မုန်တိုင်းဒဏ်သင့် ရခိုင်ပြည်သူတွေ ထိခိုက်မှုမရှိစေဖို့ မြင့်တက်နေတဲ့ စက်သုံးဆီဈေးနှုန်းတွေကို ပြည်နယ်အစိုးရအဖွဲ့ ပြန်လည်စိစစ်ကြပ်မတ်နေPAN- မေ ၃၀မိုခါဆိုင်ကလုန်းမုန်တိုင်းဒဏ်သင့် ရခိုင်ပြည်သူတွေ ထိခိုက်မှုမရှိစေရေးအတွက် မြင့်တက်နေတဲ့ စက်သုံးဆီ ဈေးနှုန်းများကို ပြန်လည်စိစစ်ကြပ်မတ်နေပြီဖြစ်တယ်လို့ ရခိုင်ပြည်နယ်အစိုးရအဖွဲ့ ပြောခွင့်ရပုဂ္ဂိုလ် ဦးလှသိန်းက ပြောဆိုလိုက်ပါတယ်။ ပြီးခဲ့တဲ့ မေလ ၂၆ ရက်နေ့က ပြည်နယ်အစိုးရရုံးမှာ ပြုလုပ်တဲ့ သဘာဝဘေးပြန်လည်ထူထောင်ရေး လုပ်ငန်းညှိနှိုင်းအစည်းအဝေးမှာ စက်သုံးဆီ သုံးစွဲသူတွေ ထိခိုက်မှုမရှိစေရေးအတွက် ပြန်လည်စိစစ်ကြပ်မတ် ဆောင်ရွက်သွားမှာဖို့ ဆုံးဖြတ်ခဲ့တာဖြစ်တယ်လို့ ပြည်နယ်အစိုးရအဖွဲ့ ပြောရေးဆိုခွင့်ရပုဂ္ဂိုလ် ပြည်နယ်ဥပဒေချုပ် ဦးလှသိန်းက သူ့ရဲ့ လူမှုကွန်ရက်ကနေတဆင့် အသိပေးရေးသားလိုက်တာဖြစ်ပါတယ်။စက်သုံးဆီ အရောင်းဆိုင်(ပန့်ဆိုင်)ကြီးတွေနဲ့ လမ်းဘေးပျံကျ ပြင်ပအရောင်းဆိုင်တွေရဲ့ စက်သုံးဆီဈေးနှုန်းတွေမှာ ကွာဟမှုတွေ ရှိနေတာကြောင့် အခုလို ဈေးနှုန်းကိုထိန်းချုပ်နိုင်ရေးအတွက် ကြပ်မတ်နေတာဖြစ်တယ်လို့ သိရပါတယ်။“ဒါကတော့ ကြိုဆိုရမှာပဲ။ လုပ်သင့်တဲ့ လုပ်ရပ်လို့ မြင်မိပါတယ်။ စကားပဲမဟုတ်ဘဲ ဆီဆိုင်တွေထိသွားပြီး ထိထိရောက်ရောက် လုပ်စေချင်တယ်။ ဆိုင်တစ်နဲ့တစ်ဆိုင် ဈေးနှုန်းတွေ မကွာတော့ ကျွန်တော်တို့လည်း ခရီးသည်တွေကို တင်ခေါ်ရတာ အဆင်ပြေမယ်”လို့ စစ်တွေမြို့က သုံးဘီးဆိုင်ကယ် (တုတ်တုတ်)မောင်းသူ ကိုစံသိန်းမောင်က PAN ကို ပြောပါတယ်။ရခိုင်ပြည်နယ်က စက်ဆုံးဆီဈေးနှုန်းမှာ မိုခါမုန်တိုင်းဝင်ရောက်ပြီးတဲ့ နောက်တစ်နေ့ မေလ ၁၅ ရက်နေ့မှာပဲ ချက်ချင်းဆိုသလို တစ်လီတာကို ၅၀၀၀ ကျပ်အထိ ဈေးနှုန်းမြင့်တက်ခဲ့တာဖြစ်ပြီး ရသတ္တတစ်ပတ်လောက်ကြာပြီးမှ ၃၀၀၀ ကျပ်ကို ပြန်လည်ကျဆင်းခဲ့တာဖြစ်တယ်လို့ သိရပါတယ်။စစ်တွေမြို့က စက်သုံးဆီဆိုင်ကြီးတွေမှာ 92 တစ်လီတာကို ၂၁၀၀ ကျော်၊ 95 တစ်လီတာကို ငွေ ၂၂၀၀ ကျော်နဲ့ ရောင်းချနေတာဖြစ်ပြီး လမ်းဘေးပျံကျ စက်သုံးဆီဆိုင်တွေမှာတော့ 92 တစ်လီတာကို ၂၅၀၀ ကျပ်နဲ့ 95 တစ်လီတာကို ၂၇၀၀ ကျပ်အထိ ဈေးနှုန်းမြင့်တင် ရောင်းချနေကြတာ ဖြစ်ပါတယ်။“ကျွန်တော်တို့ ဈေးတင်ရောင်းတယ်ဆိုတာကလည်း မယူလို့လည်း မရဘူးလေ။ ဆီဆိုင်ကြီးတွေက တဆင့်ခံ ဝယ်ပြီး ရောင်းနေရတဲ့အထဲ အခွန်ခတွေလည်း ပေးရသေးတယ်လေ။ ဆီလျော့တာတွေ၊ သုံးမရတဲ့ အနည်ပါတာတွေလည်းရှိတော့ အနည်းဆုံး ၅၀၀ လောက် တင်ရောင်းမှ အဆင်ပြေမှာလေ”လို့ စစ်တွေမြို့မှ လမ်းဘေးပျံကျ စက်သုံးဆီ ရောင်းချနေသူတစ်ဦးက ပြောပါတယ်။မုန်တိုင်းမတိုက်မီ မေလ ၁၄ ရက်နေ့ မတိုင်ခင်က စက်သုံးဆီ အောက်တိန်း တစ်လီတာကို ၂၀၀၀ ကျပ်ဝန်းကျင်သာ ရှိခဲ့တဲ့အတွက် လက်ရှိ စက်သုံးဆီဈေးနှုန်းဟာ မြင့်တက်နေသေးတယ်လို့ စစ်တွေဒေသခံတွေက ဆိုကြပါတယ်။#PAN