ဇန်နဝါရီ ၂၉
(၇၇)နှစ်မြောက် ပြည်ထောင်စုနေ့ကို ကြိုဆိုဂုဏ်ပြုသောအားဖြင့် မကွေးတိုင်းဒေသကြီးအစိုးရအဖွဲ့နှင့် ကျန်းမာရေးဝန်ကြီး ဌာနတို့ ပူးပေါင်းကာ မကွေးမြို့နယ် သံဘိုရွာသစ်စံပြကျေးရွာအား မျက်စိအတွင်းတိမ်ကင်းစင်ရွာအဖြစ် ဆောင်ရွက်နိုင်ခဲ့ခြင်း အထိမ်းအမှတ်အခမ်းအနားကို ဇန်နဝါရီလ ၂၆ ရက်နေ့က အဆိုပါကျေးရွာ ဘက်စုံသုံးခန်းမ၌ ကျင်းပဆောင်ရွက်ခဲ့ရာ တိုင်းဒေသကြီးဝန်ကြီးချုပ် ဦးတင့်လွင်နှင့် အဖွဲ့ဝင်ဝန်ကြီးများ၊ တိုင်း၊ ခရိုင်၊ မြို့နယ်အဆင့် ဌာနဆိုင်ရာအကြီးအကဲများ၊ မျက်စိအတွင်းတိမ်ကင်းစင်ပြီး အလင်းရလာကြသည့် သံဘိုရွာသစ်မှ ရပ်မိရပ်ဖများနှင့် ကျေးရွာသူ၊ ကျေးရွာသားများ တက်ရောက်ခဲ့ကြသည်။
ဦးစွာ တိုင်းဒေသကြီးဝန်ကြီးချုပ် ဦးတင့်လွင်က မြို့ပြနှင့် ကျေးလက်ဖွံ့ဖြိုးမှုကွာခြားချက်များ ကျဉ်းမြောင်းပြီး လူနေမှုအဆင့်အတန်းမြင့်မားစေရန်အတွက် ခေတ်မီစံပြကျေးရွာတွေကို ဖော်ဆောင်ပြီး ကျေးရွာတွေမှာ ဘက်စုံဖွံ့ဖြိုးတိုးတက်ရေးလုပ်ငန်းများ ဆောင်ရွက်လျက်ရှိကြောင်း၊ ဒီကနေ့ဟာ ပြည်သူလူထုအနေနဲ့ အာရောဂျံပရမံလာဘံဆိုတဲ့ စကားအတိုင်း ကျန်းမာခြင်းသည် လာဘ်ကြီးတစ်ပါးအဖြစ် ကျန်းမာမှ အလုပ်လုပ်နိုင်ပြီး အလုပ်လုပ်နိုင်မှ ဖွံ့ဖြိုးတိုးတက်ရေးလုပ်ငန်းများ လုပ်ဆောင်နိုင်မှာဖြစ်တဲ့အတွက်ကြောင့် အခြေခံကျပြီး ပြည်သူလူထုလိုအပ်တဲ့ ကျန်းမာရေးစောင့်ရှောက်မှုကို တိုးမြှင့်ပေးတဲ့ အခမ်းအနားတစ်ခုလည်းဖြစ်ပါကြောင်း၊ မျက်စိအတွင်းတိမ်ဆိုတာ အသက်ကြီးရင့်လာသူတွေမှာ တွေ့ကြုံရလာတဲ့ ရောဂါတစ်မျိုးဖြစ်ပြီး၊ ခေတ်မီဖွံ့ဖြိုးတိုးတက်လာတဲ့ ဆေးပညာအရ ပျက်စီးနေတဲ့ မွေးရာပါမှန်ဘီလူးကို စက်ကိရိယာ၊ ကျွမ်းကျင်မှုများနဲ့ ပေါင်းစပ်ပြီး မှန်ဘီလူးအသစ်လဲပေးခြင်းဖြင့် မျက်စိအတွင်းတိမ်ရောဂါကို ကုသနိုင်မှာလည်းဖြစ်ပါကြောင်း၊ မျက်စိအတွင်းတိမ်ကင်းစင်ရွာများ ပေါ်ပေါက်လာစေရေးအတွက် မကွေးတိုင်းဒေသကြီးအစိုးရအဖွဲ့က