ့ပါတယ်။
ဘွန်ဒစ်လီဂါပြိုင် ပွဲပြီးဆုံးရန် လက်ကျန်(၇)ပွဲအလိုတွင် လေဗာကူဆင်အသင်းက (၇၃) မှတ်ရရှိထားပြီး ဒုတိယနေရာမှ ဘိုင်ယန်မြူးနစ်အသင်းက (၆၀)မှတ်သာရရှိသည့်အတွက်(၁၃)မှတ်အထိ ဖြတ်ထားနိုင်ခြင်းဖြစ်ပါတယ်။
ယခုရာသီတွင် လေဗာကူဆင်အသင်းအနေဖြင့် ပြိုင်ပွဲစုံ၌ ရှုံးပွဲမရှိမှတ်တမ်းဖြင့် ရလဒ်ကောင်းများရယူနေခြင်းမှာ ပွဲတိုင်းတွင် နောက်ဆုံးမိနစ်၊ နောက်ဆုံးစက္ကန့်အထိ မဆုတ်မနစ်ကြိုးစားမှုကြောင့်ဟု ဆိုရမည်ဖြစ်ပါတယ်။