(နိုင်ငံတကာ)မတ် ၁၇
ယမန်နေ့ နံနက်အစောပိုင်းတွင် ကမ္ဘာ့အလုပ်အရှုပ်ဆုံး လေကြောင်းဗဟိုချက်တစ်ခုဖြစ်သည့် ဒူဘိုင်းနိုင်ငံတကာလေဆိပ် (DXB) သည် ဒရုန်း (Drone) များဖြင့် ပစ်မှတ်ထားတိုက်ခိုက်ခြင်း ခံခဲ့ရသည်။ အဆိုပါတိုက်ခိုက်မှုကြောင့် လေဆိပ်ကို နာရီပေါင်းများစွာ ပိတ်ထားခဲ့ရပြီး ခရီးသည်ထောင်ပေါင်းများစွာ အခက်တွေ့ခဲ့ရသည်။
ယမန်နေ့ နံနက် ၀၄:၃၀ နာရီအချိန်ခန့်တွင် လေဆိပ်ဝေဟင်ပိုင်နက်အတွင်းသို့ မသင်္ကာဖွယ် ဒရုန်းအများအပြား ကျူးကျော်ဝင်ရောက်လာကြောင်းလေကြောင်းထိန်းသိမ်းရေးမျှော်စင်က စတင်သတိပြုမိခဲ့သည်။နံနက် ၀၄:၄၅ နာရီအချိန်ခန့်တွင် ဘေးကင်းလုံခြုံရေးအတွက် လေယာဉ်အတက်အဆင်းအားလုံးကို ရပ်ဆိုင်းလိုက်ကြောင်း (Ground Stop) တရားဝင်ကြေညာခဲ့သည်။ နံနက် ၀၅:၀၀ နာရီ – ၀၉:၀၀ နာရီအချိန်အတွင်း ဒူဘိုင်းသို့ ဆိုက်ရောက်မည့် လေယာဉ်ပေါင်း ၄၀ ကျော်ကို အဘူဒါဘီ (Abu Dhabi) နှင့် ရှာဂျာ (Sharjah) လေဆိပ်များသို့ လမ်းကြောင်းပြောင်း ဆင်းသက်စေခဲ့ရသည်။
ဒရုန်းအချို့ကို ဒူဘိုင်းလေကြောင်းရန်ကာကွယ် ရေးစနစ်က ပစ်ချနိုင်ခဲ့သော်လည်း၊ အချို့မှာ လေယာဉ်ပြေးလမ်းအနီးသို့ ကျရောက်ပေါက်ကွဲခဲ့ကြောင်း သတင်းများထွက်ပေါ်နေသည်။ လေဆိပ်အာဏာပိုင်များကမူ လူအသေအပျောက်မရှိသော်လည်း လုံခြုံရေးအရ စစ်ဆေးမှုများ အရှိန် အဟုန်ဖြင့် လုပ်ဆောင်နေရသဖြင့် ခရီးစဉ်များ နှောင့်နှေးနေခြင်းဖြစ်ကြောင်း ထုတ်ပြန်ထားသည်။
အီရန်အခြေစိုက် SNN သတင်းဌာန၏ ဖော်ပြချက်အရ အီရန်နိုင်ငံခြားရေးဝန်ကြီးဌာနက ဤတိုက်ခိုက်မှုများကို “တရားမျှတသော တုံ့ပြန်မှု” ဟု ခေါင်းစဉ်တပ်ထားသည်။ ပင်လယ်ကွေ့နိုင်ငံများရှိ အခြေခံအဆောက်အအုံများနှင့် အမေရိကန်၏ ပိုင်ဆိုင်မှုများကို ပစ်မှတ်ထားခြင်းမှာ အစ္စရေးနှင့် အမေရိကန်တို့၏ အီရန်အပေါ် ဖိအားပေးမှုများကို တုံ့ပြန်ခြင်းဖြစ်သည်ဟု ဆိုသည်။
ယူအေအီး (UAE)နိုင်ငံက “ဒါဟာ အရပ်ဘက်လေကြောင်းလုံခြုံရေးကို ပြောင်ပြောင်တင်းတင်း ခြိမ်းခြောက်တာဖြစ်ပြီး အကြမ်းဖက်လုပ်ရပ်သာဖြစ်တယ်” ဟု ပြင်းထန်စွာ ရှုတ်ချထားသည်။
အမေရိကန် သမ္မတ ထရန့်အစိုးရက ပင်လယ်ကွေ့ဒေသတွင်းရှိ မဟာမိတ်များကို အကာအကွယ်ပေးရန်အတွက် အင်အားသုံးတုံ့ပြန်သွားမည်ဟု သတိပေးလိုက်သည်။
ဒူဘိုင်းလေဆိပ် တိုက်ခိုက်ခံရမှုသည် ကမ္ဘာ့စီးပွား ရေးနှင့် ခရီးသွားလာရေးကဏ္ဍကို တိုက်ရိုက်ထိခိုက်စေသည့် လုပ်ရပ်ဖြစ်ပြီး အီရန်က ပင်လယ်ကွေ့ဒေသကို စစ်မျက်နှာအသစ်အဖြစ် အသုံးပြုလာခြင်းသည် စစ်မီးကို ပိုမိုကျယ်ပြန့်စေပြီး ရေနံစျေးနှုန်းနှင့် ကုန်စည်စီးဆင်းမှုအပေါ် ကြီးမားသော စိန်ခေါ်မှုများ ဖြစ်လာစေသည်။
#PositiveAngle #BreakingNews #DubaiAirportAttack #DroneStrike #IranConflict #UAE #GlobalAviation #MiddleEastCrisis2026
Telegram»…
https://t.me/positiveanglenews
#PAN