ပူးပေါင်းစီမံခွင့်ရတာဟာ မကွေးတိုင်းဒေသကြီးအတွင်းက ပြည်သူတွေအတွက်ရော တိုင်းဒေသကြီးအစိုးရအတွက်ပါ မင်္ဂလာတပ်ရပ်ပဲဖြစ်ပါကြောင်း၊ ဒီလုပ်ငန်းစဉ်ဟာ ဒီတစ်ရွာတည်းနဲ့ပြီးမြောက်သွားမှာ မဟုတ်ဘဲ မကွေးတိုင်းဒေသကြီးအတွင်းမှာရှိတဲ့ အခြားသောစံပြရွာတွေကိုလဲ ဆက်တိုက် လစဉ်အဆက်မပြတ် ဆောင်ရွက်ပေးသွားဦးမှာဖြစ်ပါကြောင်း၊ ရွာသူရွာသားများအနေဖြင့်လည်း မိမိတို့ရဲ့ကောင်းမွန်လာတဲ့ ကျန်းမာရေးအခြေအနေပေါ်မူတည်ပြီး နိုင်ငံတော်ရဲ့စေတနာကို သဘောပေါက်စွာဖြင့် ကျေးရွာဖွံ့ဖြိုးရေးလုပ်ငန်းများ၊ ဘာသာ၊ သာသနာ ဖွံ့ဖြိုးရေးလုပ်ငန်းတွေမှာ ဆထက်ထမ်းပိုးထမ်းရွက်သွားကြဖို့ ပြောလိုကြောင်း စသည်ဖြင့် ပြောကြားသည်။
ဆက်လက်၍ မကွေးတိုင်းဒေသကြီး ပြည်သူ့ကျန်းမာရေးနှင့် ကုသရေးဦးစီးဌာနမှူး ဒေါက်တာနန္ဒဝင်းက မကွေးတိုင်းဒေသကြီး မကွေးမြို့နယ်ရှိ သံဘိုရွာသစ်စံပြကျေးရွာကို မြန်မာတစ်နိုင်ငံလုံးမှာ ပထမဦးဆုံး မျက်စိအတွင်းတိမ်ကင်းစင်ရွာအဖြစ် ဆောင်ရွက်နိုင်ခဲ့ခြင်းဖြစ်ပြီး၊ မကွေးမြို့နယ် သံဘိုရွာသစ်စံပြကျေးရွာမှာ မျက်စိအတွင်းတိမ်ကင်းစင်ကျေးရွာအဖြစ် ဖော်ဆောင်နိုင်ဖို့ ကျေးရွာအတွင်းရှိ အသက်(၅၀)နှစ်နှင့်အထက် သက်ကြီးဘိုးဘွား(၉၆)ဦးကို စမ်းသပ်စစ်ဆေးကာ မျက်စိအတွင်းတိမ်လူနာ သက်ကြီးဘိုးဘွား(၁၇)ဦးကို ခွဲစိပ်ပေးနိုင်ခဲ့တာဖြစ်ပြီး၊ လက်ရှိမှာတာ့ သံဘိုရွာသစ်စံပြကျေးရွာမှာ မျက်စိအတွင်းတိမ်လူနာမရှိတော့ပဲ မျက်စိအတွင်းတိမ် ကင်းစင်ရွာဖြစ်စေဖို့ လစဉ်အမြဲမပြတ် စမ်းသပ်စစ်ဆေးဆောင်ရွက်ပေးသွားမှာဖြစ်ကြောင်း ပြောကြားသည်။
ဆက်လက်ပြီး မျက်စိအတွင်းတိမ်ကင်းစင်ပြီး အလင်းရလာကြသည့် သံဘိုရွာသစ်မှ မျက်စိအတွင်းတိမ် ခွဲစိတ်ကုသပြီးသူ ရပ်မိရပ်ဖတစ်ဦးက ကျေးဇူးတင်စကားပြောကြားကာ၊ တိုင်းဒေသကြီးဝန်ကြီးချုပ်နှင့် တာဝန်ရှိသူတို့က မျက်စိအတွင်းတိမ် ခွဲစိတ်ကုသပြီးသူများအား အာဟာရစားသောက်ဖွယ်ရာများ ထောက်ပံ့ပေးခဲ့ကြောင်း သိရသည်။
PAN